Nisreen85’s Blog











{April 27, 2008}   SpRiNg TaG

التاج ده من هانم التدوين فرنسا هانم قلت اجاوبه كده بما اننا فى اجازه وحركات انتم يعني اللى فى اجازه عشان هنا انا معنديش اجازات
😦
كل سنه وانتم طيبين
***************

1 / أذكر 10 أشياء عن نفسك
2/ اختر 5 أشخاص تهدى لهم التاج

****************
عشر حاجات عن نفسي ديه حاجه صعب اوى تكون صح 100% اكيد حاجامل نفسي شويه بعد اذنكم

  • مغروره الى حد ما او عندي ثقه زياده بنفسي وبأني صح ويمكن ده نابع من ان معظم الناس بقو زباله اوى فا بالتالى حسيت قد ايه انا كويسه وجادعه ومفيش من اتنين LOL
  • باقبل النقد لو من حد باحبه لكن لو حد مش نازللى من زور بارزعه باللى فى رجللى حتى لو كلامه صح
  • باحب صحابي اوى اوى بس اى حد بيغلط معايا حتى غلطه بسيطه بابيعه او با بيعها فى ثوانى وبابقي قاسيه اوى خصوصا لو حد غالى عليا ومكنتش متوقعه منه الغلط
  • باحب اتبسط واعيش حياتى رغم انى كئيبه اليومين دول لكن حتى فى عز الاكتئاب باحب اهيس واهزر واحاول اعمل كأن مفيش حاجه باضحك على نفسي يعني وباحاول اتعايش
  • بحب امي واخواتى بشكل مش طبيعي يعني ممكن اموت اى حد يزعل ماما والله مره بنت خالتى وهى ست كبيره قد ماما اساسا لان امى صغيره المهم قالت لماما كلام مش ظريف يعني وضايقتها بعديها بثانيه كانو بيحاولو يطلعو شعرها من ايدي :)كان موقف تاريخي باحب افتكره دايما بكل فخر واعتزاز
  • عصبيه ونرفوزه ولسانى طويل واوقات كتير بابقي مفتريه جدا بس مع ناس معينه والله لكن لو حد باحبه بابقي اصفي من اللبن الحليب 0حساسه والله وعندي دم وباتكسف بس مش عارفه ليه اللى يعرفونى عن طريق التدوين مش بيصدقو ان انا كده0
  • بالنوسبه للحياه العاطفيه فا انا بحب بس عندي مشاكل كتير فى العلاقه للاسف عندي امل ان المشاكل ديه تتحل بس لو مأتحلتش فا انا عادي عايشه ومكمله حياتي مش حارمي نفسي من البلكونه يعني بالنسباللى الحياه مش راجل الدنيا فيها مليون حاجه اهم
  • مدمنه بيبسي مش كوكاكولا باكره الكوكاكولا وفعلا فيه فرق بينهم مش عارفه ازاى الناس مش بيحسوه
  • باحب كل ما هو سكندري بدايه من ابو اسكندر الجميل يوسف شاهين لغايه ابو اسكندر المتغرب الكسندريان فار اواى والغالى على قلبي مصطفي كمال-مش اتاتورك – فعلا الاسكندرانيه فيهم سحر وذكاء وخفه دم وصراحه وطيبه ووضوح وفنانيين ولو مش بيمارسو الفن او الكتابه بيكونو ذواقين للفن جدا من اهم الحاجات اللى باحمد ربنا عليها انه خلقنى اسكندرانيه الحمدلله مش عارفه لو كنت قهراويه ولا منوفيه كان حصللى ايه كان حيبقي ابتلاء فعلا 🙂 LOOOL
  • زملكاوووووووووووووويه الحمدلله برضه لو كنت اهلاويه كان حيبقي ابتلاء من ربنا الحمدلله الذي عفانا وهدانا0

**************

التاج ده بامرره لكل اللى عاوزه يالا وكل سنه وانتم طيبين وبالصحه والسلامه

Advertisements


فاتيما says:

نسرين
أنا ملاحظة حاجة غريبة فى التاج دا بالذات
أنه بيخلينا نتكلم عن عيوبنا بمنتهى الصراحة كدا رغم إنه مبيقولش قول عشر عيوب أو اخطاء فى حياتك
بس إحنا مننا لروحنا لقينا نفسنا بنتكلم بكل صراحة ووضوح و جرأة
و موش مكسوفين من بعضينا
دا جميل والله
كأن التاج دا جلسة مصارحة مع الذات
و تحياتى يا حبيبتى
بس اللى هيقرو التيجان دى يا ترى هيبنفع يبصوا فى خلقتنا تانى ؟؟؟



m5m says:

ياشيخة حرام عليكى
بقى لسه رادد عليكى عندى وعند رامز ردود طويييييييييلة
وعمال أقول صديقتى وعزيزتى..ومساحة لود ومساحة العشم
.
.
.
وتطلعى زملكاوية؟
.
.
.
عااااااااااااااااااااااااا
.
.
.
طيب : بيب بيب أهلى…بيبو وبشير بيبو والجون



فرنسا هانم says:

طبعا الاسكندرانيه خفه دم مفيش بعدها
وفن كمان
تاج جميل وصريح
بس بنت خاله امك دى ..هتحرم تانى تتناقش ولو مناقشه مع والدتك فى حضورك
هو مش عيب ان الواحده تحب امها جدا
ده فخر
تحياتى لكى
وعلى فكره وحشانى خفه دمك



mohand says:

هو انتي بتتكلمي عن مين ؟

:D:D:D:D

لو كنتي اهلاوية كنتي هتعرفي معني النصر فعلا

ومعني ان هزيمة واحده تخليكي مضايقه

لكن للاسف انتم اتعودتم علي الهزائم

مبروك عليكي الزمالك



EmY says:

اولآ كل سنه و انتي طيبه

بصراحه انا اشهدلك بطولة اللسان و انك نرفوزه بس قلبك ابيض ما انا لازم اقول كده علشان اخرج من البلوج علي رجلي

فعلآ يا رينا انتي من الناس الي غاليين اوي اوي عندي و بحبك جدآ مش عارفا ليه

انا زيك زملكاويه و بحب البيبسي مش الكولا



FaceMoon says:

كلامك فيه شقاوة كتير يانسرين وفيه تفائل للحياة انا كمان بحب البيبسى تبقى سبيلى حبة
تحياتى ليكى



على باب الله says:

أجدع حاجة أنك زملكاوية

مش تبع نادي الفراولة

إجاباتك جميلة و دمها خفيف

خالص تحياتي



بنت القمر says:

حيث انك مصنفاني تبع كفر ابوطشت مش اسكندرانيه
ومش جايبه سيرتي
وانك بتحبيني موت
يا خاينه
طب انا زعلانه
عاااااااا
وش مقموص
😦



appy says:

انتى قلبك زي قلب الطفل الابيض اللى لسه مش عارف حاجه فى الدنيا بس للي يفهم يا حبيبى

وبعدين ايه لو قهراويه كنتي هتبقى قاهره الناس اكتر ما هما ههههههههههه
عنهزر يا بنت انتى مالى انا الا ليه بتكلم انا عرايشيه بكل فخر ههههههههخخخخخخخخ

يالا سماح بس علشان انا عايشه هناك



HafSSa says:

جدعة يا نيسو
عاجباني اجاباتك و صراحتهم

بكرة تفرج يا جميييل

🙂



alexandrany says:

Seena
بجد والله انا مش عارف اقولك ايه يا بنت بلدي
انا ما صدقتش نفسي لما لاقيت اسمي في التاج
بجد يا سيــنا انا مش عارف اقول ايه
انتي كمان غالي على قلبي يا جميل
اينعم انتي زملكاويه وبتحبي السوبيا ام خطين حمر
🙂
بس ماشي هاعديهالك المرة دي
بس اعملي حسابك المرة الجايه لا يمكن اعديهالك أبدااا
أههه
seeeeena
بجد بجد ميرسي



alexandrany says:

سيييينا صح
نسيت اقولك
كل سنة وانتي طيبة يا عسل
اينعم احنا هنا مافيش لا شم فسيخ ولا سردين ولا رنجه
وكمان مافيش اجازات
بس برضه كل سنه وانتي طيبة
🙂



Nsreen Bsunee says:

فاتيما

فعلا انا حاسه انى بعبعت عن مكنونات شخصيتي المعقده فى البوست ده من غير ما احس اكيد التاج ده مؤامره صهيونيه للتعرف على نفسويات المدونين المصريين واحنا اتلبينا وقلنا كل حاجه
🙂
تقريبا انا اى حد حيقرا التاج مش حيعرف يبص فى وشي تانى

منورانى يا ام يوسف

_______________

محمد

اهلاووووووووووووي يا محمد اهلاوي
طيب قلتللى ليه كنت سبتني مخدوعه فيك يا راجل

يااااااااه انت لسه فاكر بيبو بتاعتكم ديه ديه قديمه اوى

منور

________________

فرنسا هانم

يا حبيبتي كل السواحليه معروفين بخفه الدم بس هو احنا حنيجي جنب دمك الشربات ده ايه يا جميله

بنت خالتى ديه اصلا خلاص متقدرش تفتح بقها تانى وهى فعلا قليله الذوق ومش بتحترم اللى اكبر منها فا كان لازم ادوقها من نفس الكاس صحيح انا زودتها شويه بس هى فعلا تستاهل ضرب الجزمه

🙂

________________

مهند

الله يبارك فيك

_________________

ايمي

والله انتى بنت سكر واحسن حاجه انك زملكاويه
وانا بامووت فيكي والله العظيم

🙂

__________________

فايس موووون

تفائل
لا لا لا لا لا لا
انتى فهمتيني غلط تفائل ايه يا شيخه انا مش كده خالص اعوذ بالله ده انت بنت فقريه ونكديه اخر حاجه
🙂

منورانى

_______________

على باب الله

ايه النور ده كله يارب زيارتك تتكرر دايما ومتحرمناش منها

طبعا زملكاويه طبعا طبعا وبكل فخر
انا تبع الفطره الطيبه فى كل حاجه
🙂

______________

مووون بنت القمر

يا ست الكل انتى على عيني وراسي انتى فى الوسط بين يوسف شاهين ومصطفي كمال
فى الوسط فيه انتى وسيد درويش وطلعت زكريا وكلللللل الاسكندرنيه يعني اكيد مكانش حينفع اكتبهم كلهم يا جميله

🙂

_______________

آبي

حبيبتي انتى فواخريه احسن ناس وعامه مش كل القهراويه وحشين يعني-وش منافق-نياهاهاهاهاهاها

منوره يا بنت
🙂

_____________

صفصف
يا حبيبتي من بعض ما عندكم هو البني ادم المحترم ايه غير شويه صراحه على شويه جدعنه
🙂
يارب تفرج عليا وعليكي وعلى السامعين يارب

______________

مصطفي

بجد عيب يعني هو انت كنت محتاج اعلان رسمي منى على المدونات عشان تعرف غلاوتك ولا ايه
🙂

وانت بالصحه والسلامه يا شريكي فى المهجر الصحراوى

🙂



mohand says:

ارجو المرور علي اخر موضوعاتي في مدونة الباحث عن الحقيقة يهمني رايك
تحياتي



يا مراكبي says:

طبعا فيه فيق بين البيبسي والكولا

الأولى كانت إختراع أوروبي وليها طعم بجد أحلى بكتييير من الكولا

أحييكي على ملاحظتك للحكاية دي



bar2ash says:

ازيك يانسرين
بجد اجاباتك علي التاج دمها خفيف تعبيراتك عفويه تدل علي شخصيه مرحه من الداخل صارمه من الخارج

يانهار ازرق ايه الكلام الكبير اللي انا قلته ده دانا مش فاهمه ههههههه

المهم بجد عجبني ويارب دايما في تقدم

اتمني تشرفيني



حنين القلب says:

السلام عليكم
دى اول مرة ادخل عندك بس مش ملاحظه انك فيكى عيوب لازم تحاولى تغيريها انتى انسانه واضح انك صريحه مع نفسك انما لازم تعرفى انك بنت والبنت ليها حدود فى الكلام يعنى مش الفاظ خارجه ولا تعامل باسلوب خشن وجامد كده
سامحينى بس تعليقك عند فرنسا شدنى انى ادخل واتعرف بيكى ولما دخلت وقريت البوست بتاعك اتعرفت بيكى اكتر ومنك عرفت مميزاتك وعيوبك
اتمنى انك تقبلينى صديقه ومن غير ما تتعصبى ولا تضايقى ولو هتزعلى حقك عليه انا بخاف على شعرى لحسن تضربينى هههههههههههههههههههههههههههه على فكرة انا برضه اسكندرانيه عيب نزعل بعض احنا من بلد واحده
سلالالالالالالالالالالالالام



راجى says:

ربنا يجعلنا من اصدقاءك
:))



بت خيخة وأى كلام says:

بت يا نسرين كفك يا بت على البصرة الفظيعة اللى لاقيتها عندى وعندك
انا كمان مدمنة بيبسى مش كوكا كولا
وفيه فعلا فرق ومعرفش الناس ازاى مش بيحسوه
انا بشرب كوكا كولا لما مايكونش فيه بيبسى على القهوة اللى انا قاعدة عليهاالكوفى شوب يعنى ساعتها بكون مضطرة ابلع بالكوكا كولا خصوصا وانا باكل ساندوتش الفول

ومعاكى حق فعلا الاسكندرانية اغلبهم فنانين
بحس بصراحة ان السبب فى ده هو البحر
اكيد البحر بيعمل جواكم حاجات وبيفجر جواكم كل الفنون الجميلة
بيديكم حاجة كدة مش بلاقيها عند اى حد تانى
انا مش عارفة اوصف الحاجة دى
لكن بحسها اوى فيكم
وكنت بتمنى انى اكون سكندرية
يا بختك يا نسرييييين
انا مش بقر
انا بحسد بس

بقى يا بت هبشتى فى بنت خالتك الست الكبيرة
ده انتى مفترية جدا بجد
بس انا عارفاه برج الجدى
ياخرابى عليه وعلى افترائه
اصل محسوبتك جدى قديم بقالى تلاتين سنة ماشية فى البرج ده
ومافيش حد يفهم الجدى غير الجدى اللى زيه

بس بجد اخس عليكى اخس
طلعتى زملكاوية
وفرحانة كمان
انتى كدة هتفرحى جوزى فيا اصله زملكاوى صميم وانا اهلاوية
ربنا يعف عنك انتى وهو وكل الزملاكاوية يارب
قادر على كل شئ يارب

بس خلاص كفاية عليكى التعليق ده
متنسيش تقوليلى رايك فى الحجاب وتبعتهولى ايميل
يهمنى جدا انى اعرفه
تحياتى ليكى
اختك خيخة



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: