Nisreen85’s Blog











{July 21, 2008}   !
اعتقدت فى البدايه ان قصة حقيبه الاسعافات الاوليه المدرجه ضمن قانون المرور الجديد ما هى الا مزحه سمجه او اشاعه غبيه لا تدخل عقل نمله فمن البديهيات ان الاسعافات الاوليه فى حوادث السيارات بالتحديد لا يجب ان تتم الا عن طريق متتخصص فى الاسعافات الاوليه طبيب او ممرض
من الخطر اصلا على المصاب ان يتم اسعافه على يد اى شخص والسلام يبقي ايه لازمه شنطه اسعافات اوليه فى كل سياره
مين العقليه الخرافيه فى الحكومه اللى حطت القانون ده فى ساعه مزاج؟؟؟؟؟
اليس من الاولى توفير سيارات اسعاف مجهزه فى نقاط محدده وفي الطرق السريعه بطول الجمهوريه
اليس من الاولى تحسين مستوي غرف الطوارئ ورفع اجور الاطباء وانشاء دورات تدريبيه للمسعفين وتسهيل الاتصال بالاسعاف ورفع مستوي خدماتها
مين العقليه الخرافيه اللى حطت القانون ده فى ساعه مزاج؟؟؟؟؟
مين الشركه اللى حتنزل الشنط السحريه الجهنميه اللى حتحل كل مشاكل حوادث المرور للاسواق؟
اسم الشركه واسم صاحبها ليه مجهول ومش معروف وليه الشنطه حتنزل الاسواق وليها مواصفات وشكل محدد والا كده مخالفه يا معلم وانت اصلا مش لاقي تحط بنزين
يعني مينفعش يقولو للناس يا جماعه حطو شويه اسعافات اوليه شاش وقطن ورباط ضاغط وصبغه يود ومطهر فى عربياتكم
لازم يعني شنطه معينه بشكل معين
يا سلام
يا سلام لام
يا سلام لام لام
هما حلفين يمين على نفسهم انهم يخلصو على كل فلوس الناس باي طريقه
ولسه كمان الله واعلم القانون فيه ايه تانى اكيد حيبقي فيه كام مخالفه اختراع مصري خالص مالص واكيد حيزودو قيمه المخالفات زي ما حصل زياده فى قيمه ترخيص السياره وتجديد الرخص
انا عاوزه اعرف مين الشركه اللى حتنزل الشنط ديه السوق ومين صاحبها؟وعاوزه اعرف نعرف منين ان التعويضات وثلت لضحايا حادث قطار مطروح؟؟
والراجل اللى جثه بنته راحت ليبيا رجعت ولا لأ؟
مش معقول كل مصيبه تحصل ننشغل بيها شويه وبعدين ننام على الخط ونسكت على حقنا لغايه ما تيجي المصيبه اللى بعدها
وهكذا وهكذا لما اتصفينا خلاص!!


محمد عبد الغفار says:

الغنى والفقير والمتعلم والجاهل الموظف وسائق الميكروباص الكبار وحتى العيال

الكل اتفق

انها محاوله لترويج سلع راكده عند احد الكبار او احد اقاربهم



رئيس جمهوريه نفسى says:

نسرين
طبعا انتى فى الكويت مش عارف حصلتى فى مصر الاختراع العجيب الى اسمه التوك توك ولا لا بصى يا ستى التوك توك ده منتج هندى استوردو فى مصر واتعمل ليه افراج جمركى واتباع والناس اشترت واشتغل ومكنش ليه ترخيص وفى الموتمر الماضى للحزن الوطنى وزير المواصلات بكل بجاحه قال انى الحكومه وفرت 180 الف فرصه عمل عل التوك توك ده والترخيص بتاعه حيبتدى لما يطبق قانون المرور الجديد
فهمتى يعنى انا استورد وابيع وبعدين اعمل قانون علشان اصرف السلعة الى بتنش وزيها زى شمطة الاسعاف كده
موضوع نقط اسعاف على الطرق السريعة يا نسرين اذا كان كل طرق مصر السريعه غير امنه وبما فيها الطريق الدولي او بمعنى ادق غير مطابقه للمواصفات العالميه يعنى احنا معندش ما يطلق عليه الطرق علشان يتعمل عليها نقط اسعاف



جبهة التهييس الشعبية says:

يا حبيبتي

اركني في الشمس نص ساعة وبعدين ابرمي الشنطة دي وحطيها في اوسع حتة عند نظيف لا مؤاخذة

قال اسعافات قال

احنا بقينا عاملين زي الرقاصة اللي بتصرف على البلطجي



ahmad says:

لاء هم قصدهم بالاسعافات الاولية حاجات كدة تخلي الشعب كوووول و ميتنرفزشي و ميغضبشي و اول ميحس انه هيفرقع من الي بيشوفه في الشارع علطول يروح لشنطة الاسعافات و التي غالبا ما سوف تتكون من 2 جم هيروين نقي اكسترا و حقنة ماكس و باكتة بانجو و شوت ويسكي مخلط ببنزين و 3 علب سجاير كوكو الضعيف
طبعا لو عسكري و لا ظابط وقفك عشان القانون الجديد و قالك غرامة 2000 جنيه تدفعها دلوقتي او تتحبس بدل ميجيلك جلطة تقوم شادد السطر و وراه الجوينت و تقوله باشا باااااااشا مساء الفل يعني ظباط المرور يعني الداخلية يعني الحاج حبيب العدلي عمنا و عم البلد دي كلها و سمعني سلام لو مكنتش انت تدلعني مين هيدلعنييييي
و بكدة جاوبتك عن سؤالك انا الي ورا الموضوع ده هما تجار المخدرات غالبا و بكدة هنكون ضربنا كل العصافير بكل الحجارة و صرفنا المخزون و سلطنا الشعب و لو مدفعشي المخالفة برضه هيلبس قضية احراز بغرض التعاطي و النقل احراز بغرض الاتجار
الاتجاه الجديد كمان اللي جاي انه لازم كل واحد يحط في عربيته سيخين حديد عز تحديدا



The Innocent says:

ناس وبتنام عريانة، ليهم حق يحلموا.
تحياتي



appy says:

ربنا يسامحك يااااااا رب سامحها على حرقه دمى
نسيتى المثلثات العاكسه سا حبيبتى
بثى بقى اولا الموجوده فى السوق مش مطابقه للمواصفات لسه بيستوردوا من الصين 100 شركه طالبين احنا واحده منهم شوفتى حتى ابسط حاجه مش عارفين نصنعها بس قى النهايه عارفه انهم هيوفقوا لواجد بس مين هو لسه مش اتكشف
انا بقي هقول للظابط لو عندك فى عربيتك هشيلها فى عربيتى
والله بجد يا هعمل حل تانى هشترى اللى عاوزينه واحطه فى شنطه الميك اب واقوله عادى كل ما تخسر هرميها واجيب غيرها
يا بنتىىىىىىىى مش موجوده المثلثات العاكسه هعمل تلات مساطر والزق عليهم لون فسفوري
بصى والله لو اتوحدنا نجيب لهم الضغط هنجيب بس نتوحد
غير كده بيقولك من اول اغسطس والشنطه مش موجوده
ما هما لازم ينيلوا الدنيا
يعنى باقى القانون حلو انما لازم خااااااااااازوق فى النص ربنا يسامحك اقولك انا هريحهم هكتب على شنطه العربيه عربيه اسعاف ههههههههههههه



يا مراكبي says:

سؤال

هو الواحد لاقدر الله لو حصلتله حادثة .. ممكن ساعتها يقدر يفتح الشنطة دي ويعمل إسعافات لنفسه؟



النجمة الصامدة says:

كما العادة

قوانين تفقع المرارة

ومحاولات لسلب اكبر كمية نقود ممكنة من الناس

وصرفة لحاجة حد مش عارفة يبيعها

وتحيا العزبة



واحدة مفروسة says:

ههههههههههههههههههههه
ده انا كنت محضره بوست على الموضوع ده بس ماهيمش حنزله بس باسلوب آخر
بيقولو ان اللى واخد توكيل الشنط ديع ….ههههههههههههههه
ايف سالوران
او بالانسياجا
ههههههههههه

لأ و ايه ده يعني لو اتعزرتي فى رابطة شاش و وقفك اللى اسمه ايه ده العكسري و 6فتح الشنطه ولقى رابطه واحده حيسحب الرخص
ههههههههههههههه
و لا القطن كل واحد حيمشي معاه ميزان علشان يوزن القطن اللى معاكي
تصدقى..
الموضوع بقى حاجه تفرس بالزياده



على باب الله says:

مش عارف ليه الدولة كل ما تتزنق تدور أزاي تجيب فلوس من الشعب

مش في حاجات كده أسمها التصدير و بقية الحاجات اللي ممكن تجيب فلوس حقيقية .. مش بطريقة من دقنه و إفتل له دي

أنا كاتب تدوينة عن نفس الموضوع .. و منفرد بنشر صورة الرجل صاحب مصنع علب الإسعافات الأولية



راجى says:

على فكرة وشر البلية ما يضحك القانون الجديد ينص على حتمية وجود صندوق اسود مثل المستخدم فى الطائرات ولكن لسيارات الميكروباص
مسخرة



ابو احمد says:

الايام دى بتفكرنى بأسوأ ايام المماليك
تحياتى



عم مينا says:

أنا مش فاهم يعني لو واحد لا قدر الله اتقلبت بيه العربية هتنفعه في ايه الشنطة؟؟ هيكلم يعني واحد صاحبه يجي يعالجه؟؟؟ طب ده حتة أي حد بيفهم بيقولك ان المفروض ما حادش يحرك المصاب بعد ما يعمل حادثة و لازم تستني الإسعاف.. و لا يمكن هو خلوا الشعب كله يشتري الشنطة فيقدروا يوفروا انهم يشتروها لعربيات الإسعاف



EmY says:

ازيك يا رينا واحشاني اوي
ايه بس مش تسيبي الناس تاكل عيش
لاقو الشعب فلوسه زياده قالو يقصصه ريشه احسن يروح يبعزق فلوسه و اهو بردو الحكومه اولي بلحم الشعب

و كلو بيقلب عيشه في البلد دي

عااادي خالص الي بيحصل ده يعني هي اول مره

و الي يعيش ياما يشوف

تحياتي يا رينا



كلام.....لبنات حوا says:

عزيزتى

انتى فكرتينى بموضوع الحزام لما فجاءه شددوا عليه
ووصل سعره لميت جنيه

بس السواق المصرى بقه شاطر بقه يعمل حزام على اده كده سورى بحزام الشنط

اكيد هيفضلوا مطنشين على الشنطه دى لحد ما تيجى دفعة شنط للى عليه الدور يهبر من الدبيحة

وتلاقى كل الضباط والمرور شغلهم الشاغل الشنطة

وساعتها هتنباع بضعف الثمن

ودى مصر وشعبها وحكومتها

تحياتى

سلام



alexandrany says:

يا بنتي انتي مش فاهمه
المشكله مش في الشنطه
على فكرة انا عاجباني الفكرة بتاعه الشنطه دي والمثلث العاكس
بس الموضوع مش موضوع مين الشركه اللي هتورد الشنط دي
الشنط اصلا مش موجوده في السوق
فالعربيات وهي داخله ع اللجان هتدبس في مخالفه على طول



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: