Nisreen85’s Blog











{July 14, 2008}   سؤال؟

هل مر بحياتك قصه حب حقيقيه ومكملتش؟
طيب هل قدرت تتخطاها وتنسي الشخص وتحب غيره وتجرب نفس السعاده اللى مرت عليك فى التجربه السابقه؟؟
لو كنت قدرت تتخطاه فعلا وتنسي التجربه ياريت بقي تقولى\تقوليلي عملت\عملتى كده ازاى يعني روشته من كل حد حيتفضل عليا ويزور المدونه ازاي تخطي تجربه فاشله وازاى تخطي شخص كان بيحبه وفي وقت ما كان حاسس انه ميقدرش يعيش من غيره؟؟
لو حد عاوز يتكلم براحته ومش حابب يتكلم عن تجربه شخصيه بشكل علني فا ياريت برضه يعلق بغير معرف بس يحكي ويفضفض يمكن تجربته تكون مفيده جدا ليا او لاي حد00شكرا مقدما انا حاسيب البوست ده فتره طويله لانى محتاجه اكبر قدر ممكن من الاجابات عن السؤال ده :)))


The Innocent says:

كل مرة بأفشل ويرجع قلبي يدق من جديد، لأننا ما ينفعش نعيش من غير حب، من غير حد يشاركنا حياتنا، لكن للأسف مش هأعرف أقول لك إزاي لأني الآن بمرحلة الفشل وقلبي بينزف، بس أكيد هأحب من جديد
حبوا كل حين ولا تملوا



فاتيما says:

مين دا اللى يتخطى ؟؟
هوه فيه حد بيعرف يتخطى حاجة خالص
الحب اللى مبيكملش بيفضل قاعد فى ركن منزوى فى قلبك كل شوية تفتكريه و تروحى توديه شوية مشاعر و حنين و بعدين تقفلى عليه و تمشى
القصة لما مبتكملش بتفضلى طول عمرك تقولى لو كنا لبعض كان زمانى اسعد و لا احسن و لا ..و لا…
دا لو كنتى بتحبى بجد
و تقعدى تتبعى اخباره و تتمنيله الخير على رأى أنغام و تتمنى لو تبقى مكان مراته دلوقتى حالاً بس معاكى ولادك إنتى
و ترجعى تلمى التعابين تانى و تقولى
كل واحد بياخد نصيبه
مل الآخر كدا
أنا متخطيطش حاجة بعد كل العمر دا
لو عايزة رأيى
متتخليش عن قصة حبك إلا بطلوع الروح
عشان مترجعيش تبصى وراكى تانى
لكن لو كانت الحكاية بتخلص برضاكى
يبقى متقلقيش
هتنسى و حبه هينتهى فى قلبك واحدة واحدة
شايفة الحكم اللى بتطلع منى ؟!!!
مع إنى ىخر واحدة تنصح
إنما أهو برضو مفيش مانع الواحد ياخد الحكمة من أفواه ال …
إيه
ست العاقلين طبعاً
اومال هيا فى الأصل إيه ؟؟؟!!!!



coffee break says:

انا مريت بالتجربة دى و فى الوقت اللى كنا بنحضر فيه للخطوبة، حد كنت بثق وقتها فيه اوى اوى قال لى عنه كلام مش كويس و ان عيلته بتاعة مشاكل
المهم هو كان فى الفترة الأخيرة ابتدى يرجع فى كلامه بخصوص الإتفاق اللى اتفقه اهله مع بابا
فالموضوع دة حسسنى ان فيه حاجة مش تمام
المهم قلت لاء كرامتى و هسيبه رغم انى بحبه عشان مش هاخد واحد طمعان فيا لأنه كدة يبقى مابيحبنيش
و فى يوم كلمنى عشان ننزل نشترى الشبكة قلت له لاء خلاص كل شىء انتهى
ليه و مش ليه
قفلت على المواضيع
قعدت بعدها بسنة و نص اندم على القرار دة و قلت طيب كنت اتأكدت، كنا مشينا وراهم للآخر، يمكن كان سوء فهم
المهم قضيت ليالى كاملة ابص فى صورته و افتكر كلامنا و عيطت و جالى اكتئاب جامد جدا
لعلمك انا 25 سنة يعنى مش بنت مراهقة
المهم بعد سنة و نص من اجترار الذكريات و الندم لقيته عايز يرجع يكلمنى تانى
قعدت افكر اكلمه و لا لاء
لقيت انى ببساطة نفسى اتسدت من ناحيته و قعدت افكر هو انا كنت بحبه ليه اصلا دة
و فجأة كأن عينى كان عليها غطا اتشال الغطا و اكتشفت كل عيوبه اللى كانت باينة بس انا ماكنتش شايفاها عشان كنت بحبه

مش عارفة انصحك بأيه الحقيقة اللى اقدر اقوله ان ماحدش مابيقدرش يعيش من غير حد و إلا كنا متنا ورا الناس الغالية علينا اللى ماتت
بتعيشى و بتشتغلى و بتتخرجى مع اصحابك بس فيه مشاعر بتبقى مش موجودة و بتفتقديها
و على حسب شخصيتك بأة، هل من السهل تحبى حد تانى و لا انتى من النوع اللى صعب يحب

انا عن نفسى رغم مرور سنتين على القصة ماحبتش حد و لا حسيت بنفس الإحساس اللى حسيته مع الشخص دة بس فى نفس الوقت مش ندمانة على قرارى يمكن لأنى بفكر ان البديل التانى كان انى اتجوزه و تبقى جوازة فاشلة مفيش منها مخرج

المهم فكرى كويس قبل ما تعملى اى حاجة
ارجو انى اكون افدتك



محمد عبد الغفار says:

حصل طبعاً ، وتخطيتها بضغطة زر او هكذا كنت اعتقد وقتها

الحل هو الأنشغال الجدى فى شئ يستنفذف كل طاقتك فضلاً عن تمرين النفس وجبرها على عدم التفكير فيما مضى وده بياخد قت وعاوز صبر بس نتائجه مضمونه

لو نجح هذا الحل يبقى فقط ان بعد سنوات ستعودى حتماً لتقييم التجربه ووقتها فقط ستتأكدى ان كان حب حقيقى ولا وهم وهم وانزاح



واحد مش فاهم حاجة says:

بص مالاول كدة

انا هتفلسف عليك

دة بعد اذنك يعنى

هو انت لو عملت اللى بيعملة زويل كل يوم

وكل ساعة وكل دقيقة

اقدر اقول انك هاتاخد نوبل

لا مش هاتاخدها

يبقى بتطبيق منهج الاستنباط الفلسفى

لو عملت اللى عملة واحد كان فى نفس موقفك

مش
بالضرورة ان تتخطى الموقف دة

اقولك خد الموقف ببساطة

دى الروشتة اللى اقدر اقولها

حب بقى مش حب

شوف بسيطة ازاى

زى ما بكرة لما يجى مش هايبقى بكرة هايبقى اسمة النهاردة

تحياتى



واحد مش فاهم حاجة says:

انا اسف جدا

ماخدتش بالى ان اسم صاحب المدونة نسرين

عشان كدة تعليقى كان لمذكر

تحياتى تانى



appy says:

اممممم انا غير معرف طبعا
بصى يا بنتى الناس اللى زينا مش بتنسى خالص بس زى ما قولت امتى تنسى لما تلاقى حد تانى بيشدها من قفاها
وساعتها بقى دورك انتى اوعى تفكرى فى التانى اوعى تقارنى التصرفاااااااااااااات ودى مهمه
لو مفيش حد شدك كل ما يجى فى بالك اعملى اى حاجه فى حياتك تانيه حتى مصيبه لغايه ما تتناسى مش تنسى ومع مرور الوقت ولاانشغال والطحن فى اى حاجه فى الحياة بأصدقاء بهل بشغل هتنسى
وعن تجربه منى انا الانونيمس



رئيس جمهوريه نفسى says:

عارفه يا نسرين
حبية بجد وانا فى الكليه والجمال انى محبتش بس انا حبيت واتحبيت بالضبط سنه ونص عمر الحب ده عشت فيهم اجمل سنه ونص فى عمرى ومش حقتنع ولا معتقد انى حعيش زيهم كانت حاجه غريبه قوى حبيت فيروز معاها وحبت منير علشانى تعارفى يا نسرين اول من علمتنى بجد انى احب الشعر كانت اول هديه منها ليه فى عينيك عنوانى ديوان فاروق جويده ولازلت محتفظ بالكتاب ده باهداءه وعلشان مستهلكهوش جبت الاعمال الكامله لفاروق جويده وللاسف الشديد اتوفت فى حادثه سير من 11 سنه حكدب عليكى واقولك محاولتس حاولت كتير احب تانى وكنت بوهم نفسى فى الحب وكنت بدور فى كل واحده عليها ومش لاقيها
كفايه انى ااقولك ليه 11 سنه مش عايش



Anonymous says:

سوري على الانونيموس بس مش عايز حد يشوف التعليق علشان بيخص ناس تانية هتلاقيهم فى عالم التدوين معانا
بس انا مريت بالموقف دا مرتين
مرة الموضوع انتهي بكل شياكة اتنين اكتشفوا انهم مش هينفعوا يبقوا مع بعض سابوا بعض ( ولسه اصحاب حتى الان ) ساعتها اخدت وقت كتير جدا علشان اتعدي الموقف وكان بمرور الوقت بتقل الازمة شوية ويروح الاكتئاب بس كان الموضوع محتاج وقت شوية 0

المرة التانية خلص بجرح ودا بردو جالي كتئاب وقرف م الدنيا وكل حاجة بس ساعتها قعدت مع نفسي وفكرت انها ما تستحقش كل الزعل والاكتئاب ولا اي حاجة فى الدنيا متستحقش انى ادفن نفسي علشان خاطرها فلتذهب للجحيم بقي لانها ما تنفعش ازعل عليها ما دام سببتلي الجرح ودا كان اول اسباب اني اخرج م الموضوع 0

يعني اقدر اقولك لو فعلا شخص يستحق الحب بس ما ينفعش نكون لبعض يبقي نسيب بعض علشان دا الصح ومينفعش نكمل فى علاقه مش متكامله م الاول 0

لكن لو الموضوع خلص بجرح فالشخص دا ما يستحقش تنزفي اي مشاعر اسي ولا حزن ولا زعل عليه 0

شوية وقت يمكن محتاجاهم اكتر والدنيا هتكون تمام معاكي إن شاء الله 0



ahmad says:

نسرين حبك الاول هو حبك الخير.. و الحب الي بجد هو الحب الي بيكمل للاخر .. اخر مرة حبيت فيها حبيت بجد. و رغم انه انا الي سبته يضيع من ايدي بس مش عارف لحد دلوقتي اتخطي التجربة و والله عارف كويس انه اجمل قصة حب هي الي لسة انا معشتهاش بس برضه مش هتخطي التجربة الا لما قصة الحب دي تيجي
امتب بقي .. الله اعلم



بنت القمر says:

نوسي
============
هييييييييييييييه
؟ يعني ادعبس في اوضه الفيران عشان اقولك
اعتقد يا حبيبتي ان الزمن كفيل بانهاء كل الجروح ودفن كل الذكريات فقط تطل برأسها بين فترة وفترة طبعا دي الذكريات:)
واكيد بعض القصص مع الوقت ها تقولي ايه الهبل اللي كنت فيه ده؟!
وقد تفسري الامر بكونك فقط مررت بالتجربه لانك كنتي في حاله وحده او غربه او لحظه احتياج:))
!!ومع زوال الاسباب تزول الغشاوة
لان الحب الحقيقي مش بيموت لكن بيشق الارض ويتحدي الصعب ويعيش!! اما لو مات فهو مش ها يكون حب اصلا من الاول
سيبك انتي
ده انا اجوزك سيد سيده
😀
يا رب يعملك كل خير وسعاده ويرزقك اللي يستاهلك



كلام.....لبنات حوا says:

عزيزتى

مفيش حب حقيقى بينتهى وممكن نتخطاه

ويوم ما نعرف ننساه ونتخطاه هنعرف ان الحب ده مش حقيقى وكان وهم

اه بنعيش من غيره ونقدر نعيش من غيره بس بتيجى لحظات بنكون مع نفسنا نفتكر الحب ده وذكرى الحب ده

واكيد اللى بيفشل مش الحب الحقيقى ولو بين اتنين حب حقيقى ومكملش بالزواج يبقا القدر اللى ارادتهم مقدرتش عليه هو سبب عدم اكتماله

سلام



alexandrany says:

Seena

ليس استغرب من هذه المشاعر التي تأبى النسيان وتأبي ان نمحي لحظات من حياتنا كنا نحسبها من اجمل اللحظات التي تمر على الأنسان في مراحله العمرية
بل ما استغرب عليه حقا هو مشاعر الاخر واخلاقه
كيف سمح له ضميره ان يستغل تلك المشاعر ويستبيح برأتها لكي يسلي وقته ويغير موود زي ما بيتقال
هل عندما ينام في اخر الليل يغلبه النعاس ام ان ضميره ي}نبه على فعلته
أظنه ينام وهو مستريح البال هادئ السريرة
اظنه لا يعرف ولا يحس معنى الضمير
وأراني اتسائل
أهذا اللذي كنت أظنه اجمل أحداُ الحياة؟
أهذا الذي كنت أظن انني وهو سنعيش أبد الدهر سويا؟
أهذا الذي سمحت لمشاعري أن تتحرك تجاهه؟

سألت نفسي كثيرا وكل ما حصلت عليه من أجابة هو
أنني أخطأت الاختيار
أذا فهي غلطتي أنا وعلى ان أتحمل نتيجه ما فعلت
تلك هى الحقيقة
ببساطه عاقبي نفسك حتي تنسي ولا أظنك تنسي
فالكل من هذا الكأس ذائق…
ولا يهمك الفرقه للجدعان
ياللا بقي روقي ومن الاخر هو اللي خسران سينا
ياللا مش ناوية تنزلي مصر قريب ولا ايه؟
ههههه
take care about your self



راجى says:

اولا لازم نتفق على انه لايوجد تعريف محدد متفق عليه للحب
فصور واشكال الحب تعد بمقدار عدد الذين خاضوا التجربة او ظنوا انهم خاضوها
وقد يظن احدهم انه مر بتجربة حب ناجحة بينما يرى اخر انها
( نفس التجربة ) فاشلة
وعادة الناس تحكم على تجارب الحب بالنجاح او الفشل حسب النهايات اهى سعيدة انتهت بالزواج ام تعيسة انتهت بالفراق
وهذا فى رايى خطأ كبير فالحب بين الرجل والمرأة او بين الذكر والانثى يمكن وصفه كذلك اى انه حبا مهما كانت النتائج
وقد يجلس فتى وفتاه فى مقهى لمدة نصف ساعة ويشعر كلاهما بتلك الرغبة العاتية فى الحصول على الاخر لان الروحان تلاقيا والجسدان انجذبا ثم يتفرقا فلا يرى احدهما الاخر فتكون تجربة حب كاملة تظل ذكراها خالدة مادام القلب ينبض
وقد يظن اثنان انهما يمران بحالة حب ثم يتزوجان ويعيشا حياة عادية على وتيرة واحدة فيموت الحب المشتعل ويتحول الى مودة ورحمة
وليس من الاخلاقى فى الحب حساب المكسب والخسارة فليس حبا ماكان كذلك فالحب فى بعض التعريفات هو عطاء غير محدود بدون انتظار المقابل
وقد يعشق الفتى فتاة وهو يعرف انه لن ينال منها شيء ولكنه لا يملك ن لا يحبها فهى طبيعته هو وليس للفتاة فضل فى ذلك وقد لا تعلم بحبه لها
وانا ارى من التجارب ان ذكريات الحب يجب الحفاظ عليها فى مكان سرى داخل القلب والعقل فمن العار ان نحول مشاعرنا الجميلة الى ندم وحقد على الحبيب الغادر او المخادع فهى فى النهاية مشاعرنا التى ارتفعت بنا الى مصاف الملائكة لو كنا صادقين
وانصحك بتقبل النهاية باخلاق الفرسان النبلاء وان تحتفظى بجمال مشاعرك فى نفسك لانها كانت صادقه ولهذا فهى نادرة فلا تفقديها ابدا
كما ان الحياة بدون عذاب الحب بصراحة ليس لها طعم على الاطلاق فانا اعتبرك محظوظة على خوض التجربة وكفى بها لتنالى شرف الانتماء الى اصحاب النفوس الشفافة الذين يحلقون فى سماء الحياة



amr says:

atmana en kalami yayfedek ao momkin yekon sabab eno ye5afif 3anik isa ….
te3rafy .. el nesyan dah bgad ne3ma mn rabina 😉 .. we te3rafy kaman .. ew3y fe yom mn el ayam te5ally 7aga tenazil mn karamtik . ay 7aga .. ay sha5s .. mahma kan bey7ibik ao mahma kanet daraget 7obo fe 2albik …… elly bey7eb bey7afiz 3la karamet elly bey7ebo. bs feh so2al … howa yestahel enik tefakary feh tany .. 3ayez a3raf hal howa masalan gara7ik masalan ao 5anik ao kida ..
sada2eny lao 3`alta s3`ayara momkin tesam7eh … wala howa kan le3aby masalan ??? aslo lao howa le3aby we le3eb beiky ao be masha3rik – la 2adar allah- yeb2a mn 3`er tafker … sebeh .. ermeh wara dahrik … ignore him .. we matfakaresh feh b3d kida …. de karamtik ya set el kol … tab3an mafesh 7aga betetnesy fe yom we lila … bs wa7da wa7da … lama tla2y nafsik betfakary feh ….. esh3`ely nafsik … lao lazam el 2amr saketeha :(…… … ana kont ba3mil kida …. sebek menny ana .. sorry 🙂 .. atmana makonshy daye2tik ao tawelt 3liki bs kalamy ……. rabina yewafa2ik
we 5allay balik 3la nafsik ..



جبهة التهييس الشعبية says:

آآآه
انتي جيتي لي انا بقى يا نونة

بصي يا حبيبتي

فيه حاجات تتعمل وحاجات ما تتعملش

الاول ح اقول لك على الحاجات اللي مش لازم تعمليها ابدا وانت لسة خارجة من قصة حب او لسة ما قدرتيش تنسيها برغم ان مر عليها وقت

اولا: اياك اياك اياك اياك
تحاولي تحبي
اوووووووووووععععععععععععععييييييييييييييييييي

اكبر غلط ان الواحد يحاول ينسى الحب بقصة حب تانية
لا ح ينسى الاولانية والتانية دي ح تعمل له صدمة اكبر من الاولانية ليه يا اوختشي

عشان انت دلوقت في حالة حب
الشخص اللي كنت موجهة له الحب والمشاعر دي واللي ابتنت على اساس معرفتك بيه
ده غاب..مشي…فشلتوا..سبتوا بعض

دلوقت المشاعر موجودة بس هو مش موجود
قوم انت بتدوري على هيكل ترمي عليه المشاعر دي
بتعملي احلال وتبديل واللي يحصل انك تلاقي نفسك بعد شوية بتحبي واحد تاني غير اللي انت بتحبيه فعلا

فاهمة حاجة
امممممممم
المهم ما تعمليش كده وخلاص كده غلط على الظلط

ثانيا
ما تعمليش ابدا الحاجات اللي كنتي بتعمليها مع الشخص اللي كنتي بتحبيه
لو كنتوا بتمشوا في شارع معين
بتتفرجوا مع بعض على فيلم معين
بتسمعوا اغنية معينة
كل ده يتلغي دلوقت على الاقل

نيجي بقى للحاجات اللي مفروض تعمليها

اولا
تتعلمي حاجة جديدة

لازم
مش شغل
تعليم
لو ما بتعرفيش سواقة اتعلمي سواقة
لو فيه لغة معينة عايزة تتعلميها اشتركي بسرعة في كورس واتعلميها
ان شالله تروحي تتعلمي تركبي خيل
تروحي تسجلي في دراسات عليا
تدخلي كورس تلات شهور اي حاجة
اقول لك
اتعلمي الة موسيقية

المهم انك تتعلمي حاجة جديدة عليكي خالص
ومش شبه اي حاجة اتعلمتيها قبل كده
يعني لو بتعرفي لغات ما تروحيش تتعلمي لغة تالتة او رابعة
لا
حاجة تكون كلها على بعضها تجربة جديدة خالص

حاجة تكون بعيدة عن شخصيتك ومختلفة تماما عن كل اللي بتعمليه قبل كده
التعليم ح يلهي مخك ويخليكي مش بتفكري كتير

كمان انها تجربة جديدة ح تمتص الانفعال اللي جواكي

ثانيا

كنتي بتعلمي ايه؟
مثلا مثلا نقول
اقول لك انا مثلا
انا كنت باسافر مع طليقي دايما اسكندرية
لا
ما اروحش اسكندرية تاني شوية كده
اروح بلد عمري ما رحتها
مثلا بورسعيد ما كنتش رحتها
السويس
كده

كنتي بتتفسحي معاه في الحتة الفلانية
روحي اتفسحي في حتة علانية عمرك ما رحتيها انشالله تكون بعيدة عن مكان بيتكوا خالص

لو كنتي بتتكلمي معاه على المسنجر ما تفتحيش المسنجر تاني ابدا شوية كده

لو كنتي مش بتتكلمي على المسنجر افتحي المسنجر وارغي مع اي حد

فاهماني؟

ثالثا

عندك سيستم لحياتك او ليومك صح؟

طبعا مش ح اقدر اقول لك غيريه والا ابقى مش واقعية

لكن ضيفي عليه عادة او عادتين جداد مكان عادة انه يكلمك او يشوفك مثلا

مثلا مثلا

مش متعودة تلعبي رياضة
ضيفي على روتين يومك انك تلعبي رياضة خمس دقايق كل يوم

كل يوم حلي مربع سودوكو وتبقى دي عادة تفتحي بيها مخك كل يوم الصبح

وهكذا

ما جراش حاجة لما تلاقي نفسك عايزة تعيطي شوية
تحكي في المحكي شوية
عادي كل ده عادي
ح ياخد وقت وح يعدي و

وح تلاقي نفسك بتقولي: اما انا كنت هابلة
:))



جبهة التهييس الشعبية says:

اه نسيت اقول لك

ما تسمعيش يا اوختشي اغاني عاطفية من اللي بتعيط الواحد

اسمعي اغاني فرايحي
وكل يوم اقعدي ارقصي في اودتك ربع ساعة نص ساعة



Nsreen Bsunee says:

ربنا يخليكم كلكم كلكم فيدتونى جدا ربنا يكرمكم يارب ويريح قلبكم وبالكم

نواره
ربنا يخليكي يا بت يا نواره يا خبره
:))
حأحاول اعمل كل اللى قلتوللى عليه انشاءلله
ربنا يسعدكم يارب ومتزعلوش ابدا من اى حاجه



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: