Nisreen85’s Blog











{January 24, 2008}   كل سنه وانت جو

لقد وجدت يا جو فى الجزء المضئ من خيال محمد المصرى كلمات ترقى لمستوى الاحتفال بميلادك فاسمحللى ان اتوج بها احتفالى البسيط بك لانها اجمل واوقع مما حاولت ان اقوله

في يوم من الأيام .. كان فيه شاب شاف الدنيا مقفولة وخنقاه هو واللي حواليه .. لمهم وقال : هجيب لكوا مفتاج الفرج ، قالوله اصحابه وحبايبه وكانوا كتير : خد كل اللي حيلتنا .. حد قلوبنا معاك ، الشاب ده كان اسمه …. “جايز كان ليه أسامي كتير يا جو .. من ضمنها إن كان اسمه يوسف شاهين” بس لازم تعرف إن اللي عايز يوصل القمر يقدر يجيب الباسبور ولو من بق السبع “وجبته وسافرت وجيت وعملت خمسين سنة سينما من أعظم اللي شفته في حياتي : ” كان وعد منك .. كان حلم منا ، قالت الشفايف .. شافت عيونا “أفتكر إن ده من أكتر الناس اللي علمتني إزاي أعيش حياتي .. ولسه بتعلمني ، من فترة قريبة جداً اكتشفت إن فتاة أحلامي هي ( تفيدة ) في عودة الابن الضال ومش حد تاني .. وإن أصدق كلمة وطنية سمعتها كانت من يحيى في وداعاً بونابرت “مصر هتفضل غالية عليَّ” .. جمل كتير من أفلامه بتنط على دماغي في مواقف مختلفة وتجربة حياة بتخلق بالنسبة لي علامات على الطريق ” أنا بقى غيرك وغير أي حد ، أنا رايح القمر .. أشوف الدنيا من الناحية التانية “كل ده في نقطة الحياة .. شاهين كبني آدم ، لو اتكلمت عليه كمخرج عظيم خد وتأثيره في تاريخ السينما .. يتقال كلام كتير أوي عن واحد من أعظم المخرجين اللي شفتلهم أفلام بشكل عام – مش بس المصريين أو العرب -” وإلا فمن ذا الذي يرضخ طائعاً لسياط الزمان ومهانته ، ويتحمل ظلم المستبد وازدراء المتغطرس وأوجاع الحب المستنكر ومماطلة القضاء وصلافة تأويل المناصب ، في حين أنه يملك القدرة على أن يحقق الراحة الأبدية ، بطعنة من خنجر مسلول في يده ، لولا الخوف من أمر ما بعد الموت “تفتكر ليه انتَ لسه ماسك في الدنيا لحد دلوقتي ؟؟ خوف من الموت ؟؟أفتكر لأ .. أعتقد إنه حب في الحياة أكتر من أي حاجة عجَّزت ؟؟”اللي قلك كده ضحك عليك ده جمالك يبان جوا عنيك” – سامعه يا ست نسرين -:)رغم أي حاجة .. رغم أي حزن أو ضيق .. رغم أي هبل وعبط عملته انتَ .. رغم أي زعل” نبض قلبي متقسم بيني وبينكواللي تشوفه عيني لازم بالضرورة تشوفه عينك “كل سنة وانتَ طيب يا واد يا إسكندراني

من نور خيال محمد المصرى

  • شخصياتي بيمثلوا أحسن من اللي كانوا بيمثلوه مع أي حد .. محمود المليجي فضل 30 سنة بيضرب الناس طب ازاي عرفتوا إنه ممثل كويس ؟! لما اشتغل (الأرض) ..في وقت معين ربنا بعتلي حد زي محسن محيي الدين كان حساس وهايل وكان أحسن مني ، كان عنده حتة الحساسية اللي موجودة في العنين فكان فيه تواصل بيني وبينه . كنت لما أقول ستوب وأبصله كان يقوللي : خلاص عرفت ، ونعيد الشوت ، ويعمله كويس جداً ؛ مكنتش بحتاج أقوله أنا عايز إيه أو الغلط فين .. بمجرد ما أبصله يفهم . أنا باخد موهبة وأوجهها ، أنا مبخلقش موهبة .. عشان كده بالصبر أقدر أطلع كل حاجة جواه”
  • لا تجعلوا السيرة الذاتية سجناً يوضع فيه الفيلم ولا يُرى إلا من خلاله .. نعم هي سيرتي الذاتية ، ولكن كل فيلم من أفلام كل مخرج هو على نحوٍ ما سيرة ذاتية . سيرة اللحظة التي صور فيها المشهد ، وانعكاس للحالة أثناء التصوير
  • (إسكندرية كمان وكمان) إعلان عن الذات .. فضح الذات .. هو أوهامي .. اختبار أوهامي .. معرفة هل هي أوهام !! .. تقول إن عنوان فيلم (كيروساوا) الجديد : (عشرة أحلام) . برافو عليه . فيلم عن أحلامه وهو في السبعين من عمره أو أكثر . إنه الموضوع الوحيد الصحيح بالنسبة إليه الآن ، وبعد كل ما قدم من أفلام .. لقد اخترتُ أيضاً الموضوع الصحيح وحديثي إلى الشباب . أنا لم أنجب ذكوراًَ ولا إناثاً ، ولكني أشعر بالأبوة تجاه (يسرا) كما شعرت بها من قبل تجاه (محسن محيي الدين) ..ليست الأبوة تماماً ، ولكنه شعور بالمسئولية المقترنة بالحب . أتضايق جداً عندما يُقال ماذا قدمت الأجيال الجديدة .. لا روائي منذ نجيب محفوظ ، ولا مغنية منذ أم كلثوم ، ولا مخرج منذ فلان أو علان . هذا غير صحيح .. وإن كان صحيحاً فاللوم على نجيب محفوظ وأم كلثوم ، وإذا لم يكن هناك صلاح أبو سيف جديد أو توفيق صالح جديد فأجيالنا قد فشلت إذن .تعبت جداً .. 12 أسبوع تصوير ، وملايين صُرفت ، ولكنه إرهاق لذيذ جداً .. الأشد إرهاقاً كان التمثيل : تمثيل دوري في الفيلم ؛ كما أنني قمتُ بالغناء أيضاً .. كان (يسري نصر الله) وراء الكاميرا وأنا أمامها في معركة بكل معنى الكلمة . لا أستطيع أن أمثل وأخرج في نفس الوقت ، ولكن كان لابد من ذلك .. الفيلم كله عن المستحيل .. المستحيل في صور
  • شاهين يستطيع أن يضع السماء بكل اتساعها في غيمة واحدة أحياناً ، وأمطار الدنيا كلها في كأس رقراقة شفافة من من الكريستال وعيون نساء الارض فى نظره وشبق الدنيا فى قبله”د0رفيق الصبان
  • كل سنه وانت طيب كل سنه وانت مدهش ومجنون عجزت بسرعه اوى يا واد يا اسكندرانى الدنيا محتاجاك 80 سنه كمان يا جو0


يَحيى المِصري says:

كل سنة و إنت طيبة يا نسرين

و يا ناس ياناس يا مكبوتة
هي دي الحدوتة
حدوتة مصرية



HafSSa says:

كل سنة و هو طيب و اللي جابلك يخليلك يا اختشي



يا مراكبي says:

إسكندرية كمان وكمان

قمة الفلسفة السياسية اللي شفتها في حياتي .. وبالذات الأغنية اللي كانت بتتكلم عن الإسكندر الأكبر هند تنصيبه إله

تحسي إنها أغنية ل2007 أو 2008



Anonymous says:

طول عمرى بستغرب من الراجل ده
وانا صغير
كانوا بيقولوا لما تيجى افلامه ده متخلف
مش فاهمين حاجة
ورغم انى وانا صغير
🙂
ماكنتش بفهم حاجات افلام معينة ليه
بس كنت بحب اتفرج عليه
كنت بعوض دى بانى اخد باللى من كل
لديالوج
وكل منولوج
بلاقى فيه كلام فى الجون
وابتديت اركز على تمثيل الناس اللى معاه
ودلوقتى ابتديت افهم افلامه
وكنت فرحان اوووى
انى ماضيعتش تركيزى مع واحد اهبل زي ما قالولى
طلع حد بيفهم

افرح يا محمد يا مصرى
ادينى قولتها

” على فكرة “
مابحبش اسم جو يتقاله
بحس يحيى افضل

مصطفى اسماعيل



فرنسا هانم says:

لا لا
دانتى باين عليكى دماغ
ودماغ جامده كمان
والمشوار اللى خدته بالعجله من السويس لهنا طلع بفايده
انا سعيده انى اتعرفت على مدونتك
وسعدت بردودك على التاج بتاع مجلس الشعب
فيه كتير من السخريه الباكيه



appy says:

انا بجد من عشاق يوسف شاهين على الرغم انى الحمد لله مش دايما بفهم افلامه حتى هو احيانا مش بيفهماها بس مننكرش انه عمل ممثلين كتير وطلع مواهب حلوة وهو بجد حد كويس كان نفسى يدرس لسه فى الكورسات بتاعت الاخراج بتاعتى بس مكنش فاضى
كل سنه وهو طيبه
وانتى كده على طول تحبى اسكندريه والاسكندرانيه



محمد المصري says:

تصوَّري نسيت !
المشكلة إني لو كنت افتكرت مكنتش هعرف أقولهاله باحتفاء زي كل سنة لإني فعلياً لسه زعلان منه ومش هعرف أضحك على نفسي ، بس كوني أنسى ده ضايقني ، يمكن لإن بقالي تلت سنين بكتب عنه يوم عيد ميلاده .. ويمكن لإن فيه بوست طويل جداً كنت كاتبه عنه من فترة وكان ممكن أفكر أنزله لو كنت افتكرت !

مش عارف فعلاً أنا الأوحش ولا هوَّ !

” في يوم من الأيام .. كان فيه شاب شاف الدنيا مقفولة وخنقاه هو واللي حواليه .. لمهم وقال : هجيب لكوا مفتاج الفرج ، قالوله اصحابه وحبايبه وكانوا كتير : خد كل اللي حيلتنا .. حد قلوبنا معاك ، الشاب ده كان اسمه …. “

جايز كان ليه أسامي كتير يا جو .. من ضمنها إن كان اسمه يوسف شاهين

” بس لازم تعرف إن اللي عايز يوصل القمر يقدر يجيب الباسبور ولو من بق السبع “

وجبته وسافرت وجيت وعملت خمسين سنة سينما من أعظم اللي شفته في حياتي :

” كان وعد منك .. كان حلم منا ، قالت الشفايف .. شافت عيونا “

أفتكر إن ده من أكتر الناس اللي علمتني إزاي أعيش حياتي .. ولسه بتعلمني ، من فترة قريبة جداً اكتشفت إن فتاة أحلامي هي ( تفيدة ) في عودة الابن الضال ومش حد تاني .. وإن أصدق كلمة وطنية سمعتها كانت من يحيى في وداعاً بونابرت “مصر هتفضل غالية عليَّ” .. جمل كتير من أفلامه بتنط على دماغي في مواقف مختلفة وتجربة حياة بتخلق بالنسبة لي علامات على الطريق ” أنا بقى غيرك وغير أي حد ، أنا رايح القمر .. أشوف الدنيا من الناحية التانية “

كل ده في نقطة الحياة .. شاهين كبني آدم ، لو اتكلمت عليه كمخرج عظيم خد وتأثيره في تاريخ السينما .. يتقال كلام كتير أوي عن واحد من أعظم المخرجين اللي شفتلهم أفلام بشكل عام – مش بس المصريين أو العرب –

” وإلا فمن ذا الذي يرضخ طائعاً لسياط الزمان ومهانته ، ويتحمل ظلم المستبد وازدراء المتغطرس وأوجاع الحب المستنكر ومماطلة القضاء وصلافة تأويل المناصب ، في حين أنه يملك القدرة على أن يحقق الراحة الأبدية ، بطعنة من خنجر مسلول في يده ، لولا الخوف من أمر ما بعد الموت “

تفتكر ليه انتَ لسه ماسك في الدنيا لحد دلوقتي ؟؟
خوف من الموت ؟؟

أفتكر لأ .. أعتقد إنه حب في الحياة أكتر من أي حاجة

عجَّزت ؟؟

“اللي قلك كده ضحك عليك ده جمالك يبان جوا عنيك” – سامعه يا ست نسرين -:)

رغم أي حاجة .. رغم أي حزن أو ضيق .. رغم أي هبل وعبط عملته انتَ .. رغم أي زعل

” نبض قلبي متقسم بيني وبينك
واللي تشوفه عيني لازم بالضرورة تشوفه عينك “

كل سنة وانتَ طيب يا واد يا إسكندراني



محمد المصري says:

نسرين

بالرغم من اقتناعي بكلمة العظيم محمد بيه المدبولي الكبير إن الولد لازم يجيب شهادة أكبر من البنت عشان يقدر يضربها قلمين تلاتة 🙂 بس البوست ده لازم يخليني أفكر أبقى حنيَّن مع حضرتك زيادة شويتين 🙂

وباعتباري ( هوَّ على أحسن ) عايز أقولك
ميرسي فعلاً يا نسرين على البوست ده ، جميل ومليان حب ومسَّني جامد إنك افتكرتيه وأنا لأ ، تخيلي محستش قبل كده إن حد حبه لشاهين قريب من حبي ليه إلا انتِ وبنت تانية ؟؟

حاسس إني عايز أكافئك بحاجة ومش لاقي .. فخليها شكراً مؤقتاً 🙂

ملحوظة – مش ليكِ طبعاً ، بس للناس – : الكلام اللي بين علامتين التنصيص في الكومينت اللي فات من أفلام شاهين : عودة الابن الضال ، حدوتة مصرية ، إسكندرية ليه ، إسكندرية كمان وكمان



Nsreen Bsunee says:

يحيي
وانت بالصحه والسلامه

حفصه
الله يخليكى يا قمر

احمد القاضي
ايوه انت تحب تمشي فى السليم يا احمد سبت البوست بتاع عبدالناصر وجيت هنا ماشي يا احمد يا قاضى تنور فى اى مكان

مصطفي حبيبي
حاقولك على حاجه غريبه
انا عمرى ما واجهتنى مشكله انى مافهمش افلام شاهين ابدا يمكن عشان امى بتحبه وكانت وهى بتتفرج فاهمه فا وصللى احساس انى فاهمه انا كمان والمفروض الناس كلها تفهم عادى وبعد كده عرفت بقى ان فيه ناس عندهم مشكله مع فهم افلام جو
ليا واحده صاحبتى مش فاهمه عوده الابن الضال
🙂
انا كمان بحب اسم يحيي
مره حلمت انى خلفت توأم اسمهم يحيي وياسين
ومره توأم برضه بس اسمهم فؤاد وفريد

فرنسا
انتى نورتينى يا سكر يا ام قلب طيب
من حسن حظى ان ابى بعتتلى التاج وعرفت مدونتك ابى ميجيش منها غير كل خير

لو محبتش اسكندريه والاسكندرنيه حاحب مين
غنالها منير والشيخ امام وفيروز وعلى الحجار ومحمد الحلو
ولادها يبقو عمر الشريف ويوسف شاهين واحمد رمزى وسيد درويش بدريه السيدوبيرم التونسي و نسرين بسيونى وغيرهم وغيرهم من العظماء
في اماكن فى اسكندريه رهيبه يا ابى باعشقها بجد ومش باحس انى باتنفس غير فيها ادعيللى انزل اجازه قريب عشان انا فعلا على اخرى وتعبانه بجد وحاجيلك القاهره يا بنتى زى ما وعدتينى عشان تقعدينى ع البورصه

سلام للجميع



صالح سعيد says:

السلام عليكم
اذيك يا نسرين
احييكى على هذا البوست الرائع
احساسك رائع بجد
ربنا يزيدك ويوفقك



Nsreen Bsunee says:

محمد
طبعا حضرتك شفت الانتهاك الرهيب لحقوق الملكيه الفكريه اللى انا عملته بس بجد كلامك مكانه مش فى تعليق ابدا كلامك بوست لوحده

ياريت تنزل البوست اللى انت كتبته مش لازم يعنى يكون فى نفس اليوم يا محمد نزله عشان خاطرى

شكرا كفايه اوى يا محمد وملهاش لازمه كمان هو انا عملت ايه يعنى انت كده بتدينى اكتر من حقي بكتير

على فكره يسرا كانت بتقول
“اللى قالك كده ضحك عليك ده شبابك يبان جوه عنيك”
شبابك مش جمالك
احنا حنحرف فى كتاب جو المقدس ولا ايه:)

محمد انت اللى كلامك جميل اوى وكله حب ومسنى بجد

حاسه انك حتبقى حاجه كبيره اوى يامحمد



Nsreen Bsunee says:

استاذ صالح سعيد
شرفتنى
ربنا يوفقك ويكرمك يارب ومرسي لذوق سيادتك



Gid-Do - جدو says:

نسرين

يوسف شاهين مخرج متميز ـ فاكر مرة المخرج الراحل حسام الدين مصطفى كان منفعل جدا وقال عن يوسف شاهين ـ هو حد بيدخل افلامة ـ طبعا دة كلام فية اعتراف بتفوق يوسف شاهين لان لما مخرج كبير زى حسام الدين مصطفى ينفعل عند ابدء رائيه فى يوسف شاهين دة كافى انه يقول ان يوسف شاهين متفوق جدا

لن انسى دور يوسف شاهين فى فيلم باب الحديد كممثل ومخرج ـ وحسن البارودى بيحاول انه ينقذ هنومة ـ هند رستم ـ ويلبس قناوى ـ يوسف شاهين ـ قميص الاكتاف علشان يروح مستشفى الامراض العقلية

واخراجة لفيلم صراع فى الوادى ـ اول افلام عمر الشريف ـ

علاوة على ان يوسف شاهين مصرى صميم ودة بيزيد من عشقى لكل افلامة ـ تحياتى



Nsreen Bsunee says:

فيه اتنين جم اتحفونى بتعليقين فى منتهى الادب والاخلاق والذوق وكلامهم كان دليل قاطع على ادبهم الجم ومستواهم الرفيع جدا لذلك احتراما لاصدقائي اللى بيزورونى حذفت التعليقات رميتهم فى الزباله يعنى ملقتش مكان مناسب ليهم اكتر
ربنا يتوب علينا من الاشكال الجميله اللى الواحد بيستمتع بطلعتها البهيه فى المدونات



Nsreen Bsunee says:

ياااااا
جدو الدكتور محمد
يا مرحبا يا مرحبا
بجد المدونه نورت جدا يا جدو

حسام الدين مصطفى رغم انه لايرقى لابداعات يوسف شاهين لكن باحب فيلم النضاره السودا جدا

نورتنى يا جدو



صالح سعيد says:

صلوا على النبى يا جماعه
احنا جايين نهدى النفوس
مينفعش كده
انتوا الاتنين غلطانين
لانكم بتردوا على بعض بطريقه مش كويسه
وده مينفعش
المدونات طريق للتواصل الفكرى بينا
وليس وسيله للردح
ربنا يهديكم



HafSSa says:

نسرين امسحي التعليقات بتاعت المدعوة و التانية و ريحي نفسك
الناس دي مينفعش معاها اي نوع من انواع الحوار
و هما شايفين نفسهم احسن من غيرهم خلقة
يعني اي منطق انتي بتحاولي تتكلمي بيه معاهمك
كبري لحسن مش حتخلصي من كم البذاءات اللي ممكن تشوفيها



Fantasia says:

تصدقي معزتي ليكي كلها قبل البوست دا كوم, وبعده كوم تاني خالص

يعني أقولك إيه؟
ما انتي شايفة اهه
فانتازيا كمان وكمان
ورأيت كل شيء وتعبت على الحقيقة
مش محتاجة أقولك يوسف شاهين بالنسبالي إيه
هو وأفلامه بيطمنوني ان مصر لسة فيها أمل
لسة فيها فن وفكر وثقافة وابداع وجمال
مش بحس الاحساس دا وقلبي يتملي بيه غير في تلت حالات: يا إما أكون بتفرج على فيلم من بتوع جو.. يا إما بسمع عمر خيرت ف الأوبرا.. يا إما محمد منير يكون بيغنيلي لوحدي (ف الكاست يعني, لحسن مخك يروح بعيد ولا حاجة هههه

يا ريت أقدر أعيش ف نفس المود دا على طول.. هي دي الدماغ بتاعتي
لكن للأسف الواحد محاصر بالحاجات اللي بتشده للواقع الأليم تاني
تلاقي سعد الصغير طالعلك من البلاعة
وتلاقي اعلانات أفلام السبكي مالية الدنيا, وبتطاردك ليل نهار
يا ساتر! حاجة تغم
بس تحسي ان فيه هارموني بين الغم دا والعيشة اللي عايشنها
لكن جو وعمر خيرت ومنير مش راكبين على الحالة العامة, الكونترست بينهم عالي أوي.. ههههه
تحسي ان هما اللي نشاز ف وسط الواقع اللي احنا عايشينه
أوووووووووف.. توب علينا يا رب

هي الناس دي عارفة تفضل كدة ازاي؟
يعني ايه الصلابة اللي عندهم مخلياهم محتفظين بعبقريتهم في زمن المسخ دا؟
حاجة غريبة! هو ليه جو مش بيهاجر مثلا؟ ماهو عنده اصحاب كتير في فرنسا

شيء جميل لما تبصي حواليكي تلاقي ناس مصممة تزرع الجمال في عز القبح
وتبدع وتفكر في عز الضلمة والجهل

منك لله يا جو.. مش هسامحك. قولت الأفكار ليها أجنحة, محدش يقدر يمنعها توصل للناس. وصدقتك
واديني أنا اللي هتطير رقبتي ف الأخر

أشكرك يا نسرين على البوست الجميل, وما أثاره من ذكريات جميلة داخلي



mado80 says:

نسرين ازيك
ده أول تعليق ليا في المدونه ومش هايكون الأخير أبدا

علي فكره أنا كنت بحب جو أوي لكن قريت في كتاب (التنوير الزائف) لجلال أمين حاجات بجد أثرت علي حبي واعجابي بيه ، بس سواء اختلفنا أو اتفقنا علي جو لازم نقدر أنه شخص مبدع بجد، كمان هو علي الجانب الأنساني شخصيه هايله أوي

نيجي بقي للمهم أنا قريت تعليقك علي أخر بوست لمروه الزارع طبعا أنا مش بتكلم بالنيابه عنها هي أقدر مني بالدفاع عن نفسها كمان أنا لسه ماعرفتش ردها عليكي أيه

وعلي الرغم اني متفق معاكي في كل كلمه قلتيها عن حقوق الملكيه فكريه وانه ما ينفعش حد ينقل من مصدر الا بعد ما يذكر اسمه ده كله أنا متفق فيه معاكي

بس بجد اللي مش متفق فيه معاكي لهجتك الحاده أوي كنتي بتكلميها بلهجه شديده زياده عن اللزوم كان ممكن توصليلها اللي انتي عاوزاه بأسلوب يعني أرق من كده شويه
برضه كان مكن تبعتيلها رساله علي الأميل اللي هي حطاه عندها في المدونه وتشوفي ايه رد فعلها لو استجابت كان بها لو ما حصلش استجابه يبقي سا عتها حقك تعلني لكل الناس اللي انتي ذكرتيه
أنا طبعا مقدر انفعالك وصدمتك بس يعني ده رأيي اتمني انك تقبليه بصدر رحب والأختلاف في وجهات النظر لا يفسد للود قضيه كما يقال

تحياتي ليكي وعلي مدونتك الرائعه اللي بجد هاخشها كتير بعد كده….سلاااااام



Alexandrian far away says:

الصديقه العزيزه نسرين
صباح الخير والورد والفل والياسمين
زمان قوي كان عندي سر رهيب
سر كان بيؤرقني وبيوجع قلبي وضميري من أيام المدرسه الثانويه
هو أني بأكره تشارلز ديكنز
باقرف من كتاباته سواء يالأنجليزي أو مترجمه، لكن طبعا مستحيل كنت أقدر أعبر عن الراي ده لأي حد في الدنيا، وفضل السر الرهيب مكبوت في قلبي سنين وسنين بيعذبني وبيجيب لي كوابيس بالليل
أزاي أجرؤ وأكره تشارلز ديكنز
لحد ما في يوم وفي لحظة شجاعه نادره صرحت ىلصديق أنجليزي كان بيدرس أدب عربي في مصر بالحقيقه الرهيبه دي وأنا متوقع أنه يتهمني بالجهل والعبط والهبل وكل العيوب الرهيبه ألي في الدنيا لكنه أستقبل الموضوع ببساطه وقال لي بأبتسامه ساحره: وأغلب الناس في أنجلترا كمان مش بتحبه
ساعتها حسيت أني أتحررت من السر الرهيب ده، وأني أنسان طبيعي مش وحش من الفضاء الخارجي

عارفه أهم ميزه في التقدم في السن أيه؟
أن الحاجات ألي بتبهرك بتقل كتير

حاقول كلمتين بس

فلليني ، وودي ألان

تقفيل بلاده ولا تجميع محلي

تحياتي



Anonymous says:

السلام عليكم ورحمة الله وبركاتة
والنبى انت مش مكسوفة
جاية تتكلمى عن جو بتاعك دا وفى ناس بتموت وبتشرد وبتقتل
يا شيخة عيب اوووووى حسى بقة باللى حواليك جبتينا انت واللى زيك ورا
مش بس بالسلبية لا بالاغماء لا بالموت اللى انتوا فية فكرى شوية فى حاجة مش على هواكى اخوات ليكى فى فلسطين يا طنط تعرفيهم يا حلوة ميتهيقليش كفاية عليكى جوووووووووو



appy says:

معلش يا نسرين سبييلى الطلعه دى بقى يا حبى
الاخت انونيمس اللى جايه تبدأ بالسلام عليكم وتختمها بالهبل اللى قالته اولا انتى معندكيش الشجاعه انك تقولى انتى مين بس انا شخصيا عارفه انتى واحدة من اتنين اغبياء كاشفين نفسهم وعاملين الدين حجه وستار لغبائهم وترديدهم الكلام وبس وبعدين انتم عملتوا ايه لفلسطين ولا انتم اشتغلتوا حامى الحمى اليومين دول الله يكرمكوا بقى عدلوا من نفسكوا الاول وبصوا لنفسكوا اواتلهوا على عينكوا وبعدين ايه البيئه دى وطريقه الكلام طنط والله كده انا احساسى اتأكد ان النت بيلم معلش بقى يا نسرين اصلك عارفه ايه بيغظنى بسرعه يا حبيبى وسيبك منها يكونش جوووو ده مضايقها فى حاجه ولا اقولك ما صحيح جاهله تفهم ايه فى الفن خليها مخبيه نفسها كده على طول بس العبيطه متعرفش انى ممكن اخليكى تعرفى مين هى ومن البلوج من عندك سلام يا قمر



appy says:

نسيت اقولك حاجه اللى يحلف ويقول والنبى يبقى حرام عليه يا عم المتدين يا بتاع فلسطين ههههههههههههههههههههههههههه



MERMAID says:

نونو
هههههههههههههههههه
انتي و ميمي بجد مسخرة
مش ممكن اللي عملتوه ده
مكنتش عاوزاكوا تتصالحوا
للاسف اتصالحتوا
هههههههههههههههه
تحياتي ليكي
بحب يوسف شاهين برضه
تحياتي ليكي يا قمر
علي فكرة انا ضفتك علي الهوتميل
و اشكرك والله قوي قوي علي وقوفك في صفي …وانا ميمي بهدلنا بعض برضه بس احنا اصلا صحاب من قبل الخناقة الحمد لله يعني …
بجد ربنا يكرمك يا قمر
تحياتي ليكي و حب وتقدير من هنا للكويت
امممممممممممموااااااااااااااه



mERMAID says:

كمان انا عاوزة اعتذرلك لاني اعتذرت لميمي علشان ميكونش حد احسن من حد
وانا بحبك قوي علي فكرة ..و قدك كمان مواليد نفس السنة بس انا شهر نوفمبر عقرب انا
:))
بجد انتي عسل :))
نورتيني و شرفتيني
بس لو سمحتي انا عاوزة اشوف الكومنتات بتاعة الخناقة
بحب الخناقات قوي
هههههههههههههههههههه
تحياتي ليكي و بعدين الصباغ بيقوللي ان انا الوحيدة اللي بيحصل عندي خناقات ليه؟؟
مانتي عندك هنا حروب اهو
يا بنتي لازم تحصل خناقات علشان الحياة يبقي ليها طعم كدة ونقدر قيمة الهدوء والسلام
بجد متزعليش مني علشان اللي حصل عندي
ولازم نتكلم
اوك؟؟
تحياتي ليكي يا قمر الاسكندرية
🙂
هاااااااااااااااجر



بيتنا القديم says:

علي العموم الاختلاف في الرأي لا يفسد للود قضية..!!
اختلف معك بخصوص جوزيف شاهين..!!
(:
ودمت بخير



Nsreen Bsunee says:

شفتى يا حفصه القرف اللى انا فيه ده انا شلت تعليقات فيها قرف
تقوليش يا حفصه حب السينما والفن بقى تهمه
تقوليش فى ناس معتبره نفسها ظل الله على الارض وبتحاسب اللى فى النفوس والقلوب
تقوليش عايشيين معايا وعارفين انا علاقتى بربي ايه وتعاطفى مع اى قضيه فى العالم ايه
عاملين نفسهم اولياء الله الصالحين يا حفصه وهما زباله المجتمع
منهم لله منهم لله منهم لله
كل حد يدخل يقول ربنا يهديكى كانى كافره ولا حد شاف عليا حاجه وحشه وانا قاعد فى بيتنا كافيه خيري شري واتشتم انا واهلى
وبعد بسم الله وربنا يهديكى وتوبي يا اختى يشتمو وشويه شويه يسبو الدين
حاجه تقرف تقرف



Nsreen Bsunee says:

معلش يا جماعه مش حاقدر ارد بالتفصيل عليكم
تحياتى لحبيبتى فانتازيا
لاستاذى اسكندرانى
لضيفي العزيز مادو
عزيزتى ميرميد
اشكر تشريفكم



Nsreen Bsunee says:

ابى يا حبيبتى
مش عارفه اشكرك ازاى بجد
ربنا يخليكى يارب



Nsreen Bsunee says:

الحيوانه اللى داخله انونيمس
انا الحشرات الجبانه اللى بتدخل عندى من غير ما تقول هى مين مش باكلف نفسي وارد عليهم خاصه لما يتكلمو باسلوب العوالم والنسوان الناقصه ويا حلوه ويا قطه والكلام الفارغ ده
لا وابتديتى كلامك بالسلام عليكم ورحمه الله
هههههههههههههههههه
مش حتبطلو بقى قرف يا مقرفين سيبو الدين فى حاله ولما تبتدى كلامك باسم الله تكونى قده مش تكونى جاهله وغير محترمه ولا تعرفى رحمه ولا سلام وتتكلمى عليهم
اتفو عليكى وعلى اشكالك



مدونة يلا نفضحهم says:

عاجل الانباء
تم اصدار قرار تجديد الاعتقال للدكتور الزعفراني بعد الافراج عنه مرتين وهو الان في سجن الغربانيات في برج العرب بعدما كان محتجز في الترحيلات

شاركنا في التوقيع علي وثيقه اطلاق سراح الدكتور ابراهيم الزعفراني



Fantasia says:

ايه يا نسرين ياختي الاشكال دي؟
معلش المدونات ياما بتلم
والست المجهولة دي هي اللي مفروض تتكسف من نفسها. هي الحاجة عايزة إيه انا مش فاهمة؟
ولما هي محروقة أوي ولا بتاكل ولا بتشرب ولا بتنام عشان فلسطين, بتخش تقرا مدونات ليه؟ ما تعتكفي يا حاجة وتدعيلهم ربنا يفك كربهم
جاية ترمي بلاويكي على الناس ليه؟
قال يعني انتي اللي بتعملي حاجة مفيدة أوي, بلا وكسة
دا انتي لا منك ولا كفاية شرك
بالذمة مين اللي جابونا ورا؟ اشكالك هما اللي جابونا الأرض يا شيخة
اتقي ربنا اللي انتي مبهدلة اسمه معاكي هو انتي فاكرة تحية الاسلام دي زي العواف ولا دستور؟
داخلة تقلي أدبك, يبقى ابسط شروط التدين الوهمي اللي انتي فيه ده انك حتى ما تتلزقيش ف اسم الله والرسول
دا بما انك قليلة الادب ومش ممكن تكفي اذاكي عن الناس
قرفتونا بالمنافقة الفارغة بتاعتكم
حاجة تثير الاشمئزاز وتصيب بالتقيؤ

ولا يهمك يا نسرين
دي عالم عمالة تغل ف روحها لما هيجيلهم بواسير
خليهم ياكلوا ف نفسهم كدة
عقبال ما نخلص من قرفهم



Alexandrian far away says:

صباح الخير يا نسرين
طيب بالذمه ينفع الكلام ده؟
يعني تبخلي على أصحابك بردود تفصيليه
وتنرفزي نفسك عشان حد تايه على النت دخل ساب بلوه ومشي؟
يا ستي يا ما حتشوفي من ده كتير
كبري دماغك
تجاهليهم تماما
ولا اقول لك
أشكريهم
كده تبقي حرقتيهم وضيعتي عليهم ألي عاوزينه

صباحك زي الفل
تحياتي



m5m says:

: نسرين

مدونتك جميلة جدا..ليا طلب عندك ماتسمعيش كلام أى حد بينقدك عشان موضوعاتك….كونى نفسك وما تكتبيش غير اللى جواكى حتى لو كتبتى ريان يا فجل زى مابيقولوا….ده بيتك خليكى فيه على راحتك انتى مش راحة ضيوفك
……………….
عنوان مدونتك حلو قوى وفيه شجن و عذوبة
……………….
عجبنى قوى رأى يوسف شاهين فى محمود المليجى…فعلا عنده حق
.
.
.
تحياتى ليكى



يَحيى المِصري says:

في فترة من الفترات (قبل ما شوف هي فوضى ) حطيت يوسف شاهين في نفس صف روبرتو روسيليني مش ههانسى كلمتي في أول مرة أتفرج على فيلم إسكندرية كمان و كمان كنت قولت المخرج ده من الفضاء الخارجي
في شخصيات كده بتخبط يعني شخصية شكري مراد أو محمد بيه المدبولي أو أبو سويلم
أو كل حاجة عملها مع محسن محي الدين
أو علي المدبولي
بجد حدوتة مصرية

آه و أنا متفق مع مصطفى ماسموش جو إسمه يحيى شكري مراد



qwert anime says:

شكرا على الموضوع
و بالمناسبة انا حطيت في مدونتى فيلم روائى قصير من اخراج جو
و من بطولة نور الشريف
اسم الفيلم 11/9



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: