Nisreen85’s Blog











{April 17, 2008}   انا مش فى انتظارك

يا ترى فيه حاجه فى ماء الشرب بتاعه النيل هى السبب فى ان البنت\الست المصريه فى حاله انتظار دائم لشئ او لشخص ما يا ترى تم برمجتنا على وضع الوايتينج ده من زمان ولا ديه حاله جديده على الجنس الناعم المصري0

اى كان اصل الحاله او سببها فا هى موجوده بشكل بشع مقزز لدرجه ان البنت المصريه بقت محصوره فى نموذجين اوتلاته اما بنت هادئه الطباع ملتزمه لا تعرف شئ عن العالم الخارجي منتظره عريس او بنت فاكره نفسها متحرره بتروح الكليه عشان تستدرج عريس بتتصفح الانترنت عشان تستدرج عريس بتزور صحباتها عشان تستدرج عريس عندها موبايل عشان تستدرج بيه عريس بتمشي فى الشارع عشان تستدرج عريس بتاكل وتشرب وتتنفس عشان تعيش لغايه ما العريس ييجي وطول الوقت هى فى حاله انتظار لان اى واحد من اللى هى استدراجتهم يقرر انه يكون عريسها00مسكينه الله يحرقها

النماذج ديه هى الاغلبيه الساحقه الماحقه من البنات فى مصر للاسف وفى الوقت اللى باشوف فيه كل صحابي اللى فى سني واصغر بشويه كمان بيتجوزو من رجاله فوق الاربعين من نوعيه أ قرع وبكرش الاقي واحده سيده جميله فى الخمسين من عمرها بكل قوه بتتخلى بكل ارادتها مش عن ضل راجل لا عن راجل زوجها لعشرين عاما اعلن على شاشات التلفزيون انه يحبها واهداها قصر الاليزيه ورئاسه الجمهوريه والسلطه والمكانه الاجتماعيه

سيسليا هى النموذج المضاد بشكل صارخ لنموذج البنت او الست المصريه سيسليا لم تنتظر من ساركوزى ان يحقق لها ذاتها بالعكس هى لما حست ان وجوده كرجل فى حياتها اصبح بيرهقها وبياخد من اعصابها اديتله ضهرها من غير ما تكسر قله ولا حتى ازازه شامبنيا وبعتتله اوراق الطلاق مع المحامى وصرحت بكل بساطه ان

“نيكولا اصبح يعانى مشاكل سلوكيه لا استطيع تحملها ولا اعتقد انى املك القدره على تعديل سلوكه لذلك لا يمكن ان استمر
نيكولا لم يعد يشعل شعله قلبي ، احب ريتشارد لكنى لا اغادر بسبب حبي لريتشارد فقط ولكن احتراما لذاتى لا استطيع ان اتقبل طفلا من اخري مثل دانيال ميتيران
ريتشارد عطيه هو الراجل اللى ارتبطت بيه سيسيليا حاليا مستقره نفسيا وعاطفيا وقويه لم تهتز صورتها ولو للحظه فى حين انخفضت شعبيه ساركوزى بعد الطلاق وحسب اقوال المقربين منه “فقد نيكولا عموده الفقري بعد انفصاله عن سيسليا”
انا شبه متأكده ان لو سيسليا انفصلت عن ريتشارد مش حتنكسر او تنهار زى ما بيحصل مع اى واحده هنا بتقطع شرايين ايديها او بتاخد علبه حبوب منومه او بتولع فى نفسها بالجاز بتاع الوابور حسب الطبقه الاجتماعيه اللى هى منتميه ليها
لان ببساطه سيسليا كيان مستقل فى حد ذاته مش منتظره من حد انه يكملها مش منتظره من حد انه يحسن مظهرها الاجتماعى مش منتظره حد يحسسها بالثقه والرضا عن نفسها مش منتظره من حد يحميها
احساس جميل بالامان انى اكون مش منتظره حد بيتوقف عليه وجودى
لانى فعلا موجوده انا مش انفزيبل ولا خيال على الحيطه انا موجوده لحم ودم وعقل وروح ولو قررت انى مش موجوده وانى خيال على الحيطه حافضل طول عمرى خيال على الحيطه0

نُشرت في:مصر الجديده

مجله الكترونيه مصريه ليبراليه تصدر شهريا


mohand says:

اختلف مع حضرتك اختلاف صغير

كون الذكر او الانثي منتظر الشخص الاخر في حياته او حياتها

دا مش مخعناه انه هو اللي هيحقق ذاته او ذاتها

يمكن اكون مفهمتش المغزي اللي تقصديه

بس انا اقصد ان مش بس الانثي بتنتظر الرجل المناسب في حياتها الذكر ايضا

اما لو كان قصدك هو انها جعلته الهدف الاسمي والاساسي في حياتها وكل شئ من بعده مالوش لازمة
دا اللي ممكن اتفق معاكي عليه

بالنسبة لانتظار النص الاخر او العريس

كل البنات في العالم كله نفسها في الفستان الابيض والفرح والحاجات دي

مش بس المصرية او العربيه او الشرقيه

تحياتي



Desert cat says:

بصى يا رينا طول ما احنا لاغيين عقلنا ومشاعرنا وماشيين وار اقاويل الله يرحمها ستى زمان
وعمتى من ايام الفراعنة وخالتى منذ فجر التاريخ
هنفضل على الويتنج
وهتفضل البنت تابع
واللى اتاخر سن جوازها يتقال عليها عانس واللى اطلقت يبصوا لها الكلاب على انها فتاة ليل
للاسف انتى فى مجتمع عايز كله يتولع فيه لان المفاهيم كلها مغلوطة
تحياتى



Guido says:

حبيت بس أرحب بالعودة الميمونة، وأقول حمد لله على السلامة، وسأعود للتعليق على الكلام الكبير ده لاحقاً
🙂



Nsreen Bsunee says:

مهند

عشان تفهم قصدي كويس ياريت تجاوب بكل صراحه عن السؤال ده

انت مش حاسس انك -كراجل-هدف كل يوم لواحده شكل عاوزه عريس وخلاص؟
فى علاقاتك مع الجنس الاخر مش دايما بتحس ان فيه مصيده بتختلف الطريقه من بنت لبنت حسب المستوى
لكن المصيده دايما موجوده والبنت بتستعد للانقضاض مجرد ما كعب رجلك يلامس طرف المصيده؟؟

جاوب وحتفهم قصدي



Nsreen Bsunee says:

نانا

لعلمك من فجر التاريخ وايام الفراعنه مكنوش بيفكرو كده

يا بنتى ده فى السبعينيات الست كانت معززه ومكرمه اكتر من دلوقتى

وصدقيني والله مش قادره اعيب على الناس والمجتمع لغايه وقت قريب كان ممكن اعتب عليهم لكن مع شويه تفكير والله حتكتشفي ان العيب فى البنات نفسهم اصلا انا باشوف حالات مستعصيه تقرف وحياة ربنا فيه بنات تجيب شلل نصفي لو ركزتى مع تصرفاتها

البنت فى الاول والاخر هي اللى قادره تعزز نفسها او تهين نفسها سواء كانت فى فرنسا او فى الامارات او فى روما او فى مصر

الكرامه ملهاش جنسيه يا بنتى

🙂
نورتي يا بنت



Nsreen Bsunee says:

ايه ده

والله العظيم كنت بارد على تعليق مهند وباكتب اميل على التاب التانى عشان ابلغك انى بالعب فى المدونه وكده

🙂



Mohamed Shedou محمد شدو says:

اولا حالة الانتظار دي حالة او مرض نفسي انساني مش في الجواز بس ومش عند الستات بس
الانسان المنتظر هو انسان مؤجل لحياته حتى حدوث شيء معين
يقول لما اتجوز هعيش وتبقى حياتي مظبوطة
لما ابقى غني
لما الاقي الشغل الفلاني
الخ
الحالة دي نفسها بغض النظر عما هو ما ننتظره هي حالة عجز والانسان المفروض يعالج نفسه منها

بالنسبة للجواز فافضل جواز هو جواز المكتملين
يعني مش المفروض نتجوز عشان نحل مشاكلنا النفسية
لكن الاول نحس اننا فعلا ناس مكتملين وعايشين حياتنا الحقيقية
ساعتها بس ممكن نتعرف على الشريك المناسب لنا
لان طول ما احنا في حالة عجز وانفصال عن ذاتنا مش هنكون قادرين اساسا اننا نلاقي الشريك المناسب لنا
وساعتها بقى نلاقي الشريك اللي مش هننفصل عنه بجد
لان الطلاق لما ييجي بعد سنين ده معناه ان الزواج ما كانش سليم من الاول
ما كانش بين شخصين متوافقين بشكل حقيقي



mohand says:

اقولك الحق

اه بيحصل

بس مش بالكم الفظيع ده

اللي انتي متخيلاه

ويمكن بيحصل معايا عشان انا وسيم شويه

ههههههههههههههه

بهرج
اقصد ممكن يحصل من الولد كمان

في بنات تلاقيهم اي ولد يتعرف عليهم مثلا يبقي هيموت ويرتبط بيهم

دي بنحصل

انا اللي اقصده انه مش بس الانثي الذكر كمان

وزي ما فيه حالات كده هنا في هناك برضه

عارفه مين اللي بيعمل فرق بين الرجل والمرأة

هي اللي بتعمل الفرق ده

منتظر الرد ويا رب اكون فهمت



Nsreen Bsunee says:

محمد

الله ينور عليك والله كلامك افضل من البوست نفسه

نورتنى يا محلاوي
🙂



Nsreen Bsunee says:

مهند

فى الغالب وحسب تجارب عشتها او شفتها الولد لما بيعجب ببنت وبيحب يتعرف عليها بيكون يا اما لغرض غير شريف وده سيبك منه مش مجال مناقشته

يا اما عشان يشوف حيحبها حتنفع مناسبه حيتفقو حيتفاهمو
طيب ممكن؟؟

يعنى فاهم اقصد ايه

اما البنت بقي واللى انا باتكلم عليه انها حتى لو مش مناسب حتى لو مش نافع بتمسك فى زماره رقبته

فاكر الشخصيه الكوميديه اللى كانت زى الديناصورات فى الافلام العربي القديمه للبنت اللى عاوزه اى عريس تمسك فى زماره رقبته
“متطخهوش يا بوي عريس يا ابوي”

اكيد فاكر

زمان ديه كانت حاجه نادره وبتضحك دلوقتى بقي 99%من البنات كده

عاوزه عريس وخلاص حتى لو مش مناسب حتى لو مش مرتحاله بتعصر على نفسها لمونه وتكمل
حتى لو مش متفاهمين بتمثل عليه الحاجات اللى تفتكر انها حتبسطه

والله انا مش بابالغ بس انا مصدومه ليه البنت مش بتعزز نفسها وليه مفيش ثقه فى النفس للدرجه المُهينه ديه

اعتقد فاهمين بعض
🙂



S H A H says:

نسرين
انا جالي اكتئاب
بعد ما كتبت الكومنت و حطيت فيه كل مشاعري و احاسيسي الجهاز هنج و انا بعمل سيند
:((((((

ماشي يا ستي نكتب تاني

اولا حمدالله على سلامة الوصول -البلوج كان مضلم بجد و كئيب كل ما اشوفه مغلق

ثانيا غيري اللون الاسود عشان الكابة
ثالثا
انا معترض ان النيل يكون ليه دخل في موضوع النماذج ده

اعتقد ان الشمعدان ليه دخل كبير هوا و بيمبو

و انا في انتظار نموذج البنت الرابعة

و سلام مؤقت

و

بس



S H A H says:

ردا على تعليقك لمهند:

أنا مستهدف



Sharm says:

هو راجل يستاهل الحرق اصلا , خسارة فيه سيسليا



la3lahakhier says:

تحية كبيــــرة



Whispers just for a Night says:

السيدة الكريمة

تابعي على مدونة قولاً سديداً رد الحكومة الهولندية على حملة المدونة لدعوة الحكومة الهولندية لسن قوانين ردعية تمنع حدوث الإستهزاء بالمقدسات الدينية ورد المدونة عليهم على الربط التالي
http://kawlansadida.blogspot.com/2008/04/blog-post_18.html

وجزاكم الله عن نبيكم خيراً



فاتيما says:

يا نسرينا
انتى بتتكلمى عن أمراءة من ثقافة آخرى
من حداثة سنها مستقلة و عندها هدف تغير حياتها و تعمل مهنة و ضمانة و بتدفع تمن دا عشان متبقاش تحت رحمة حد …و اذا دخلت فى شراكة و لقت الشريك بيجور على حقوقها بتفض الشركة و تقوله مع السلامة و الخسارة القريبة أرحم من الخسارة البعيدة …
على فكرة البنت فى زماننا الحالى اتغيرت و مبقتش زى ما بتقولى ..
رمى الشباك و المصايد دى بتبقى فى سن معينة و مرحلة معينة و لفئة معينة
انما الغالبية ما زالت تفضل العنوسة على أن تبقى فى ضل راجل
عشان مع إحترامى للسادة الرجال خاصة الناس الحلوة اللى اعرفها فى المدونات الحبيبة لقلبى …
بس الحيطة فى احيان كتيرة بتبقى آءمن من الراجل …و لو حتى اتهدت على دماغى ..ضررها بيكون أخف
تحياتى يا عزيزتى



محمد عبد الغفار says:

فى مجتمعنا
المرأ من الضئالة حتى انها لا تظهر للعيون الا ان كانت تحت ظل رجل

ولكن

فى الوقاع
ان الرجل لا يُكَوِن ظل الا اذا سقط عليه نور المرأة



Nsreen Bsunee says:

شاهرام

انا بحب البيمبو على فكره طول عمرى
🙂
يبقي هو الشمعدان مفيش غيره

لو انت مش حتستهدف مين اللى حيستهدف يا قمر
:)))

****************

احمد-شرم

ممممممممممممممم
شكلك معجب بسيسيليا وده فى حد ذاته شئ جميل لان مش اى راجل بتعجبه الست القويه

***************

لعلها خير

تحيه اكبر ليكي يا فندم

*******************

ام يوسف

منورانى طبعا ديه اول حاجه

انا لغايه دلوقتى ملقتش راجل افضل من الحيطه
🙂

******************

استاذ محمد عبدالغفار

تعليقك مميز جدا جدا وكل شويه اقراه من جماله بجد
نورتنى



S H A H says:

و البيمبو برده بيموت فيكي



Nsreen Bsunee says:

شاه

🙂



appy says:

ايه ده انتى فتحتى الدكانه من غير ما تقولى طيب ليا عندك حق
المهم تعالى بقى للبوست انا مش هستنى بصى يا رينا احنا بهدلنا كرامتنا بجد والشوباب يا بنتى فاكرين نفسهم خلاص البنت هتموت عليهم ميعرفوش انها ممكن تقول باى ووقت ما بتقول باى بتهد الدنيا بس دى اقليه هههههههه
وبعدين استنى ايه التلات امثله دول دى انتى حسستينى انى قاعده اعمل كمين طول اليوم ولا البنات ههههههههههه
لا يا رينا طبعا مش مختلفه معاكى انك كلامك صح فى النماذج هههههههههه
اقولك على اللى بتكسب زى صديقى اللى اتجوز عن طريقه المخدماتى جاب له واحده من عيله اللى هى قافله على نفسها دى وقالك ايون هى دى الجوازات المؤدبه
الا قوليلى هو ليه فيه جوازات مؤدبه وقليله أدب
المهم بقى هو كوزى ده مش لسه متجوز طيب والله طلعت كويسه وانا معاها فى اللى هى عملته
بجد ونفسى نبقى كده عارفه يا رينا احنا حتى فقدنا حته الاحترام عند الانفصال
عموما انا هعمل زيها بس
لما اتنيل
الا معندكيش طريقه نطفش بيها اخينا دلوقنتى ههههههههههههههههخخخخخخخخخ



Nsreen Bsunee says:

حبيبه قلبي أبي

طبعا انتى اكتر واحده عارفه النوعيه اللى باتكلم عليها

فاكره كده واحده عرفتك انتى شخصيا وعملت صاحبتك عشان توصل لمعارفك وصحابك وتخطف منهم اى هريس واول ما لقيته بقيتي انتى وحشه وكخه

فاكره طبعا
“وش بيغمز”

🙂



Eng.Omar says:

سيسليا نوع نادر من البشر
تستحق ان ترفع لها القبعه



haneen says:

ازيك يا نسرين وحشانى قوى

انا من الناس اللى بحترم الشخصيات النسائيه الحديديه اللى زى سيسيليا كده وبعجب بطريقة تفكيرهم واستقلاليتهم وبتمنى من الله ولا يكتر على الله انى اشوف نماذج زيها كده عندنا فى مصر او فى العالم العربى حتى ،لكن للاسف الست او البنت الشرقيه يا نسرين بقت زى النموذج اللى انتى ذكرتيه هنا عايشه علشان تلف حوالين مدار الراجل وهو بقى محور حياتها واهتمامها من ساعة ما بتتولد ، ودايما عندها احساس انها بتبقى ناقصه من غيره والتربيه اللى اتربينا عليها هى اللى زرعت جوانا التصور المريض دا ، وما اعتقدشى انها ممكن تتغير بسهوله لانها للاسف بقت راسخه جوا عقولنا الفاضيه ومحتاجين ولا 200 سنه كمان علشان نغيرها

لكن بجد يا رينا بوست فكرته جديده وجريئه

خالص تحياتى



appy says:

ايوة يا رينا انا كخه ووهشه مش وحشه على راى ايمو ابن اختى
بقيت من الاعداء يا اوختشى اللى بيجاهدوا ضدهم
وجيتها نيله وخيبها هى خدت حاجه عدله دى خدت فرده شارب مقلوب ههههههههخخخخخخخخخخخخخخخ
وش بيرقص ودانه



Soooo says:

ارجعي لاصل التربيه هتلاقي انه هو الغلط
ليه بقى
اي حاجه تلاقي البنت اقل فيها من الولد
لو الولد نجح يجيبوله عجله ولا عربيه لما يكبر .. لما البنت تنجح يقولولها مبروك وخلصنا
ولو قالت اشمعنا تبقى وقعتها سوده
اخوكي ده راجل
انما انتي بنت ومسيرك لبيت جوزك

من هنا بيبقى عندها رغبة في الهروب من بيتها ومن احساسها بالقهر عن طريق انها تتجوز وبس على كده خلصنا

يبقى الحل في ايدين الجيل بتاعنا ده
اننا نسك على بناتنا .. بس نديهم المفتاح .. على رأي فؤاد المهندس

سلاموووووووووووز



راجى says:

نسرين ، المقارنة بين البنت المصرية المحافظة على عفتها ودينها وتنتظر العيش فى اطار شرعى وبين سيسيليا وكارلا برونى وامثالهن ظالمة جدا للبنت المصرية
طبعا انتى عارفة ان سيسيليا اصلا كانت زوجة لصديق ساركوزى المقرب عندما صارت عشيقة ساركوزى الذى تعددت علاقاته بعد الزواج وهى ايضا كذلك وطبعا لسنا هنا فى موقف القبول او الرفض لسلوك النساء الغربيات بل فقط اكرر ان المقارنة ظالمة للبنات المصريات
وايضا احب اقول ان مؤسسة الزواج لم تزل وستظل لها بريقها ليس فقط فى بلادنا ولكن حتى عند سيسيليا وساركوزى وكارلا برونى

الحمد لله انك رجعتى تكتبى تانى وعاوزين نعرف اكتر عن المجلة الالكترونية الجديدة



DantY ElMasrY says:

من شهر تقريبا كنت راكب تاكسى وقت ما كان ساركوزى مع سيسليا فى شرم
السواق كان ممتعض جدا على استضافة الحكومة لسيسليا مع ساركوزى رغم انهم لسه ماكتبوش كتابهم
واتهم حسنى بالإنحلال لأخلاقى
تفتكرى سيسليا لو عرفت كلام زى دا هايكون ردها إيه ؟



مفقوعة مرارتي من حماتــــــــــــي says:

البنت المصرية …بجد بتصعب عليا
دي حتي لو بتشتغل بيفضل حالها يقول
أنا في إنتظارك مليت
ها كلنا لها



Nsreen Bsunee says:

عمر

فعلا
منور

*************

حنين

انتى كمان وحشاني ياقمر
ربنا كبير بس الحاله مستعصيه الى حد كبير جدا

************

ابي

فرده شرااب مقلوب
اخس عليكي زعلتى الشراب

خخخخخخخخخخخخخخخخخخخخخخ

***************



Nsreen Bsunee says:

سووووو

ونسك ليه ومفتاح ليه
نربي صح ومالوش لازمه اى مفاتيح

منور

*************

استاذ راجي

المجتمع وتقاليده بتختلف اه
لكن الست اللى عندها كرامه واستقلاليه وعزه نفس مبتختلفش حسب المجتمع اللى هى فيه هى بتفضل عندها كرامه وميهونش عليها تهين نفسها اى كان المجتمع اللى هى فيه

زوجه فرنسوا ميتيران قبلت على نفسها الاهانه بدافع الانكسار والحب لميتيران

وهيلاري كلينتون قبلت الاهانه بدافع الحفاظ على لقب مسيس كلينتون ولدوافع تانيه كتير واضحه دلوقتى

لكن سيسيليا مقبلتش ده
من منطلق وجهه نظرك وهى اصلا كانت فى علاقه حب مع ريتشارد وبما انه مجتمع مش مؤيد بقوانين العفه اللى عندنا يبقي مكانش له اى لازمه انها تتنازل عن وضعها كسيده اولى لفرنسا وتتجوز الراجل الى هى بتحبه

بس هى مقبلتش على نفسها كده رغم انها معندهاش القواعد والتقاليد اللى بتقيد حرياتنا هنا لكن هى اتصرفت فى النور وده كفايه عندي عشان احترمها هى افضل مليون مره من ملايييييييييييييييين البنات اللى باشوف عيناتهم كل يوم فى مجتمعاتنا

🙂

المجله اسمها مصر الجديده مجله ليبراليه الكترونيه مصريه تصدر شهريا بنكتب فيها انا وحفصه ورامز وابو فارس ود\اياد وناس تانيه وعلى رأسنا الاستاذه فانتازيا هانم

*******************

دانتى

انا كمان كنت ممتعضه وقتها مش لشئ غير التركيز والاهتمام الاعلامى والحكومى بزياره نيكولا وصديقته كنت افضل انهم يعاملو على انهم زى اى سياح عاديين جايين يستجمو لانها فعلا كانت كده ومكانتش زياره رسميه

بالنوسبه لسواق التاكسي و رد فعل نيكولا او كارلا بروني اللى كانت هنا معاه فى مصر-مش سيسيليا -فا انا معنديش فكره عن الاوبجيكشن عندهم فى فرنسا شكله عامل ازاى ويا تري زى عندنا هو عباره عن صوت مش ظريف يصدر من الانف تصحبه بعد الكلمات الخارجه تعبيرا عن الامتعاض والسخط ولا لأ
بس اكيد رد فعلهم حيكون من النوع ده

!!!!!!!!!

منورنى يا استاذ دانتى

**************

مفقوعه مرارتها

سلامه مرارتك اولا وانشالله مراره حماتك يارب

منورانى يا ستي ومش كلنا لها انشاءلله

🙂



Fantasia says:

المشكلة مش في مية النيل, حتى اللي بيشربوا مية معدنية هتلاقيهم خيبة قوية

المشكلة في الدماغ والتربية والمناخ العام والصورة السلبية اللي لازم الست تعكيها عن نفسها عشان تثبت قدام المجتمع انها ست مصرية بحق. قال يعني لو بقى عندها شخصية هتقلب راجل

شوفي البنت في فرنسا بتتربى ازاي وعندنا بتتربى ازاي. عندنا مافيش حاجة اسمها مرأة قوية. عندنا مقولة هبلة بنت كلب بتقولك “قوة المرأة في ضعفها”.. بالذمة عمرك شوفتي جملة بالهطل ده؟ واللي بيقولوها يحسسوكي انهم بيقولو درر, مش بيهفلطوا بكلام مالوش معنى

المرأة الضعيفة هي مرأة ضعيفة وذليلة ومعدومة الكرامة. واللي تقبل تكون ضعيفة وتستلذ بإهانة المجتمع ليها تستاهل انها تعيش ذليلة للراجل

مقال رائع يا عزيزتي ومقارنة في محلها



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: