Nisreen85’s Blog











{January 21, 2008}   لماذا لا احبك بكباشي ناصر؟

بداية احب اوضح ان التدوينه دى رأيي الشخصى ومشاعرى الشخصيه ورؤيتى الشخصيه للتاريخ لا افرضها على احد0

  • الانقلاب العسكرى فى حد ذاته كان عشوائياً مجموعه من الضباط غير معروفى النوايا-اللى ظهرت بعد كده-ليس لهم اى هيكل تنظيمى عددهم محدود وعباره عن مزيج مضطرب من المتدينين والوطنيين والفاشيين ولم تكن لهم اى سياسه واضحه لما بعد نجاح الثوره-ربما لم يتوقعو نجاحها من الاساس-ولولا تخللى فاروق عن العرش بسلام حفاظا على مصر من بحور دماء لما استطاعو الوصول لابعد من انفهم ولولا الاضطراب والفساد اللى كان متفشي فى اواخر عصر فاروق وعدم استقرار الوزارات وتدهور الاحوال المعيشيه لما تقبل الشعب هذا الانقلاب العسكرى ولكن الظروف هيأت الشارع لتأييد هذا الانقلاب دون ان يعرف حتى نوايا واهداف النظام الجديد0
  • بعد نجاح انقلاب عبدالناصر وتولى مجلس قياده الثوره للحكم بدأ ناصر الاطاحه برموز النظام القديم بلا اى استثناءات فقد سلب من كل البشاوات والساسه وافراد العائله الملكيه وحتى رموز النضال الوطنى فى عهد الملك واصحاب النفوذ والاعمال ودون الخوض فى تفاصيل كانت عمليه التطهير كما سماها ناصر بها الكثير من الظلم والسلب والنهب والتنكيل بلا اى تعقل او انسانيه
  • فى 1945 بدأ ناصر عمليه تطهير للجيش من الذين ظن ان لديهم نوايا لمناقشته او مراجعته فى توجهاته وقام بعزل وفرض الاقامه الجبريه على الفريق اول محمد نجيب الذى وضعه ناصر فى البدايه وجها للثوره استغلالاً لنزاهته وحب الجيش له وحتى تكسب الثوره جزءاً من الاحترام الذى يكنه الجيش لنجيب ولكن بيانات نجيب التى نادت الجيش للرجوع الى ثكناته وترك حكم مصر للمدنيين وميلوله للحكم المدنى التى ظهرت واضحه وبالطبع لم يلقى ذلك هوى فى نفس ناصر وعصابته من الضباط الذين وجدو نفسهم بين عشيه وضحاها يحكمو مصر0وفى نوفمبر54 فوجئ الرئيس نجيب وهو يدخل عابدين بمجموعه من العسكر يعترضون طريقه وتم وضعه تحت الاقامه الجبريه فى فيلا قديمه بالمرج،وظل ناصر قائما باعمال الرئيس حتى انتخب فى استفتاء شعبى فى 56بنسبه 99،8 %و استمر التنكيل بنجيب سنوات طويله فعاش وحيدا وممنوع من مقابله احد واتهم ابنه فاروق بمعاداة النظام ولاقى اشد انواع المهانه والتعذيب وراء الشمس وخرج ليموت كمدا وحزنا 0وابنه الثانى على الذى كان له نشاط سياسي عربى فى المانيا تم قتله فى احد الشوارع بالمانيا وعاد الى مصر فى صندوق ولم يستمع ناصر لتوسلات نجيب للصلاة على جثه ابنه الاوسط0تعثر يوسف الابن الاصغر فى التعليم وعين فى وظيفه حكوميه ثم تم فصله بقرار حكومى ليس له اى اسباب وعليه امضاء ناصر ليعمل بعدها سائق تاكسي!!!ليس هناك وصف خيرا من وصف نجيب نفسه فى مذكراته”القطط والكلاب اوفى من البشر احيانا”0
  • بعد تنحيه نجيب واستيلاء ناصر على الحكم قام بالغاء الاحزاب السياسيه،والقى بالزعماء السياسيين فى المعتقلات،واغلق الصحف الحره،فرض القيود على النقابات المهنيه واتحادات العمال ومنظمات الطلبه، زج بالادباء والمثقفين والصحفيين مما لديهم رأى لا يوافق هواه فى السجون و روض الفن والادب والصحافه والغناء للسير فى اتجاه واحد تمجيد الثوره وتمجيد جمال وتشويه الملكيه ورموزها ونجيب ومؤيديه ومن المفارقات المضحكه ان ناصر روج لان نجيب من ام سودانيه و ام نجيب هى زهره ابنه الاميرالاى بالجيش المصرى محمد بك عثمان من المحله الكبرى مصريه ابنه مصرى0
  • فى 26\10\1954 كان ناصر يلقى خطابا على العمال فى الاسكندريه حين اطلق عليه احد الاخوانيين 6 طلقات ناريه لتظهر وقتها موهبه ناصر الخطابيه حيث استغل الموقف ليبدأ مهمته فى تتويج نفسه بطلاً قوميا “ايها الرجال ليبقى كل فى مكانه اننى ملك لكم00حياتى ملك لكم 00اننى اتحدث اليكم بعون الله بعد ان حاول الاثم قتلى00لقد عشت من اجلكم وسوف استمر حتى اموت وانا مناضلا من اجلكم”-غلبت عطيل وهاملت والله فى الاداء المسرحى-استغل ايضا جمال هذا الحادث ليسحل القوه الوحيده الباقيه التى تحالف معها لمصالحه الشخصيه فى يوم ما الاخوان المسلمين فأمر باعدام قادتهم وزج بالالاف منهم فى السجون وبذلك قضى على اخر صوت معارض فى مصر واتم بخطابته الساحره وكاريزمته ورجاله من الفنانين والصحافيين سيطرته على رجل الشارع الذى كان متعطشا الى حلم يلتف حوله وملأ ناصر عقولهم باحلام الكرامه والقوميه والمجد ورسخ فى عقول المصريين صورته كالفرعون المنتظر وفى عقول العرب صورته كالمخلص صلاح الدين الايوبى0
  • واصبح ناصر بديكتاتوريته وقمعه هو ورجاله لاى صوت متعقل ان يصبح المعبود الذي تتعبد فى محرابه ملايين المصريين والعرب ليتحولو الى ازرع ملوحه وايدى مصفقه وافواه مهلله وانتشرت فى شوارع مصر صوره عبد الناصر الوسيم مكتوبا عليها لقد ارسله الله عونا لبلدنا-صباحو مهدى منتظر وتنويم مغناطيسي للناس الغلبانه-0
  • حركات ناصر العنتريه التى كان يقوم بها ليتوج نفسه بطلا قوميا دون النظر لما ستجلبه على مصر وما ستكلفه لمصريين كانت تدل على عدم اكتراث بدماء المصريين وغباء سياسي فقد كان يستفذ الغرب ويظهر عداءه لهم بشكل مبالغ فيه وحين قام بشراء السلاح من تشيكوسلوفكيا واستشعر استياء الغرب لم يكتفى بذلك بل اعلن اعترافه بالصين الشعبيه فى 56 فقانت امريكا بالرجوع عن اتفاق المساعدات الخاصه ببناء السد العالى فقام هو باصدار قرار بتاميم القناه وفى اكتوبر 56 تحالفت فرنسا بريطانيا واسرائيل وقامو بشن العدوان الثلاثى على مصر ودكت بورسعيد ودمرت تماما وتم القضاء على ربع الجيش المصرى ولولا استياء امريكا والسوفييت لكانت الخسائر اكبر0
  • رغبه ناصر فى ان يكون زعيم قومى عربى جعلته يجبر المصريين الذين كانو يعتبرو نفسهم اسمى من باقى شعوب المنطقه على الاندماج داخل الامه العربيه متحديا بذلك التاريخ والفرديه والخصوصيه التى تميزت بها مصر وضحى باحساس مصر المعتزه بنفسها قربانا لرغباته القوميه واعلن”ان العروبه وليس الفرعونيه هى ايديولوجيتنا السياسيه”ونبذ مدرسه كامله من الفكر الوطنى المصرى ليحقق بذلك اوج قوته عن طريق اثاره القوميه العربيه0
  • تدخلات ناصر عربيا كلفت مصر الكثير وارهقتها فقد اعلنت الوحده مع سوريا فى 1958 ثم اتجه ناصر لتحريض اللبنانيين للثوره على المسيحى كميل شمعون وسياساته التى لم تروق لمزاج ناصر وحاول اثاره الاردنيين ضد الملكيه والملك حسين بل وحاول اكثر من مره ان يغتال الملك حسين بطرق وان دلت فتدل على بلطجته واستخدامه لاسلوب العصابات واعتقد ان حادثه طباخ الملك حسين اكبر دليل على ذلك وحرض العراقيين على الثوره ضد الملكيه ايضا واثمرت تحريضاته فى العراق فقتل ملك العراق فيصل البالغ من العمر 23 عاما فى 14 يوليه 58 ولولا تدخل امريكا لفلحت كراهيته التى بثها فى بيروت وعمان0
  • لم تستطع سوريا تحمل حب السلطه والسيطره لدى ناصر فانفصلت فى سبتمبر 1961 واثر ذلك على ناصر بالطبع وفى محاوله منه لاستعاده مكانته التى سقطت بعد الانفصال الى حد ما وضع انفه فى اليمن وكان ذلك تدخلا سافرا فى شؤون دوله ذات سياده متحديا بذلك الانظمه العربيه المحافظه بقياده السعوديه ومضحيا بدماء واموال واسلحه المصريين0
  • فى 1967 وامعانا فى التعالى والعنتريه قام عبدالناصر بسلسله من التصرفات الهمجيه التى سرعت من الحرب فمع ازدياد هجمات الفدائيين السوريون والفلسطينين وارتفاع لهجه التهديد لدى اسرائيل ورغم معرفه ناصر بقدره اسرائيل على تنفيذ تهديداتها وعلمه بعدم قدره الجيش المصرى المنهك على تحمل اى مخاطره الا انه استمر فى القاء الخطب العنتريه وقام بارسال المزيد من القوات الى غزه واطقم مدفعيه الى مرتفعات شرم الشيخ ثم اعلن اغلاق مضيق العقبه والذي اعتبر عملا من اعمال الحرب فاشهرت اسرائيل اسلحتها ورغم تمام معرفته بان العرب مجتمعين لن يستطيعو مواجهه اسرائيل فى هذا الوقت الا انه اكمل حساباته الغبيه الخاطئه بتوقيعه اتفاق دفاع مشترك مع سوريا وبذلك جعل مصر وجيشها رهينه لما تقوم به سوريا دون اى اعتبار لدماء المصريين والجيش المصرى0
  • وقبل حتى ان يدرك ناصر او دمشق ان هناك حرب كانت اسرائيل قد دمرت الطائرات التى اشتراها ناصر من السوفييت ودمرت القوه الاردنيه والسوريه الجويه0وتبدد الجيش المصرى بدون غطاء جوى وحوصر عشره الاف جندى مصرى على حدود غزه وفى السويس جلس الاف الاسرى القرفصاء لتعرض اسرائيل صورهم وتتباهى بنصر السته ايام ودون الخوض فى التفاصيل المؤلمه للحرب فقد كانت النتيجه مفزعه استولت اسرائيل على القدس والضفه الغربيه وغزه والضفه الغربيه لنهر الاردن ومرتفعات الجولان وسيناء0
  • بعد الحرب اعترف ناصر -بطل العروبه العظيم- بهزيمه اوسع من هزيمه 48 التى كان يلوم فاروق وفساد فاروق عليها اعترف بخساره ارواح اكتر واراضى واسعه 0ورغم التساؤلات التى اثيرت حول ناصر الا ان قبضته الحديديه داخل مصر وارتدائه لهذا الطابع التراجيدى وقمه اداءه المسرحى فى خطاب التنحى الشهير استطاع ناصر ان يثير العواطف رغم انه وبالتدريج كان بدأ يظهر الوجه القبيح للحقيقه الناصريه وكان المصريين المنهكيين اقتصاديا والمجروحين من النكسه قد بدأو يشككو فى اهداف ناصر المعلنه وبدأو يسأمو من اخفاء وتجاهل مشاكلهم وفقرهم تحت شعارات العروبه ورغم صعوبه اعتراف الفلاحين فى هذا الوقت بهذه الحقائق الا ان المثقفين اكدوها وتحدثو عنها وعن خيانه دوله ناصر البوليسيه لمبادئ الثوره والديموقراطيه واهانت المعتقلات والتعذيب السادى والتهم الملفقه والاعتقلات غير المبرره كرامه وكبرياء المصرى وقضت النكسه على ما تبقى من هذا الكبرياء لقد كفر المصريين بالعروبه التى زرعها ناصر فى اعصابهم لانهم كانو يريدو حقهم فى وضع مصالح مصر والمصريين فى المقدمه وليس شعارات ناصر القوميه التى لم تؤدى بمصر الا الى نكسه وتدهور فى الوضع المعيشي وجيش منهك وفى كل بيت مصرى شهيد او اثنين0
  • لقد تسلم السادات مصر من ناصر وهى مفلسه عاجزه عن خدمه ديونها الخارجيه او حتى شراء ما يلزمها من القمح وارض محتله وجيش منهك يقوده السوفييت و يديرون نظام دفاعه الجوي ويتحكم السوفييت فى الدخول حتى الى اهم المنشآت العسكريه المصريه ومستوى ثقافى متدنى واخلاقى متدنى انكسار وكبرياء مجروح وشعور بان مصر لم تجنى سوى الخراب والجوع من نضالها ثلاثين عاما من اجل العرب وكان المثقفين المصريين يؤيدو الخروج من المستنقع العربى والعوده الى الوطنيه الفرعونيه واحساس مصر بالتميز والتفوق الفطرى على باقى شعوب المنطقه0
  • الخوض فى تفاصيل ناصر وعصابته به الكثير من الحقائق او بمعنى اصح الجرائم التى ارتكبت فى حق المصريين فى هذا العصر وهناك من يشيدو بنزاهه يد ناصر وبانه لم يستغل نفوذه لتحقيق ثروه ماديه والسبب بسيط ان ناصر لم تكن طموحاته ماديه كانت طموحاته متعلقه بحب السيطره والزعامه والسلطه ولكنه سمح لاصدقاءه وشركائه بالسرقه والنهب من اموال المصريين ومن بعده استطاع ابناءه استغلال ما تبقى من نفوذه لتحقيق الثروه التى لم يحققها هو0
  • فى النهايه اقتبس بالنص من مذكرات اول رئيس لمصر الجمهوريه الفريق اول محمد نجيب”لقد قمنا بثوره فاذا بهم يحولونها الى عوره00قمنا من اجل الناس فاذا بهم يعملون من اجل انفسهم00قمنا من اجل رفع مستوى المعيشه00فاذا بهم يعملون على خفض مستوى كرامه البشر


شـــــهــــروزة says:

رغم أنى مشفقة عليكى من هجوم الناصريين
واللى أخدت منه نصيبى فى بداية كتابتى

لكن أعلنتها وبكل فخر من قبل
أنى لم و لن أحب البكباشى عبناصر

حتى ولو أدعى انه محرر العبيد وقائد العروبة والقومية والترفشخانات العربية

فأخطاؤه أبشع بكثير من حسناته

وكما قلناها من قبل لمبررى تلك الأخطاء
ان كان يعلم فتلك مصيبة
وأن كان لا يعلم فالمصيبة أكبر
وما زلنا نعانى من تبعاتها حتى هذه اللحظة

لم نكن نحتاج مستبد او ممثل
فمابالك بحاكم غااااااااافل

يلااا
ربنا يرحم امواتنا جميعا
احنا المصريين كدة
تقوليش يختى الكل اتفق علينا؟
واحنا مطاطيين البصلة؟؟

قطشيعة دول على دول



شـــــهــــروزة says:

المرة دى رجااااء حااااار

والنبى تعدلى الخط و مش تخليه مايل على جنب
وكبريه شوية

عين ما ماذر اتمققت من البحلقة

مشكرين



Ragi says:

شوفى يا نسرين
انا اختلف معاكى تماما
مصر قبل ثورة 52 كانت فى حالة من التخلف الفظيع فى كل المجالات ، السياسية والاقتصادية والاجتماعية
مصر كانت تحت الاحتلال الانجليزى لمدة اكثر من 70 سنة
كانت الاوبئة تفتك بالمصريين ومعدلات وفيات الاطفال والامهات عالية بكثير عن المعدلات العالمية
كانت فى القاهرة واقول القاهرة وليس الريف مشكلة عويصة اسمها مشكلة الحفاء اى كان الناس يمشون حفاة بدون احذية
كانت الحالة السياسية تهريج وجاء النحاس الى رئاسة الوزارة تحت تهديد الدبابات الانجليزية
كان يوجد بغاء رسمى مقنن فى مصر فى وش البركة
باختصار الحالة قبل الثورة كانت زفت وده على فكرة مايختلفش عليه الناس اللى عاشت الزمن ده ومنهم ابويا ولا الناس التى اطلعت على كتب التاريخ المحايد
عبد الناصر والضباط اللى كانوا معاه خاضوا الحرب فعلا فى فلسطين وكانوا منظمين جدا وعندهم خبرة سياسية وثقافة واطلاع على احوال العالم بعد الحرب العالمية الثانية ودى كانت مأثرة على الشباب فى العالم كله ( اقصد الحرب العالمية )لانهم شافوا بشاعة الحروب والاستعمار
كل ثورة لها ضحايا وكويس انهم مقطعوش رقبة محمد نجيب ولا رقبة الباشوات زى ما حصل فى الثورة الفرنسية اللى بيضربوا بيها المثل على الاخاء والمساوه فقد سالت انهار الدماء تحت الجيلوتين
كذلك الثورة فى روسيا والحرب الاهلية الامريكية وغيرها وغيرها دبحوا فى الناس وبهدلهوم اكثر بكتير جدا من
اللى حصل فى مصر
لا يوجد مقارنة بين هزيمة 76 ونكبة 48
وعندى سؤال ليكى ، هل نكون عرب مسلمين لنا خلفيات كثيرة مشتركة مع جيراننا ويوجد امل ان شاالله واحد فى الالف اننا فى يوم من الايام نشكل مع العرب تكتل اقتصادى يضارع الاتحاد الاوروبى ولا نكون فراعنة منعزلين ونقول احنا اجدع ناس لوحدنا ده مايمشيش فى العالم دلوقتى ، طيب لما نبقى الاول نتكلم هيروغليفى نبقى نسيب لغة القرآن ونبقى فراعنه
بعد 56 المصريين كانوا فخورين جدا بمصريتهم وبالنصر انشالله السياسى حتى على انجلترا وفرنسا ، دلوقتى انتى فخورة انك مصرية؟
وهو يعنى نظافة يد عبد الناصر لا تدل على باقى جوانب شخصيته؟
الموضوع طويل ومحتاج صفحات وصفحات
لكن فى النهاية الخلاف لا يفسد للود قضية زى ما بيقولوا



Nsreen Bsunee says:

عزيزتى شهروزه
يا بنتى انتم خايفيين عليا ليه هو انا خرجت عن لا اله الا الله ده عبدالناصر هو لامحمد ولا عيسي واللى نفسه فى حاجه يقولها زى ما فيه ناصريين متخلفين وقله الادب مسيطره عليهم فى ناس بتحب عبناصر وممكن تتكلم عن وجهه نظرها بأدب

واعلنها معاكى بكل فخر لم ولن احب بكباشي عبناصر

للاسف اخطاءه وغباءه السياسي بيجعلنى اظن ان حتى حسناته جاءت بالصدفه البحته ولو ان حسناته دى لا ترى بالعين المجرده فى مقابل اخطاؤه

هو كان مستبد وممثل وغافل للاسف
والله يرحم اموات المسلمين وغير المسلمين رحمه واسعه

انا كبرتلك الخط اهو انتى تأمرى يا حبيبتى



Nsreen Bsunee says:

عزيزى استاذ راجى
اكيد الاختلاف لايفسد الود باذن الله

اولا انا مقولتش ان عهد الملك كان مثالى وعارفه ان الظروف فى الملكيه كانت سيئه وده اللى فرش الطريق بالورد لانقلاب ناصر

والبغاء والدعاره لم تقتصر على العصر الملكى لو كانت فى وش البركه ومقننه فا هى اصبحت بعد كده بطول كورنيش النيل وكورنيش البحر وغير مقننه

عبناصر واللى معاه خاضو حرب فلسطين وكانو واعيين وفاهمين
وليه ماظهروش ده فى ارض الواقع لما كان الجيش والسلطه فى ايديهم ليه لما الجيش كان فى جيب ناصر خسرنا سيناء وضفه نهر الاردن وغزه والقدس والجولان واكيد حضرتك عارف ان جيش الاردن وسوريا فى 67 كان تحت قيادات مصريه من اللى حضرتك بتقول انهم خاضو حرب فلسطين وكانو منظمين
باماره كتب التاريخ والوثائق اللى بتحكى وتتندر بغباء وعشوائيه انسحاب عبحكيم عامر فى 67

وهو نجيب كان الملك عشان يقطعو رقبته ده المفترض انه كان كبيرهم وكان موضع احترام الجيش كله كان راجل نزيه واعى سياسيا وكان بينادى بدوله مدنيه وبعوده الجيش للثكنات وقال بالنص حان الوقت ليعود الجيش لثكناته ومهامه العسكريه ولنترك حكم مصر للمدنيين
المفروض عشان كده تتقطع رقبته
المفروض نحمد ربنا ان ناصر وعصابته لم يذبحو ملك مصر واسرته واكتفو بتجريدهم من الجنسيه ومن الممتلكات ومن الملابس حتى

لم يكن الانقلاب دموى لسبب واحد وهو ان الملك انسحب بسلام

طبعا عدم تكوين ناصر لثروه فى حياته لايدل على باقى جوانب شخصيته ما يدل على باقى جوانب شخصيته هو انه ترك رجاله وشركائه فى الحكم يسرقو وينهبو ويستولو ويبرطعو فى البلد وانه سمح بقمع الحريات وتلفيق القضايا و و و حاجااات كتير برضه محتاجه صفحات وصفحات

هو ايه علاقه العروبه بالاسلام وبلغه القران يعنى المسلمين اللى مش بيتحدثو العربيه اقل من العرب اسلاما
اكيد لا
وتفردنا وسط المنطقه هو فى فرعونيتنا وذكاءنا وشخصيتنا المميزه جدا واللى فعلا بتجعلنا حاله خاصه فى الشرق الاوسط
وهل انتماءنا لفرعونيتنا مينفعش غير لما نتحدث الهروغلوفيه
واعترافنا بجذورنا القبطيه يجردنا من اسلامنا
وتباهينا بفضل الفاطميين على القاهره يجعلنا شيعه
ايه المشكله فى اننا نكون حاله فرديه وسط الوطن العربيه يا فرحتى بالعروبه هو حضرتك مشفتش بوش وهو بيرقص بالسيف فى السعوديه فى نفس الوقت اللى بتدبح فيه الناس فى غزه
بصراحه انا اول الكافرين بالعروبه وشايفه ان دور مصر فى المنطقه مش لازم يقترن بشعارات العروبه المزيفه لكن لازم يقترن بافعال
يعنى لو جت دوله دلوقتى بتتحدث لغه الكوكى كا وامدت غزه بالطعام والموارد الاساسيه انا حاحترمها اكتر مليون مره من احترامى لاى دوله عربيه بتتغنى بالعروبه دون افعال حقيقيه

وحضرتك ذكرت الاتحاد الاوروبى
حضرتك طبعا عارف التباين اللغوى والثقافى اللى فى اوروبا جبتش انا حاجه من عندى
يعنى الوحده اهى كويسه من غير لا لغه مشتركه ولا دين مشترك وحده جغرافيه تعود على كل دوله بمصالح ومكاسب يبقى على عينا وراسنا

ونعم انا فخوره جدا بمصريتى ومع الوقت فخرى ده بيزيد
لان مصر مش ناصر ولا مبارك هى حاجه كبيره اوى تستحق الفخر
حضرتك بتقول ان المصريين كانو فخورين بعروبتهم بعد 56
طيب بعد 67 كان ايه الكلام بعد الثوره البتروليه فى الخليج كان ايه الكلام بعد ما المصريين جربو الغربه فى الخليج ورأو المشاعر الحقيقيه اللى بيكنها لينا العرب رغم كل اللى مصر عملته واستنفزته وكل اللى مصر ضحت بيه فى رحله ناصر المكوكيه نحو وطنى حبيبى الوطن الاكبر
كان ايه الكلام كانو فخورين بعروبتهم برضه

وتانى وباكد الاختلاف فى الرأى لا يفسد اى حاجه كويسه و الود والاحترام المتبادل يا استاذى



يَحيى المِصري says:

نسرين إحنا إتكلمنا في الموضوع ده أنا و إنت قبل كده مش شايف يعني إنه موضوع خلاف يستاهل الخناق زي ما قلتلك قبل كده إنت بتكرهي عبد الناصر و أنا بحبه
بس باتخنق من اللي بيقول عليه ملاك
و بتغاظ من اللي بيقول عليه شيطان

بقول لك إيه برضه لما حد يشتم إندهيلي عشان أنا أعز الفرجة ع الخناقات دي
😀



Nsreen Bsunee says:

يحيي
حاندهلك اكيد مش حاعرف اتخانق من غيرك

بس ربنا مايجيب خناق



مهندس مصري says:

أنا لا بأحبه و لا بأكرهه
ليه سيئات كتير إنتي عددتيها واحدة واحدة و متفق معاكي فيها كلها

و ليه حسنات أهمها جعل مصر دولة صناعية و بناء السد العالي
بس انا موافق إن لينا شخصيتنا المصرية المتميزة وسط العرب
إحنا دولة عربية جزء من العرب بس لينا طابع ثقافي مصري متميز

مصري و ليس فرعوني
إحنا مش فراعنة زي ما انتي قولتي احنا مر علينا فراعنة و اغريق بطالمة و فرس و روم و قبطيين و عصور اسلامية من أول عمرو بن العاص لحد دلوقت
مرورا بالدول الأموية و العباسية و الطولونية و الإخشيدية و الفاطمية و الأيوبية و المملوكية و العثمانية فترة تاريخنا الحديث من أول الحملة الفرنسية و حكم محمد علي و عيلته لحد الثورة و رؤساء الجمهورية

يبقى ما ينفعش نقول فرعونية لكن نقول مصرية
شخصية ثقافية مصرية متميزة عربياً و إسلامياً و دولياً لو حكمها من يستحق
🙂



Desert cat says:

بصى يا نسرين انا اساسا لا ناصرية ولا عشت عصره
لكن عندى من المساؤ عنه كتييييير
بداية من تزوير التاريخ لصالحه
وان الملكية كانت وباء على مصر وثورته هو وشوية الزرابيط اللى كانوا معاه فى ذاك الوقت حتى وقتنا هذا مش عارفين نخلص من تبعات ثورته
قال يعنى هو اللى قضى على الوباء والقذارة والحاجات الوحشة اللى اسمها ملكية واحنا من عهده لحد دلوقتى عايشن فى ترف ورفاهيه وتقدم
بلا نييييييييييله



ساعد نسرين الايمن says:

نسرين
انتي كمان مش بتحبي عبدالناصر
ده لولا انك متوصي عليكي من ناس كبيرة اوي كنت رديت عليكي رد
لكني خليني اسالك شوية اسئلة

هل انتي من ضحايا الاعلام المصري؟
للدرجة ديه تاثرتي بمسلسل الملك فاروق ؟

هل انتي رومانسية ؟
هل تعلمين انهو لو دعم وتشيجع ناصر لهم لم ظهر ناس امثل عبدالحليم وام كلثوم بهذا الشكل؟

هل سمعتي عن برج القاهرة ؟
اين يقع مصنع الحديد والصلب ؟
ما هي نسبة دخل قناة السويس من الناتج القومي الاجمالي ؟

بصراحة
ءالا يوجد لعبدالناصر فضل مباشر عليكي انتي شخصيا او احد من اهلك؟
ءالم تسفيدي من مجانية التعليم ؟
ءالم تركبي اي من الموصلات العامة ؟

هل انتي من الاقطاعيين ؟
لو كانت الاجابة بنعم هل قضي عبدالناصر علي كل الاقطاعيين ؟

باي منطق استطعتي ان تحبي السادات والسعودية وامريكا والاخوان ونوال السعدواي والحزب الوطني ومحمد نجيب ومحمد منير ومحمد محي ؟ وتكره الزعيم عبدالناصر؟

هل تعرفي ان النكسة كانت خطا مباشرا من عبدالحكيم عامر؟
هل تعرفي ان عبدالناصر تحمل المسئولية ؟
هل تعرفي انه تنحي؟
وانه عاد الي الحكم بعد سماع صرخات الشعب ؟
هل الاجابة لديك انها كانت تمثلية؟
هل كانت الملايين التي مشيت في جنازته تمثلية ؟
ما حاجة هؤلاء الملايين ان يمثلوا علي رجل ميت ؟

لماذا يسمي عزل بعد اعداء الثورة وسجنهم بعد المحاكمة جريمة في عهد ناصر؟
بينما يسمي ثورة التصحيح في عهدة السادات؟

هل اعجبتك محاولة قتل عبدالناصر ؟
هل اعجبك موقف عبدالناصر من الاخوان ؟
فماذا عن موقف السادات؟
موقف حسني؟
هل انتي حرة ان تكرهه ؟
هل انتي حرة في نشر كراهيته لرجل توفي بعد ان حج وجاهد في سبيل الله بهذا الشكل ؟

هل سمعتي عن شاعر جرئ اسمه نزار قباني ؟
هل سمعته انه مدحه باكثر من قصيدة ؟
هل توجد محاولة لتشوية الرموز ؟
هل سمعتي قصيدة
قلتناك يا اخر الانبياء
وليس جديدا علينا قتل الصحابة والاولياء
فتاريخنا كله عهر
وايامنا كلها كربلاء



Ragi says:

ملحق
اصل انتى يا نسرين ماعشتيش عصر الستينات لما كان الشعب بيعشق الريس وكان متوحد معاه لانه طالع من وسط الناس من طين الصعيد بيتكلم كلامهم وعايش احلامهم وحاول يحقق اهداف الثورة بامانة بدون تهاون
اللى كان بيقوله كان بيحاول يعمله موش زى النهاردة بيقولوا لامساس برغيف العيش وهم عارفين انهم كذابين
عارفه كان عمره حوالى سته وثلاثين سنة لما قامت الثورة وكان عنده خلفية ثقافية رائعة وموقف عن العالم وعن مصر هاتى اى واحد مصرى النهاردة فى السن ده وشوفى قرا كام كتاب فى حياته ولا رايه ايه فى اللى بيحصل فى الكون تلاقى حاجة تكسف
وطهارة اليد طبعا بتدل على انه انسان شريف مؤمن بالمبادىء اللى بيبشر بيها بين الناس الفقراء وكمان كان عفيف يعنى موش بتاع نسوان وده جانب برضه يبين شخصيته الجميلة
لما توفى الى رحمه الله كان واقف بيشتغل بيصلح بين العرب وقلبه لم يتحمل المجهود
انا شفت ورق كان بيكتبه بايده بيحسب تكاليف الحياة للاسرة المصرية من اكل وملابس وسكن وخلافه
وكان مثبت الاسعار
المصريين كان لهم احترامهم فى البلاد العربية وكمان دول العالم
دلوقتى شوفى المصريين بيتعاملوا ازاى عندك فى الخليج
كان عبد الناصر لما يحب يعمل مؤتمر قمه مافيش رئيس ولا ملك ممكن يتخلف عن الحضور
ومصر عبد الناصر اللى عملت مع الهند ويوغوسلافيا حركة عدم الانحياز وفتحت عنين افريقيا واسيا وامريكا اللاتينية على حقيقة الاستعمار ودفعتهم للتحرر
السويس كانت نهاية الامبراطورية البريطانية التى لم تكن تغيب عنها الشمس
اعداء عبد الناصر شهدوا له بالوطنية وبتاثيره الكبير على العالم
امريكا واسرائيل يفرحوا جدا لما مصر تنعزل عن العالم العربى وتبقى فرعونيه او مصرية او بحر متوسطية او اى مسمى اخر طالما بعيد عن العرب
دول الاتحاد الاوروبى متنوعى الثقافة لكن قدروا يتحدوا فى مواجهة امريكا والصين
مصر مع الدول العربية عندهم الخلفيات اللى بتخلى اتحادهم تطور طبيعى للامور
دى يا عزيزتى غيض من فيض زى ما بيقولوا
وانصحك وبهدوء ان حتى بدون التطرق الى عبد الناصر بشخصه وانتى من حقك ما تحبهوش
لكن لو تقدرى تقرى عن حالة مصر قبل الثورة كانت ايه و وايام ناصر كانت ايه والنهاردة هى ايه
الحقبة دى من تاريخ مصر من اهم الحقب لانه على الاقل لاول مرة فى تاريخ مصر يحكمها واحد من ولادها
لكى التحية وارجو ان تكونى بتدفى نفسك كويس فى البرد القارص ده



اسكندراني في الغربة says:

يعني اية مبتحبيش عبد الناصر؟
يعني اية مش حاسة بالانجازات الي عملها؟
يعني اية مش عاوزة تنسي هفوة بسيطة زي النكسة؟
و اية كمية النقد الي كتباها عن الزعيم القائد ؟
دنتي غريبة يا شيخة
—————-
نكلم بجد شوية انت لية مذكرتيش الحسنة الوحيدة الي عملها قبل مايموت
من باب اذكروا محاسن موتاكم
مع ان في اراء بتقول ان حتي اختيارة للسادات كان صدفة بس اهي حاجة تشفعلة عندي على الاقل
—–
الخلاصة انا بحترم عبد الناصر كشخص و لكن كرئيس فالريس متقال ارحم منة

تحياتي



Nsreen Bsunee says:

باشمهندس مصرى
نورتنى
يارب متكونش لسه زعلان من البوست اللى فات

اكيد ناصر ممكن ناس تشوفله حسنات لكن للاسف بالنسبالى سيئاته واخطائه غلبت اى حسنه ليه

العروبه اللى ناصر كان بينادى بيها هى وحده شامله على اساس قيام دوله عربيه موحده مع ان اى ساذج ممكن يفهم ان قوه واساس اى وحده هى فى التميز والتباين والابقاء على الحدود والمنطقه الشرق اوسطيه بالتحديد اهم ما يمكن ان يميزها لو توحدت هى هذه النظم الجمهوريه والملكيه اللى حتعطيها قوه وحيويه للمنطقه كلها

متفقين اننا كمصريين مميزين ومتفردين فى المنطقه جدا حاله خاصه من الثقافه والتاريخ مش موجوده فى اى دوله تانيه فى المنطقه يبقى مينفعش نتجاهل كل ده ونذوب فى المنطقه كدوله عربيه اسلاميه فقط لا لازم نكون واعيين للتميز ده ومستمتعين بتفردنا اللى حبانا بيه الله

ربنا يديم عليك يا باشمهندس الهدوء ودماثه الخلق

تحياتى



Nsreen Bsunee says:

قطه الصحراء

والله انتى جبتى من الاخر يعنى هو ناصر عملنا ايه بلااااا نييييييله

منورانى



Nsreen Bsunee says:

استاذ ساعد نسرين الايمن

يعنى ايه انتى كمان بتحبى ناصر
ليه كنت قتلتك حد قبل كده ولا انت تعرف عنى حاجه عشان تقول البق الحمضان ده
ويعنى ايه انتى لومكنانش متوصى عليكى كنت رديت عليكى رد تانى مش فاهمه يعنى احنا ولا نعرف بعض ولا فيه بيننا اصدقاء مشتركين الحمدلله يبقى الكلام ده ايه معناه يعنى ولا هو استظراف وخفه ع المسا
واساسا حضرتك مسموحلك تقول انا بحب ناصر وباموت فى تراب رجليه وانا مش حاعارضك ولا حاقولك انت غلط لكن لما تدخل تقل ادبك وتستظرف مش حاسكتلك اكيد فا مادام كل واحد بتكلم عن وجهه نظره باحترام يبقى مفيش داعى حد يوصى حد على حد وكلام العيال ده

ياسيدى انا مش من ضحايا الاعلام واضح انك انت اللى من ضحايا الاعلام راجع ردك عندى المره اللى فاتت معندكش غير روبى ونوال السعداوى وكلام التليفزيونات الفارغ ده انا قلت مش بحب نوال السعداوى ولا متفقه معاها بس انت بتقرا العنوان وتقول مادام بتتكلم عن المساواه تبقى بتحب نوال السعداوى ده ايه العله دى يا اخواتى

هههههههههههههه
هههههههههههه
خخخخخخخخخخخخخخخ
لا بجد سخسخت من الضحك
هو عبناصر هو السبب فى ظهور حليم وام كلثوم
يا نهار اسود
وهو السبب فى نجاحهم
امال بليغ حمدى ده من ضحايا الهولوكوست واحمد رامى بياع فطير
يالهوى
انت بقى بتحب ناصر عشان هو السبب فى ظهور حليم وثومه هى الموهبه بقت من عند عبناصر وهو الحكم على الرؤساء بيبقى بالمقاييس دى
لا والله ناصر ده طلع حلو انه خلى الناس دى تغنيله عشان كان عارف كويس ان الناس بتتأثر بالحاجات دى

والله نورتنى الله ينور عليك انا كان نفسي اعرف الناصريين بيحبو ناصر ليه نسيو النكسه والوكسه وبيحبوه عشان حليم وثومه شوف بقى مين ضحيه الاعلام

فى اسئله انت كاتبها ممكن تلاقى اجابتها فى محرك البحث جوجل وانا مش فى امتحان يا بابا احنا هنا ناس بتعرض وجهه نظرها وبتتناقش باحترام

ومين قالك انى بحب السعوديه ونوال السعداوى والحزب الوطنى انت يا اخ بتجيب الكلام ده منين
ولا انا معنديش اى حد فى عيلتى من الاقطاعيين
وعلى فكره انا باتكلم معاك بحده عشان انا مبيستفزنيش ان حد يختلف معايا لكن يستفزنى التهكم والاستظراف والاستهزاء برأيي فا انا باكلمك بالاسلوب اللى انت تستاهله لان واضح من التعليق اللى فات كمان ان ده اسلوبك

ربنا يهدى ويشفى



Nsreen Bsunee says:

استاذ راجى
المناقشه معاك ممتعه
الحقيقه مينفعش نقارن زمن ناصر بدلوقتى مينفعش نقارن سئ بأسوأ لكن لو مضطرين نقارن يبقى على الاقل دلوقتى محدش بيتاخد من حضن اهله ويترمى فى اليمن ويرجع رجله مقطوعه او حتى جثه فى صندوق على الاقل مبندخلش حرب احنا عارفين اننا مش قدها ونضحى بالوف من احسن شباب البلد

طيب انا متفقه مع حضرتك ان ناصر كان مثقف ومطلع مش هو بس كل الجيل ده واللى قبليه واللى قبليه اللى هو الجيل اللى اتعلم ايام الملكيه
الشاب بقى اللى عنده 35 او 40 سنه وميعرفش اى بتاع فى البطيخ ده مش نبته الثوره مش نبته تعليم الثوره(المجانى)
الحقيقه واحقاقا للحق انا عمرى ماقريت لو حتى اشاره الى ان ناصر كان ليه علاقات نسائيه او خمورجى بس كل اللى حواليه واقرب اصدقاءه كانو كده وتحت عينه يبقى هو مش معترض على كده هو بس مش ميوله كده يعنى هو كان مش حرامى بس سايب غيره يسرق تحت عينه مش نسوانجى بس سايب تحت عينه كل اصدقاءه هايصين فى العسل مع نجمات السيما

طبعا سردك وتعليقك كله جميل ومحترم رغم اختلافى مع حضرتك لكن مقدرش غير انى احترم اسلوبك ورأيك



Nsreen Bsunee says:

اسكندرانى فى الغربه زى حلاتى

اه والنبى يا اخويا انا غريبه فعلا لقد صبأت عن دين ناصر

هى النكسه دى هفوه انت ليه بتهول الموضوع النكسه دى غلطه مطبعيه فى الكتب يا راجل

اه والله مع ان اختياره للسادات كان اكيد صدفه وكان لاسباب ملهاش علاقه بذكاء السادات السياسي ولا اى حاجه لكن تتحسبله برضه بجانب انه هو السبب فى ظهور حليم وثومه
ههههههههههههه
ههههههههههههههههههههههه
ههههههههههههههههههههههههه



appy says:

لا حول ولا قوة الا بالله يا بنتى بطلى بقى خناق فى الناس
الا الاول مين الهلوكوست ده ده غير الهولا هوب ما علينا ههههههههههه
بصى يا حبيبى اولا انا بقول على اللى اتعمل فى عهد فاروق انقلاب عسكرى لانه نابع من الجيش مش من الشعب او القاعده لان الشعب مش هو اللى عملها وانا كنت متفقه مع نجيب انه يسيب الحكم للمدنيين مش العسكريين ونضطر نتحف بيه لغايه دلوقتى ونعانى منه ان شويه عسكريين هما اللى حكمنا ميعرفوش غير اوامرك يا فندم وبس ما علينا برضه
بس فى اعتقادى ان عبد الناصر لما عمل قمع لحجات كتير كان قصده يسيطر على البلد لغايه لما تهدى شويه لانها كانت بتتنقل من نظام وحكم وطريقه الى طريقه تانيه وكان فيه ايامها ناس كتير بتحب الملك والعهد بتاعه ومنهم المثقفين وده يعنى عمله لفترة تستقر فيها البلاد.
بس فى النهايه عبد الناصر زى ما ليه مساوئئئئئ كتيررررررررررررررررررررررررررر
له حاجات كويسه نوعا ما
مع انى ككان نفسى مصر تفضل ملكيه بس ليه نفسى ما هى تعتبر دلوقتى كده بس الفرق ان سلاله الملك فاروق او الملوك من عائلات شبعانه ومحترمه نوعا ما انما دلوقتى هقولك كلمه واحده غطينى يا مامى وصوتى عليه
على فكرة انا ولا ناصريه ولا تبع السادات ولا حسنى مبارك ولا الملك فاروق عارفه انا بشجع مين القذافى هههههههههه



Nsreen Bsunee says:

ابى حبيبتى
عامله ايه
والله انت دماغ القذافى ده حبيب الملايين القذافى ده معجزه عصره وزمانه

ضحكتينى والله يا بت وانا ماليش نفس اضحك
بس انا ممسكتش فى خناق حد يا بيبي على يدك اهو انا باتعامل باحترام مع الناس المحترمه لكن اللى داخل يستظرف ويستهزأ بدماغى اكيد مش حاسمى عليه

ورتى يا قمر



karakib says:

قريبا جدا سأقول رأيي فيه
و كم سبب من مشاكل لي و لعائلتي هذا الرجل طوال سنين عديدة
الفكرة تلح بشدة في رأسي عن ان اكتب انني لازلت اعاني من ما فعله بنا ها الرجل
انا لا استطيع ان اقول انني لا احبه
لأني أكرهه بالفعل



kikotalaat says:

سلامووووووووووو عليكوووووو
بصي يا نسرين ؟ مع إني من الناس اللي مختلفين مع عبد الناصر في حاجات كتير جدا ؟؟؟ بس مش للدرجة اللي انتي مصوراها ديه لأنك حسستي بجد اللي بيقرا إنه كان انتهازي وكل اللي بيهمه مصلحته وبس … ومش معني إن محمد نجيب قال الكلام اللي انتي كاتباه ده في مذكراته يبقي الراجل صح وعبد الناصر غلط … لأن بصراحة تاريخنا محرف كله وصعب نوصل للحقيقة

أما بالنسبة لعبد الناصر فأن والدي ووالدتي عاصروا عبد الناصر ومن عشاقه بدرجة غير عادية أنا مستغربها رغم علمهم باللي كان بيحصل في عصره من اعتقالات وخلافه بس كان ردهم دايما عليا إن اللي تحتيه هما اللي كانوا بيعملوا كده وكانوا بيحاولوا يعزلوه عن الشعب

أنا رأي إن ده مش مبرر صحيح بس أكيد عبد الناصر ماكانش بالسوء ده رغم عدم ناصريتي

الموضوع فعلا محتاج صفحات للمناقشة بس بجد هايل انك نكشتيه

كان معكم ..,
كيكووووووووووو



ساعد نسرين الايمن says:

نسرين
اولا اقسم بالله العظيم انني لم اقصد ابدا اي استظراف او قلة ادب
وانني بالتاكيد احترامك واحترم مدونتك
والا لما اكن اضيفها في البلوج عندي
لم افهم تحملك عليا بهذا الشكل اطلاقا فان لم اقصد ابدا ما ذهبتي اليه
انا لم انتقدت وانما سالتك فقط
وقديما قالوا هو السؤال حرم ؟؟
اذكر قصة عن سيدنا عمرو بن عبدالعزيز انه كان يسير مع اتباعه ليلا فدس علي قدم اعرابي نائم دون ان يقصد هذا
فساله الرجل ءانت مجنون فهم اتباع عمرو بن عبدالعزيز ان يفتكوا بالاعرابي
لكن عمرو اجابه لا وانصرف في هدوء ولما ساله اتباعه لما لم تتركه لنا لكي نؤدبه
قال الرجل لم يفعل لي شئ هو سالني وانا جاوبته
وانا لم افعل سوي الاسئلة لكني استحقتيه عليها نقمتك وغضبك
واسمحي لي ان ارد علي ردك عليا
كان كلمك كالاتي
استاذ ساعد نسرين الايمن

يعنى ايه انتى كمان بتحبى ناصر

وانا كنت بقول انتي كمان مش بتحبي

هذه واحدة

ولا انت تعرف عنى حاجه عشان تقول البق الحمضان ده
ويعنى ايه انتى لومكنانش متوصى عليكى كنت رديت عليكى رد تانى مش فاهمه يعنى احنا ولا نعرف بعض ولا فيه بيننا اصدقاء مشتركين

اتهمتي بقي بالحمضان انا الذي استعمل كلوز اب يوميا
هذه ثانية

اتهمتني بالجهل بشخصك الكريم رغم انني اعرفك
وبالمناسبة فيه بينا اصدقاء مشتركين لكني طبعا في حل ان اذكر ذلك علي الملا دون استئذانهم الا انهم يبدون بحرف الميم ماشي

وانتي فعلا متوصي عليك يعني ممكن اديك عيني هو فيه حاجة في الكلام ده تزعل ؟

طبعا انا مش ممكن اكون من ضحايا الاعلام المصري عشان انا مقيم خارج مصر من 8 سنوات ولا اتبع الا بالصدفة
انا اتكلم عن الفن الجيد
الفن الجيد نتج مجتمع جيد
فترة عبد الناصر بالطبع كانت فترة متميزة في جميع المجالات وخاصة العلوم والفنون بينما فترة السادات افزرت فن من نوعية السدح الد امبو
وفترة مبارك افرزت فن من نوعية بحبك يا حمار واركب الحنطور
انا ذكرت عبدالحليم من باب احتضان المواهب ودعمها فماذا احتضن السادات زوجة كارتر ومناحم بيجن؟
ملاحظة هذا سؤال ولا اقصد اي قلة ادب اتفقنا؟

حضرتك ترفعتي عن الاجابة علي بعض الاسئلة وقلتي لي ابحث في جوجل فارجو ان تتكرمي وتذكر لي اي موقع ع النت يجيب علي سؤال الم تركبي المواصلات العامة عشان متهالي لي ان جوجل مقصر في الحتةى ديه
هذه ثالثة

انتي التي قولتي انك تحبي الحزب الوطني في ردك ع تاج ابي
وقولت ع السعودية في السياق انها قوة محافظة وانه لولا امريكا مش عارف كان حصل ايه رجعي كلامك انتي مش كلامي

اوك اعتذر عن الربط بينك وبين نوال السعدواي هذه عندي

ارجو ان ترجع نفسكي في موضوع الاسلوب اللي انا استاهلهده عشان بجد انا مستهليش كده

بالمناسبة اشكر العزيزة صاحبة مدونة ابي علي دفاعها عني وفعلا لن انساك لك هذا الجميل ابي

تحياتي وكل احترامي لك نسرين



Nsreen Bsunee says:

هانى ازيك
ليه كل المراره دى انا منتظره البوست عشان تحكى كل اللى جواك
وصدقنى مهما كان الظلم الواقع عليك محدش يستاهل انه يستهلك مشاعرك فى الكره
اكتفى بعدم حبه بس مع انه يستاهل الكره بس انت متستاهلش انك تكره اى حد ايا كان
والظلم وقع على مصر كلها انت مش لوحدك فى كده بس فيه ناس مسها الظلم بشكل شخصي
نورتنى



Nsreen Bsunee says:

كيكو ايه النور ده
ابقى قعدنى بس مع الحاج والحاجه قاعده وانا اظبطهم
هههههههههه
احنا شعب عاطفى ومش بنحكم عقلنا للاسف

نورت



Nsreen Bsunee says:

ساعد نسرين الايمن
والله كلامك واسلوبك واضحين بالنسبالى وواضح فيهم الاستهزاء من التعليق اللى فات انا مش عاميه

ياسيدى غلطه مطبعيه انا اقصد
يعنى ايه انتى كمان مش بتحبى ناصر

يعنى ايه متوصى عليكى من ناس كبيره ولو مكانش متوصى كنت رديت رد تانى
ده تهديد يعنى
يعنى فى حد حايشك عنى حضرتك

وانا مصممه ان الكلام حمضان لانى مش بحب الكلام المرسل اللى مالهوش اساس
وانتى متوصى عليكى من العميل الف وواحد واول حرف من اسمه ميم
بالزمه مش كلام حمضان

وحضرتك بقى اكتشفت انى بحب الحزب الوطنى
ياحلوللى
من التاج
اكيد بتهزر
يعنى انت فهمت كده من التاج

وفهمت بقى انى بحب السعوديه عشان باقول ان ايام حرب اليمن السعوديه كانت من القوى المحافظه
ياحلولى برضه

وانى بحب امريكا عشان باقول ان امريكا لو مكنتش اتدخلت فى بيروت وعمان كانت حكومه شمعون ومملكه حسين سقطو

كده ابقى بحب امريكا عشان باقول حقايق وبحب السعوديه وبحب لحم الخنزير بالمره
ده ايه الهم ده
ما تقرا كويس قبل ما ترمى كلام مالوش اى اساس من الصحه
وعامه انا مش بحب السعوديه ولا امريكا بس بحب الشعب الامريكى ومش بحب نوال السعداوى وبحب محمد منير ومش بحب روبى وبحب محمد محى وحليم وفيروز وشوكلاته جلاكسي وشويبس
ايه علاقه ده بالبكباشي عبناصر

وايه معنى كلامك ان هل من المنطقى انى احب كل دول ومحبش ناصر
طيب يا سيدى انا مش منطقيه
كل الاسباب اللى ذكرتها فى البوست دى وانا مش منطقيه
استريحت
بس مش بحب ناصر برضه
انا حره
ومغصبتش حد يحبه
يبقى حضرتك تدخل زى كل الساده الافاضل وتقول انا مختلف انا بحبه عشان كذا وكذا
انا عامله التدوينه عشان كده
عشان اسمع اللى بيحبه بيحبه ليييه
واللى مش بيحبه زيي مش بيحبه ليه برضه
مش عشان حضرتك تدخل تستهزأ برأيي وتقولى محمد محى والسعوديه وتسالنى باركب مواصلات عامه ولا لا

والفن الراقى اللى انت بتتكلم عليه ده والمثقفين اللى كانو فى عهد ناصر كانو اتعلمو فى زمن ناصر لا طبعا
اخر الاجيال المثقفه هى اللى نبتت من العهد الملكى والاغانى اللى مش عجباك هى نبت عهد ناصر اللى خسف ام الذوق العام من اساسه والتعليم المجانى اللى انت بتتكلم عليه كلنا شايفيين بعيننا جماله
ولا هو تعليم
ولا هو مجانى
يعنى بلاخيبه
ورغم كده انت حر تحبه او متحبهوش

انت صح انك تحبه وانا صح انى محبهوش وكل واحد حر



ساعد نسرين الايمن says:

نسرين
والله حرام عليكي
ايه القسوة ديه ؟
ايه الظلم ده ؟
ايه الهجومية الشديدة ديه؟
ايه العدوانية اللي مش مبررة ديه؟
ايه العنصرية المضادة ديه ؟

اتذكر انني كنت اكتب دفاعا عن عبدالناصر
واجدني الان مضطر ان اكتب دفاعا عن نفسي

انا لم اقل اطلاقا اي شئ بالنسبة لنظرك وعامة سلامتك عينك من اللفظ اللي انتي كتبه ده

انا لم كتبت وقولت ليك وكمان مش بتحبي عبدالناصر
والله قلت ذلك من فرط احساسي بالالفة معك واننا لا يمكن ان تكون بينا هذه الاختلافات هذا فقط ما قصدته

في حد حايشني عندك
طبعا فيه
انتمائي ليك
انتي مش ملاحظة اسمي
مش ملاحظة انك نسرين وانني ساعد نسرين
طبعا فيه
انك اسمك نسرين

بالنسبة للاصدقاء المشتركين صدقيني فيه وساحاول ان ارسل لك رسالة مع ما اسميته انتي العميل1001 لو وافق سيادة العميل طبعا

وبعدين نسرين هو انتي بتقولي حقائق حلوة وتاريخية وكويسة في حق امريكا والسعودية وعبد الناصر لا ليه ؟
مش عارفة ان الحقائق لا تكيل بميكليين

عامة انا سعيد ان كلامي عن عبدالحليم وناصر خليك تتضحكي
خادمكم المطيع هدفه ارضاءك

كمان انتي قولتي لي

وبحب لحم الخنزير بالمره
وعامه انا مش بحب السعوديه ولا امريكا بس بحب الشعب الامريكى ومش بحب نوال السعداوى وبحب محمد منير ومش بحب روبى وبحب محمد محى وحليم وفيروز وشوكلاته جلاكسي وشويبس

طبعا لو انا اللي قولت كده كان هيبقي استظرف رسمي
بس انتي تقولي عادي يعني

عامة انا مش هاعمل زيك وازعل بالعكس
باستثناء موضوع لحم الخنزيز ده انا كمان بحب محمد منير ومحي وحليم وجلاكسي والشوبيس وكشري ابو طارق

بالمناسبة هو ايه اللي دخل لحم الخنزيز في الموضوع
وده ليه علاقة بحبك للسادات ؟

عادي من حقي اقول اني مش بحبه

قصدت بحديثي عن المنطق انه صعب ان يحب احد السعودية وامريكا عشان المفروض انهم مختلفين ولو كان قلبك كبير لدرجة انك تحبي ناس متباين اختلافهم لهذا الحد فليه بالمرة مش تحبي عبدالناصر معهم
هي محبتك بتيجي عند حرف العين وتفرمل ؟

لم افهم اطلاقا كيف خسف عهد عبدالناصر بالذوق للارض
مش عارف بس كل روائع يوسف ادريس ويحيي حقي والسباعي ونجيب اتولدت في هذا الوقت
حتي احمد رامي ما اشتهرتيش الفطير بتاعه الا في تلك الايام
طبعا لن اتكلم هنا عن الشوراع ونظافتها وعن روح الانتماء لكن بجد يا ليت بليز تسالي اي حد عاش الفترة ديه

نسرين
بجد مندهش للهجوم عل شخصي المسكين
وانا علي استعداد امام جميع الناس ان افعل ما يرضيك دون تغيير ف الاراء او المبادي قطعا

وفي النهاية ارجو ليك كل توفيق وازدهار
وارجو ان تتشرفي اليوم بزيارة مدونتي المتواضعة

ذراعك اليمين
ساعد نسرين



يَحيى المِصري says:

😀
😀
😀



S H A H says:

بونجووور
=======
انا لقيت الحوار هنا الحقيقة عالي جدا, و لو مكنتش قريت الموضوع و التعليق كله كنت افتكرتكم شاربين

مش هقدر اخش في مناقشة تجنبا للتلطيش, انتي ليه مزعلة الساعد الايمن كدة؟

والله انا حبيته



HafSSa says:

كلامي موجه لكاركيب
ممكن لو سمحت تنزل البوستات اللي بتقول عليها دي و تكتب قصة عبناصر مع عيلتك او الضرر اللي حصلكوا منه
دي شهادة للتاريخ و مينفعش تحجب لو سمحت

نسرين
كان الله في العون
و تاني و تلات و رابع يسلم فمك يا استاذ نفيسة



HafSSa says:

يحيي
انت تموت انت في الخناقات دي عاوز خناقة و تشبع فيها ضحك



DantY ElMasrY says:

كنت أقدم تقريرا عن عملى يوما ما لمديرى الألمانى توماس بوردين
وكان واضح انى بذلت احسن ما عندى وكان هو مقدرا لصعوبة ما ألقاه على من مهام
ولكن عدم رضاه كان واضحا على وجهه
عندما قال بانجليزية واضحة
I m not intersted in manners ‘I m intersted in results.



Nsreen Bsunee says:

ساعد نسرين الايمن
خلاص فهمت ان حضرتك بتحب ناصر الفكره واضحه وحضرتك حر وانا باحترم وجهه نظرك

نورت



Nsreen Bsunee says:

ممممممممممممم
ماشي يا يحيي
اضحك



Nsreen Bsunee says:

شاه
كنت عاوزه اسمع رايك
بس منور برضه



Nsreen Bsunee says:

صفصف
منوره
واضم صوتى لصوتك ان هانى لازم يكتب عن اللى حصله هو وعيلته
ربنا يخليكى يارب
شفتى يحيي يموت فى الخناق



Nsreen Bsunee says:

دانتى
يا استاذي حضرتك دايما بتقول المختصر المفيد
نورت جدا



MerMaid says:

الله يخرب بيت جمال علي السادات علي مبارك

كلهم ازفت من بعض

تحياتي
انا ضد الثورة عموما و عصر الملك اكيد مكنش اسوأ من العصور اللي بعده



Fantasia says:

يا لهوي يا نسرين! دا انتي شلفطي الراجل حرام عليكي
هههههههه

بصي أنا شخصيا مش مقتنعة ان تقييم اداء الحاكم يدخل فيه موضوع الحب والكره. وأنا رغم كل مآخذي على عبد الناصر إلا إني لازم أوفيه حقه ف الايجابيات الكتير اللي حصلت في عهده. كفاية بس أقول ان أهلي كانوا عمرهم ما هيدخلوا الجامعة في ظل النظام الملكي. يعني كان بكتيري أوي أكون اتجوزت وأنا عندي 14 سنة وعندي دلوقتي 8 عيال, وبربي فراخ فوق السطوح. حتى الفراخ كان ممكن يجلها انفلونزا طيور تاخد أجلها وأقعد أنا أنش جنب طابور العيال

فأنا جيلي كله مديون للثورة. والتنمية اللي حصلت في مصر بعدها هي اللي عملت الطبقة الوسطى اللي معظمنا بننتمي إليها

مقدرشي أقول إني ضد الثورة, أو الانقلاب لو عايزة تسميه انقلاب. ولا أقدر أقول الملكية كانت أحسن. أحسن لمين؟ للعيلة المالكة؟ طب أنا أهلي أصلهم من الريف. يعني طموحي في ظل الملكية كان يبقى إني أشتغل خدامة في قصر من قصور الملك. حد فينا كان ضامن انه هيتولد يلاقي نفسه إبن باشا؟

انما الأغلبية المصرية كانت عايشة إزاي؟
كانت فرصها للترقي الاجتماعي تقريبا معدومة

أما بخصوص التحليل لشخصية ناصر وتأثير دا على قراراته, فأغلب اللي قلتيه صحيح. يعني الكاريزما اللي كان يمتلكها بالفعل, كان بيضخم فيها بالأداء المسرحي. وأنا شايفة إن موضوع الأداء المسرحي دا هو اللي ماشي لغاية دلوقتي, بس بدل ما بيقوم بيه النظام, بتقوم بيه قوى المعارضة اللي معندهاش حاجة تعملها, فبتعوض إفلاسها بالأداء المسرحي التراجيدي والحنجورية والمهلبية اللي انتي عارفاها

الشعوب عندنا لسة شعوب عاطفية. بيأثر فيها الكلام أكتر من الفعل. وتدني مستوى التعليم بيساهم في وجود الشخصيات اللي بتستغل امكانياتها المسرحية في الصعود والزعامة. لان الناس مش بتقدر تحكم على السياسات المطروحة بموضوعية
دي ظاهرة موجودة في كل الدول النامية

وبرضه أنا معاكي إنه كان متهور, وعنده تضخم ف الذات. فيه حد حكمنا مكنشي عنده تضخم ف الذات؟
وبعدين الناس عندنا مش عارفين هما عايزين إيه. ساعات تلاقي اللي يقولك نحارب اسرائيل, ويطلعوا ف مظاهرات
وهما عارفين كويس ان دا مش ممكن, وإذا حصل يبقى إحنا بننتحر انتحار جماعي. لكن أهو نحارب وخلاص. وكله كلام برضه

لا عاجبهم فرد العضلات بتاع ناصر, ولا عاجبهم اننا رجعنا أرضنا, ولا عاجبهم العقل والواقعية بتاعة السياسة الحالية.
ماتفهميلهمش!
بيتهيألي هما نفسهم مش عارفين هما عايزين إيه
عايزين يهدوا شوية التنمية العمي اللي عملناهم بطلوع الروح, علشان نحط راسنا ف بق الأسد؟ ولا عايزين سلام وتنمية, ونكبر عقلنا من محاولات الاستفزاز وجر رجلنا اننا نحارب بالنيابة عن غيرنا؟ ولا عايزين بس حد يقعد يخطب فيهم ويقولوهم أوهام زي القذافي مثلا؟ متعرفيش

دا إحنا شعب يتفاتلوا بلاد يا شيخة
ههههههههه

ف اللآخر مش شايفة إنك ظلمتي ناصر في تحليله الشخصي, لكن شايفة إنك تناولتي السيئات بس. يا ستي اذكروا محاسن موتاكم. أهو برضه علشان الناصريين مايخدوش على خاطرهم

أحب أسجل إعجابي بشجاعتك في طرح وجهة نظرك
خالص تحياتي



Nsreen Bsunee says:

فانتازيا
ياعزيزتى انا مش بادافع عن الملكيه باى شكل من الاشكال ومتفقه معاكى فى كتير من اللى قلتيه لكن كل اللى عاوزه اقوله ان الثوره كانت حتحقق اهدافها وكان حال البلد حيبقى غير لو مكانش ناصر واصدقاءه اتعاملو معاها على انها سبوبه لتحقيق مصالحهم الشخصيه وصدقنى الحاله الكرب اللى الطبقه الوسطى فيها دلوقتى هى نتاج غباء ناصر وحنجوريته اللى انا وانتى بنتكلم فيها
بالنسبه للتعليم والجامعات فا اسمحيللى اختلف معاكى لانى ضحيه من ضحايا التعليم فى مصر التعليم المجانى اللى اخد جزء من مخى بلا رجعه لكن بصى كده لكل الكتاب والشعراء والمثقفين والعلماء الكبار فى مصر حتلاقيهم نتاج تعليم ما قبل الثوره ماظنش اننا حنختلف ان من عهد ناصر مرورا بالسادات واخيرا مبارك الذوق العام والفن و التعليم فى النازل لدرجه ان الواحد يظن ان فيه مؤامره لتهميشنا وتسطيحنا
وتانى يا فانتا ده مش دفاع عن زمن الملكيه خالص لكن كل اللى باقوله ان الثوره بسبب ناصر محققتش اهدافها اللى المفروض كانت تحققها للمصريين بالعكس استهلك مصر فى حروب مجلناش
من وراها غير الخراب
شجاعه ايه بس ده من بعض ما عندكم يا فانتا
نورتى واثريتى المناقشه كالعاده



Alexandrian far away says:

الصديقه العزيزه نسرين
صباح الخير والورد والياسمين
نهارك أبيض زي الفل واللبن الحليب
حلوه التصبيحه دي؟
طيب أرجوكي ما تنسيهاش وأنتي بتقراي بقية التعليق
مبدئيا في أول مرة دخلت فيها لمدونتك تعجبت من درجة إتفاقنا حول الكثير من التفاصيل التي تضعين صورها على يسار المدونة كأفلام أو فنانين أو حتى سياسيين ، ما عدا صورة واحدة، هي صورة ذلك المدعو السادات، لكني قلت لنفسي: عيب كده، بطل عادتك المنيله في أنك تبدا التعارف بالأختلاف، مش مهم، مجرد جزئيه ممكن تجاهلها، المهم دلوقتي
عبد الناصر
الحقيقه أنا لست ناصريا ولم أكن ولن أكون أبدا
ولن يورطني اي شخص في العالم للدفاع عن عبد الناصر، كتبت من فترة تدوينة عنه ربما توضح قرأتها موقفي منه

http://awayofalexandria.blogspot.com/2007/09/blog-post_30.html

المهم
أنا لست ضد الهجوم على عبد الناصر ولست ضد الدفاع عنه كذلك
فشخصية بهذه القامة والأهمية ستبقى دائما محور للخلاف والنقاش والحوار
ويمكن مهاجمته طبعا فأنا ضد تقديس أي شىء على الإطلاق، خصوصا السياسيي
أنا مسحت تعليقي الي فات لأنه كان عدواني شويه
معلش
أنا دماغي بتبقى عدوانيه الصبح عادة
أعتقد أنه فانتازيا قالت ما كان ممكت أقوله وبشكل أفضل مني حتى
فاضل نقطتين بس
الأولى: أنا رأيي أنه كان يجب إعدام فاروق والعائله المالكه كلها وطبقة الباشوات الأقطاعيين عن بكرة أبيها

الثانيه: محمد نجيب كان اضعف كتير من أن يقود مصر أو الثوره وكان فعلا يجب التخلص منه

تحياتي



Nsreen Bsunee says:

صباح الورد صديقي واستاذي وبلدياتى

انا قريت الموضوع اللى حضرتك كتبته والحقيقه من اجمل اللى قريته عن ناصر والمشاعر المتضاربه من جيل معين حبه بقلبه واختلف معاه بعقله

انا مدافعتش عن الملكيه وده مش نفى لانى شايفه فى العصر الملكى بعض الايجابيات والكتير من السلبيات لكن التدوينه دى ملهاش اى علاقه بالعهد الملكى ولا انا ضد الثوره لكن انا ضد رجال الثوره والسياسه اللى اتبعوها من قمع واضطهاد لاى صوت معارض وصدرو الاسلوب الديكتاتورى والصلاحيات الغير محدوده لرئيس الجمهوريه وتهميش الاحزاب السياسيه وقمع الحريات وانتهاك الدستور للعصور اللى تلت عصر ناصر حتى اصبح التخلص منها شبه مستحيل فى ظل معارضه كاريكاتوريه زى اللى عندنا
وموقفى من ناصر مش تاثير مسلسل تلفزيونى انا ولله الحمد مش شخصيه تلفزيونيه ابدا ولما باشاهد التلفزيون بتكون يا افلام وثائقيه يا اجنبى عندى حساسيه غير قابله للعلاج ضد الدراما والتلفزيون العربى
كنت متأكده من ان حضرتك مش بتقبل السادات مش عارفه بعد تصفحى لمدونتك القيمه كنت متأكده من كده
لكن حبى للسادات شئ يطول شرحه وله اسباب غريبه ومش منطقيه لكن ده ميمنعش انى عارفه اخطاءه قبل حسناته

والحقيقه انا مش عارفه حضرتك استنتجت ازاى انى منحازه للملك الحقيقه غير كده خالص انا منحازه لمصر مش اكتر لا يعنينى ملك او مملكه انا فى اختلافى مع ناصر اعترف بانى تاثرت بكتب وكتاب معينيين لكن ده ميمنعش انى حكمت عقلى حتى اصل لهذا الاقتناع بان خراب البلد ابتدى من عهد ناصر اللى عهد مبارك هو بلا ادنى مبالغه امتداد ليه وشايفه ان مصر دفعت تمن غالى اوي مقابل ما قدمه ناصر سواء مجانيه التعليم-اللى اصبح حاليا لاهو تعليم ولا هو مجانى- او السد او تاميم القناه اللى كانت بعد 12 سنه حتنتقل ملكيتها لمصر تلقائيا بدون جعجعه وعنتريه فارغه
انهك ناصر مصر بالحروب وتدخل فى شؤون الدول العربيه بشكل مستفز ويفرس بصراحه لكن انا باحترم حب اى حد ليه
وموقف حضرتك منه بالتحديد موقف موضوعى محترم انا اتعلمت منه انى بعيدا عن عواطفى لازم انظر للتاريخ بشكل موضوعى اكتر

نورت ياصديقى



Nsreen Bsunee says:

صديقى العزيز
انا لم اجد فى تعليقك السابق اى عدوانيه هل يعتبر توجيه ونصح الاستاذ للتلميذ عدوانيه



Nsreen Bsunee says:

عزيزى alex far away
اسمحللى اطلب من حضرتك المرور بمدونه الغاليه على قلبى فانتازيا وتتفقد المناقشه فى موضوعها الخاص بالبرلمان الاوروبى اتمنى ان يسمح وقتك ان تعلق على المناقشه ايضا لانى الحقيقه مبهوره بعقليه فانتازيا وحبيت اشاركك انبهارى ده
تحياتى



Nsreen Bsunee says:

ميرمايد يا حبيبتى فعلا تحسي ان مصر اتظلمت فى كل العصور وهى مملكه وهى جمهوريه مظلومه برضه لدرجه انى ابتديت اظن ان العيب فينا يعنى جمال كان فيه اللى بيحبه واللى مش بيحبه كذلك السادات طيب مبارك مفيش حد بيحبه والحال من سئ لاسوأ صابرين عليه ليه متهاونين ومطاطيين البصله ليييييه
شكلنا العيب فينا مش كده



DantY ElMasrY says:

عندى ملاحظتين على المناقشة
اول واحدة :
إن الناصرى دايما يبدأ كلامه بالتبرؤ من عبناصر
يعنى تلاقيه داخل يقول:”رغم انى مش ناصرى لكن احب اقولك على حاجة …كيت وكيت وكيت “
دى تفسيرها ايه فى علم النفس ؟؟؟؟؟؟؟؟
تانى حاجة :ان رده بيكون دايما فيه مقارنة بينه وبين رئيس آخر
يعنى بيحب ناصر كرها فى فاروق
أو عندا فى السادات
لو عاوزين نعمل تقييم لناصر
يبقى لازم نقيمه لوحده بمعنى :ماذا حقق مما أعلنه من أهداف
وكيف استلم الوطن وكيف تركه ؟



Nsreen Bsunee says:

استاذ دانتى
انا مقدرش اتحدث بالنيابه عن الناصريين لكن اعتقد ان فيه فعلا فئه غير ناصريين ومعترفين باخطاء ناصر كويس لكن متعاطفين معاه او بيحبوه من مبدأ الاعمال بالنيات
وانا تعمدت رغم حبى للسادات عدم ذكره او وضعه فى جدول مقارنه مع ناصر
وزى ما قلت رؤيتى لسياسه ناصر ملهاش علاقه لا بالملك ولا بالسادات



Fantasia says:

حبيبتي نسرين
مش عارفة أقولك إيه على البقين الحلوين اللي قولتيهم في حقي, الصراحة يعني أخجلتونا يا فندم. وعملتيلي دعاية بمليون جنيه. طب أردلك الدين دا ازاي؟ دا حتى لو تقسيط على 50 سنة مش هينفع.. ربنا يديكي طولة العمر
أقل حاجة أقولهالك اني اكتشفت دلوقتي بس ان الصين وحشة
🙂
وحشة أوي كمان

ميرسي ليكي يا قمر. وبقولك إيه, موضوع التعليم دا خليه لوحده خالص. لحسن أنا لو اتفتحت فيه مش هنخلص يا أوختشي. دا أنا كاتمة ف قلبي وساكتة

تحياتي وشكري وامتناني



محمد المصري says:

يا نهار أبيض !

الموضوع بقاله أسبوع وأنا معرفش عنه حاجة ، طب يا جدعان تنويه ولا ميل ولا أوفلاين ميسدج !

طيب يا نسرين أنا لسه مقرتش لا البوست ولا الكومينتس ، ومش هينفع دلوقتي عشان الماتش كمان تلت ساعة 🙂

هقرا كل الكلام بشويش ولو فيه حاجة ممكن أضيفها يبقى هرجع تاني أكيد



Alexandrian far away says:

الصديقة العزيزة نسرين
تحياتي
الحقيقة أخجلتني بكلماتك الرقيقة ومديحك
وأولا أسمحي لي أؤكد أن رايك لم يكن ما أستفز عدوانيتي، لكن أراء أخرى كتعليقات على تدوينتك، ما يضايقني في الهجوم على عبد الناصر والثورة هو الهجوم من موقع اليمين ، أو دفاع عن النظام الملكي البائد وهم يقصدون أنظمة ملكية حالية، أو مهاجمة راسمالية الدولة التي اقامها كمدخل لمدح راسمالية مصاصي الدماء الحاليه

على فكره أشكرك على دعوتك الكريمه لدخول مدونة فانتازيا
لكن كنت سبقتك ودخلت وقرات وأعجبت وعلقت كمان

تحياتي



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: