Nisreen85’s Blog











{November 18, 2008}   طق حنك


فى بعض الأحيان تحوطنا الهموم الشخصية لدرجه ان ننسي الهم العام الذي شئنا ام ابينا نحمله وانا لم انسي هم مصر بل أن اعصابي قد
تآكلت من ثقل الحمل الذي تضعه مصر على كتفي,نعم هم وحمل ربما ليس منطقياً ان اقول اننى احمل هم مصر ولكنها الحقيقة التي سيشعر بها بالتأكيد من يعيش فى الغربه مثلي”اللهم فك كرب مصر وارفع عنها حكم الظالم يارب“1

ليس من عادتي ان اغير آرائي من أقصي اليمين الى اقصي اليسار لكن توقعاتي لاوباما ونظرتى له اختلفت بشكل كلى تأثرا ثم أقتناع برأي “جو غانم” و “نواره نجم”

الرجال معظمهم مرضي نفسيين لا يستحقو اقل قدر من الاهتمام بهم, مع كل احترامي وحبي وتقديري لأصدقائي المحترمين من الرجال لكن و رأي اخير و جواب نهائي توصلت له بعد تجربه قصيره ثريه ان الرجال بدون ادني شك لديهم خلل نفسي من نوع ما لا أفهمه.

تعرفت مؤخرا على زميله بالعمل لبنانيه سنيه كدت ان اضيفها على الفايس بوك لقائمه أصدقائي ولكنى وجدتها تضع صوراً غريبه للسيد حسن نصرالله يرتدي قميص نوم و غيرها من العاب الفوتوشوب التي يساء أستخدامها ناهيك عن العبارات العنصريه تجاه الشيعة فأنسحبت ببطء وحصرت علاقتي بها فى حدود العمل فقط لا اعلم سبب انقباض قلبي منها بهذا الشكل رغم انى اصادق أهلاويه وناصريين وغيرهم من المختلفيين معي فى بعض الافكار و هناك زملاء مسيحيين وشيعه وسنه و شيوعيين اتعامل معهم بمنتهى الاريحيه والتفاهم دون اى حساسيه او انقباض لماذا انقبضت منها بالتحديد لا اعلم حقاً.

مصر بتخسر 9 مليون جنيه يومياً فى صفقتها مع اسرائيل لتصدير الغاز الطبيعي آآآه يا اعصابي و شكرً للقاضي النزيه الذي أصدر حكم محترم اليوم فى القضيه التى لم اتوقع فيها ابداً اى حكم عادل

لا اريد حقا ان اتحدث عن قضيه الطبيب المصري فى المملكه العربيه السعوديه فالأمر أصابني بأكتئاب حاد أجبرني على محاولة ان اتناساه و نواره نجم وفانتازيا تحدثو عن الأمر وقالو ما أريد قوله و كفوا و وفوا أريد فقط ان اذكر شئ بسيط اغلب المصريين هنا المتدينين خاصه مؤيدين للقرار ويقولون بسذاجه مستفزه”السعوديه ماشيه بشرع الله حنجادل فى شرع الله اكيد الدكتور يستاهل الله واعلم عمل ايه السعوديه احسن من مصر وبتطبق الشريعه انتو عاوزين يبقي فيها شواطئ عراه زي مصر والبنات تمشي فيها كاسيات عاريات” لماذا اصبح الملتزمين فى هذا الزمن أغبياء؟!!؟

رغم انى لا اعتقد انه شئ غريب ان يشرب ملك السعوديه الخمر فالامر ليس مفاجأه بالنسبه لي ومتوقع لكن الصور المنشوره والتي رأيتها عند “تفاتيفو”على الجايكو هى صور له وهو يحمل كوب ماء تقريبا وليس خمر.

ليلي علوي خست واحلوت وصحتها جت على الجواز مع انها حسب كلامها فضلت انسه حتى وصلت الخامسه والاربعين ثم تزوجت من حمو جمال مبارك وهو ملياردير وحوت كبير

“يا تري صحتها وشبابها جم على الفلوس ولا ع الجواز”

اظن اللى تفضل انسه لسن الخامسه والاربعين اكيد حتزهد فى الرجاله يعني ومش حيرجعولها شبابها يبقي اكيد الفلوس

:))

ده انا عندي 22 سنه وزهدت فى الرجاله

:))


رئيس جمهوريه نفسى says:

كلنا مهما زادات همومنا بنغرق فى هم مصر يمكن يا نسرينا همكم بيكون مضعف بسبب الغربة فربنا يكون فى عونكم
انا منتظرتش وجهة نظر حد في اوباما لانى واثق انى مفيش حداية حترمى كتاكتي حتى لو كانت مسلمة مش بس ابوها مسلم او اسمه حسين
موضوع المرض النفسى للرجال حروح اخضع لجلسات علأج نفسى واقولك😀
موقفك من زميلتك اللبنانيه ده راجع لسبب بسيط جدا انك عندك قدره على قبول الاخر اى ما كان اختلافة معاكى بس برضة بترفضى التطرف بكل صورة
الحكم فى قضية الغاز اخشى انه يكون مجرد حبر على ورق زى باقي الاحكام فى تزوير الانتخبات وخلافة
موضوع ليلى علوي هو مش عم مراة خديجه واكيد طبعا الفلوس عليها عامل السحر
زهدك في الرجال ان شاء اللة حيختفى يوم ما تقابلى ابن الحلال اللى يستاهلك ان شاء اللة
مبروك النيولوك ولو انه متاخر قوي



Cognition Sense says:

اللبنانية دي يستحسن ماتكلميهاش تاني خالص

هههه

أصل الناس اللي زي دي بجد الواحد مش لازم يضيع وقت معاهم، عقلهم بيكون صغير لدرجة إنك عايزة مايكروسكوب من النوع المتطور عشان تشوفيه… وما بتشوفيهوش

على كل حال… حلوة الحياة مع الإختلافات

إبقي كبري الخط شوية عشان نقدر نقرا اللي يتكتبيه من غير مانروح عند دكتور عيون تاني يوم🙂

تحياتي بجد



qwert anime says:

على الرغم انى مش لسا فى الكره و مش منتمى لأى نادى و عمرى ما اتفرجت على ماش كره
الا انى مبحبش اصاحب اهلاويه و لما بعرف ان حد اهلاوى بضايق فكان جمله رغم انى بصاحب اهلاوية رائعة بالنسبالى
—————————
انتى مش فاهمة الصورة بتاعت الملك دى صورة للملك و هو لأول مره فى حياته بيشرب مايه قبل كده كان خمره بس
—————————
انتى غيرتى تصميم المدونة؟
حاسس بكده و الخط صغير اوى ياريت تكبرية او يتقل



راجى says:

يا نسرين ما فيش انسان على وجه البسيطة سواء كان رجل او سيدة معندوش او معندهاش حته موش مظبوطة



sham3on says:

هي الاضافه علي الفيس بوك مهمه اوي كده
صحيح واحنا حيبقي لنا ايه غير التراي سيبس



فاتيما says:

نسرينا يا جميلة
الريس محمود قال كل اللى كنت عاوزة أقوله
و طبعاااااااا موفقاكى فى أن السادة الرجال عاوزين إعادة تاهيل نفسى عشان يتقبلوا الآخر و يعاملوه على أه إنسان مكتمل و مواطن من الدرجة الأولى زيهم
حكاية الزهد دى بقى غصبن عن الواحد
و النفس هتيجى لما تقابلى حد يستاهل
تحياتى يا حبيبتى
و تغيير لوك المدونة معناه انك زهقانة خالص خالص



EmY says:

بصي قبل اي تعليق انتي واحشاني اوي يا رينا و انا هاموتك علشان مختفيه و مش عارفه احط ايدي عليكي افترسك
بجد يا رينا انتي عارفه انا بحبك قد ايه و انتي فعلا واحشاني يا قمر

نيجي بقي للبوست

حال مصر بقي زي البورصه غير معلوم ولا مفهوم و كل يوم اسوأ من الي قبله

انا كمان ليس من عاداتي تغير رأي بس ممكن اقتنع برأي حد ل لاقيته فعلا صح و يستاهل اني اغير رأي

انا معاكي ان معظم الرجال فيهم حاجه غلط غير مفهوم سببها ايه تعالي نجمع من بعض و نوديهم كلهم لهبه قطب و احمد عكاشه لان مشاكل الرجال مش بتخرج من الجنس و مشاكل نفسيه

انا ضد اي حد متعصب و بقفل منه سواء مسيحي او مسلم سني او شيعي انا ليا اصدقاء مسيحين و هندوس و شيعه و كتير مختلفين معايا بس في بينا لغة حوار محترمه

الحكم كان فعآ مفاجأه في ظل الاعتقاد السائد ان رجال مصر الشرفاء ماتو في الحرب

موضوع الطبيب المصري حاجه تكسف و دول مش ملتزمين دول مغيبين يا حبيبتي

ملوك الخليج كلهم حدث ولا حرج

ههههههههه عسل انتي لحقتي 22 سنه و الرجاله يقضوا عليكي و تزهدي خلاص خلي نفسك طويل يا قمر



Hannoda says:

آآه ياني
اجهدتيني بتتابع المشاعر اللي ورى اخبارك و آرائك و صورك

كل ما امسك بتعليق في ذهني و اقووول لازم افتكر اقوله الاقي غيره جي يزاحمه في ذهني

اما هم مصر مستحيل انا بالذات اشوفه غير منطقي
ببساطة لأني اكتشفت ان المنطق كله جوه قلوب الناس و مدارياها لإنها شايفاه مش منطقي

مع ن لو كل الناس طلعت اللي فقلوبها حاتلاقي حياتنا و مصر كلها منطقية وواقعية

اما نظريتك عن الرجال فانا اراها صحيحة الى حد ما ولكن جوايا قلق اننا نكون انا و انت واللي معانا من الناس اللي مابيعرفوش يشوفوا المجتمع كله في مشهد واحد بيضمنا احنا نفسنا جواه

بوست باين فيه قلقك اللي مخلي عينك بتجري على كل حاجة متعلقة بيها
بس هي كده
نطلع منها ونبعد قد ما نبعد

بس برضه تفضل عيونا عليها
وقلوبنا يملاها الفرح من لحظة تقربنا ليها

وحشتيني قوي



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: