Nisreen85’s Blog











{January 19, 2008}   كما قالو فى قديم الزمان اول تاج زى اول بوسه

دخلت مجلس الشعب من اوسع ابوابه ايه هو رمزك؟؟؟
التك تك

كنت تفضل الدخول مستقل ام تتبع حزب معين؟؟؟
اتبع الحزب الوطنى انا بحبه اوى وبحب جمال وابو جمال وخديجه وكل الناس العثل دى

اذا دخلت مستقل هل توافق على التسجيل للحزب الوطنى بعد نجاحك كمستقل؟؟؟
قلنا من الاول حندخل مع الحزب الوطنى العثل مع الناس العثل

ايه اول حاجه حتعملها لنفسك ولاسرتك؟؟؟؟
حاشترى شاليه فى مارينا وحاغير لماما عربيتها ولاخويا وحاشترى ارض وحاغير عربيتى وحاعين ولاد خلاتى فى وظايف محترمه وحاعمل عضويه فى نادى سبورتنج وحاشترى ساعه لقلبك اللى فى سيدى جابر ع البحر واعملها بار وضرب نار وحاسافر جنوب افريقيا فى 2010 انا وكل عيلتى وصحابى عشان نتفرج على كاس العالم وحاجات تانيه كتير اى حاجه حاقدر اعملها حاعملها

ايه اول شئ حتعمله لاهل دايرتك؟؟
ممممممممم بما ان دايرتى هى سموحه فى اسكندريه وهى ارقى مناطق اسكندريه وفيها ظباط ومستشارين وحبشتكنات فا الدايره معندهاش اى مشاكل ولا فى النضافه ولا فى سفلته الشوارع ولا اى حاجه عندنا افضل المولات والخدمات ومش ناقصنا حاجه بس ممكن اعمل نايت كلب وبار

قعدت فى المجلس جنب نائب مميز من هو النائب؟؟
هى مش شاهيناز اتجوزت برضه وربنا كرمها وسابت المجلس الموكوسه يا خساره كنت عاوزه اقعد جنبها اهو الواحد كان خمس معاها فى سجاره ميريت واتكلمنا ع البت فيفيان اللى ضربت حسام بالقلم فى بودا بار يا خساره يا شاهنده
هى شاهنده ولا شاهيناز البعيده

قدمت سؤال للحكومه ايه هو السؤال؟؟؟
ازيك يا حكومه عامله ايه وايه اخبارك الحياه حلوه وكول ولا فيه حد مضايقك يا حبيبتى ومنغص عليكى حياتك اوعى يا حكومه شويه الاضرابات والمدونات والملوخيه يكونو شوشرو عليكى يا قطه انا عرفاكى مكبره دماغك كيك كيك ومبيهمكيش استمرى يا حبيبتى وانتى قافشه يعنى ان الشعب طيب ومش بيشيل بينسي على طووول باي يا حكومه على موبايلات يا روحى

طلب احاطه موضوعه ايه وبتقدمه لمين؟؟؟
ممكن اقدم طلب احاطه لاصدار قرار بمنح الجنسيه المصريه لجاد شويرى تقديرا لمجهوده فى اغنيه مصريه مصريه مصريه عيونها ليا مصريه مصريه ياى بحبه اوى جامد موت لازم يدوله الجنسيه ده موهوب كيك وبيحب المصريات اوى موت اخ بحبه بحبه ادوله الجنسيه بقى اشمعنى لطيفه يعنى دى وحشه جاد حلو بحبه بحبه يااى عليه قمر

استجواب لاتنين من الوزرا بتستجوب مين وموضوعه ايه؟؟
لا لا كل الوزرا حبايبى بحبهم موت دول فانيين روحهم عشان الشعب وبيستحملو اللى محدش يتحمله ازاى يعنى استجوبهم هو انا معنديش احساس ولا ايه
بس عاوزه اسال وزيره القوى العامله انتى ليه مش بتعملى ريجيم عشان صحتك يا توته وياريت تقلعى النضاره دى وحشه اخر حاجه وتعمل عمليه ليزر عينيها حلوه اوى وانصحها بعد ما تقلع النضاره تشترى قلم كحل ديور الجديد وماسكرا ا فوليوم تريبل اكس من لانكوم حتبقى موز موز على ضمانتى

هل انت مع الخصخصه؟؟
انا مش معاهم انا معاكى مطرح ما حتروحى وراكى يا خصخصه

هل تؤيد قطع العلاقه مع اسرائيل؟؟؟
لا طبعا انا مع التطبيع لازم كلنا نحب اسرائيل ونؤيدها ونشجعها اسرائيل حلوه وفلسطين حلوه والصين وحشه وحشه مش بحبها اصلى جبت جلابيه بارتى صينى عملتلى حساسيه والتهابات لا لا الصين وحشه لازم نقاطع الصين

هل تؤيد الحرب على العراق؟؟
طبعا اؤيد الحرب على العراق ده شعب وحش ودموى من يومه وميجيش غير بالجزمه وانا احب اؤيد دابليو بوش لانه ابن بار بوالده وبعد السنين دى كلها قدر ينتقم لبابا بوش الكبير من صدام والعراكيين واتمنى ان يقتضي دابليو جيمى بدابليو بوش وينتقم فى يوم من الايام لوالده من هذا الشعب الجاحد المفترى اللى بيشتم بابا حسنى وماما سوزى لازم يا جيمى تنتقم مع ان بابا مش مستنى حد ينتقمله وبيخلص اول باول بس زياده الخير خيرين

هل تؤيد مرور الامريكان من القناة؟؟؟
انتم ليه مش فاهمين انا نائب حزب وطنى يعنى تم برمجتى على التأييد بس حارد عشان اريحكم
ايون اؤيد مرور الامريكان من القناه والقناه حق شرعى للامريكان وسر بينى وبينكم القناه اللى حفروها الامريكان بس محدش يعرف ده سر من الاسرار العليا بس انتم حلوين وانا مش حاخبى عليكم

هل انت مشترك فى مؤامره كسر فرنسا هانم بالاشتراك مع ام دبوه؟؟؟
الحكيكه انا نائب مسالم لا اشترك فى اى مؤامرات انا احب كل الناس
الا الصينيين مس بحبهم دول وحشين وحشين

بتمرر التاج ده لمين؟؟؟
الحكيكه انا مش عاوزه ادبس حد بس احب امرره لصديكى العزيز مدرب فريق نجع عبدالرسول وهو عارف نفسه
وصديقى الشرز المفترى مصطفيتش
وصديقى الاسكندرانى اللى عنده امتحانات دلوقتى ولازم اعطله لانى لا اؤيد الدراسات العليا خاصه لطلبه كميونيكاشنز جامعه اسكندريه
وصديقتى المتجمده فى القطب الشمالى فى قطر حفصه
والاستاذ راجى

ومرسي للاموره ابى اللى باصتلى التاج ده نردهالك فى الافراح يا اختشي0



غمض عينيك says:

بصي…هاقولك حاجة
انا شفت التاج ده من شوية في احدى المدونات..وكانت الاجابات عليه مثالية جدا..بس انا قلت لنفسي التاج ده مايتردش عليه الا باسلوب معين

وسبحان الله نفس الاجابات اللي في دماغي لاقيتها عندك
بس بخفة دم زي العسل

اول زيارة ليكي وشكلي هفضل قاعدلك هنا علطول
عن اذنك بقا الف وادور في مدونتك اللذيذة كما اتوقع

محمد سمير



مصطفى اسماعيل says:

هههههههههههههههه
هههههههههههههه
هههههههههههههههه

مسخرة

اهو داخلة دماغى ميريت دى
صدرى قفل من الكليوباترا

تشترى قلم كحل ديور الجديد وماسكرا ا فوليوم تريبل اكس

انا امى بتجيب الحاجات دى برده
بس من دكان عم عبده الخردواتى
البت حنان اللى شغالة هناك بتعملها ديسك او نت
او الاتنين مع بعض
🙂

بس انتى قولتى اللى احنا عايزينه
هقول ايه انا دلوقتى ؟



مصطفى اسماعيل says:

وسرق سمير منى التعليق الاول

الحق استخبى فى تدوينة دلوقتى يا سمير علشان انت ضايقتنى
🙂



appy says:

هى دى تعرف ديورررررررر الله يجزيكى يا شيخه كده ضمنت انك تدخلى معايا السجن فى مارينا متنسيش مايوهات بقى ههههههههههههههههههههههههههههههههه



مهندس مصري says:

إنتي قالبها كلها ضحك و هزار و تريقة
🙂
واضح انك ماشية على مبدأ من خاف سلم
براحتك يا نسرين بس مش ده اللي كنت متوقعه منك
:I



مهندس مصري says:

آه صحيح قولي لي عرفتي نجع عبد الرسول منين ؟



Desert cat says:

تصدقى انتى هتبقى نائب محصلش فى التاريخ كله احنا صحاب بقى علشان تظبطينى معاكى فى كاس افريقيا



Nsreen Bsunee says:

محمد
يا سلام على الاطراء الجميل بس للاسف المدونه مش حتكون عند حسن ظنك حيكون معظمها كئيب لانى شخصيه كئيبه خلقه

مستنياك على طوووووول

سلام



Nsreen Bsunee says:

مصطفى

ههههههههههههههه
اى خدمه يا احلى دماغ عليا

كليوباترا ايه الله يخرب بيتك انا مدونتى ممنوع تدخين الكليوباترا فيها

لا اسمح بالفلتر الابيض الا لو كان kent

انت حتجرى ورا الناس هنا وتجيبهم من قفاهم

يا حبيبي المهم ان انا شايفاك اول تعليق بقلبى مش مهم اللى شايفاه عينى

lol
سلام



Nsreen Bsunee says:

اابى

زنزانه واحده يا اختشي من ام سرير بدورين بس انا حانام فى السرير اللى فوق

منورانى يا حبيبتى



Nsreen Bsunee says:

عزيزى باشمهندس مصرى

منور

يا عزيزى انا مش باخاف غير من اللى خلقنى الحمدلله

بس حضرتك مفهمتنيش

انا قلت كل اللى عاوزه اقوله بسخريه

والتاج ده ناس كتير عملوه ومنهم انت بمنتهى الجمال

وانا ليا اسلوب مختلف قلت بيه رأيي

واتمنى ان حضرتك تقرا البوست تانى وتقولى فهمتنى ولا لا

انا يهمنى انى اكون عند حسن ظنك

تحياتى



Nsreen Bsunee says:

desert cat

طبعا صاحبتى ومعايا على الطياره الخاصه يا قطتى

بتشجعى البرازيل ولا الارجنتين

🙂



Ragi says:

يخرب عقلك ده انتى قضية
دمك شربات



يَحيى المِصري says:

هههههههههههههههههههههههههههههههههه

جامدة جدا يا بنتي
عثل عثل يعني

هاجاوب ع التاج ماشي
بصفتي نائب مجلس الشعب عن نجع عبد الرسول
مش بس مدرب فرقة نجع عبد الرسول

و بعدين يا فقرية لما تقعدي جنب شاهيناز أقصى أحلامك سيجارو ميريت طب قولي سيجار و لا كورس معسل



مصطفى اسماعيل says:

واحد صاحبى كان بيقول فى مرة
ان السجاير اللى بااقل من خمسة جنيه بتجيب عقم
على اساس ان اللى ازيد من خمسة جنيه
بتجيب الاوربى

الكنت بتجيب زعل
وبتخلينى اجيب ناس تزعل

خلينا فى ابو اتنين ونص احسن

…………..
وجائتنا تلك المداخلة من الاستاذ يحيى ــ “لو متضايقة من كليوباترا اعزمى عليه بكنت ولا حتى ميريت”
…………..
شكرا اخ يحيى من القاهرة

فاصل ونعود
🙂



Nsreen Bsunee says:

ربنا يخليك يا استاذ راجى من ذوقك

بس لازم تعمل التاج برضه لا مفر

تحياتى



Nsreen Bsunee says:

يحيي

ده انت اللى ثكر وعثل يا سياده الكوتش النائب

انا متوقعه منك ابداع ابداع فى التاج ده

الفقرى فقرى من يومه يا اخويا عندك حق والله فاتتنى دى بس باحس ان الميريت فى انوثه ومناسبه للقاعده الحريمى ممكن لو عز الدخيله معانا نبقى نشوف حكايه السيجار دى



Nsreen Bsunee says:

مصطفيتش
لا يا عم عقم ايه تف من بقك يا راجل حريم اسكندريه حيعملو ايه من بعدك ده انت اخر قطعيه
🙂

حد يزعل من الكنت برضه
طيب زعلام من التلاته
اشرب السته
زعلان م السته
اشرب التسعه واحرق قلبك عادى

الاخ يحيي من القاهره
لو سمحت وطى التلفزيون واسمعنى من التليفون

بس كده يا مصطفى مفيش اسهل منها ادعيللى بس انزل اسكندريه وانا اجيبلك معايا تشكيله متنوعه من اجود انواع السجائر والسيجار حاجيبلك مؤونه شهرين تلاته كده

ياريت كل الناس زيك كده ده انا عندى ازمه عويصه فى موضوع التذكارات والهدايا وانا نازله محدش بيعجبه حاجه بس حوار السجاير ده جامد محدش مبيفرحش بالسجاير ومفيش اسهل منها هنا كانت تايهه منى فين دى

بمناسبه السجاير هنا فى الكويت السجاير كلها سواسيه يعنى مفيش سجاير صناعه محليه المارلبورو مستورد والكليوباترا مستورد برضه فبالتالى اسعارهم متقاربه جدا تقريبا نفس السعر 400 فلس حد ادنى و450 فلس حد اقصى
يعنى زى النص جنى كده بالنسبه للكوايته

بس برضه تلاقى الفلاحين والصعايده يدخلو يشترو الكليوباترا السوبر طيب لييييييييييييييييييه نفسي اعرف قدامك الكنت والمارلبورو والميريت واشكال وانواع وسجاير فرنساوى بتجيبو الكليوباترا ليه يا مصريين نفسي افهم يعنى هى مش ازمه سعر ما هو نفس السعر

تبقى خدمتنى لو قلتللى السر يا مصطفيتش يا اخويا بما انك صايع دخان قديم

واشكرك مقدما على المعلومات القيمه
وربما نعمل بوست خاص لدراسه هذه الظاهره المتفشيه فى الصدور المصريه

تحياتشي



مصطفى اسماعيل says:

هو الزعل بيجى من تمنها حضرتك مش اكتر

……
بس بجد اسعارهم واحدة
يادى الهنا
ربنا يجعلنا من بركات الكويت

بصى
هو فيه احتمالين
انهم بيجيبوها من حتت معينة بسعر اقل باعتبارها مصرى

او لو كانوا بيجيبوها بنفس السعر يبقى علشان الحجم
هتلاقيهم بيجبوا سوبر مش كليوباترا
لأن السوبر مشهورة فى مصر انها سوجارة الموظفين
سوجارة اطول من العادية
وتقعد معاكى كتير

يعنى لو انت موظف ومصاريف السجاير يادوب يبقى تجيب سوبر علشان العلبة تقعد معاك وقت اكتر

واقول قولى هذا واستغفر الله لى ولكم
والسلام عليكم ورحمة الله وبركاته
” تتر نهاية حديث الروح “
🙂



HafSSa says:

انتي عارفة انا منقطعة عن التدوين بس مش التعليقات
لكن اوعدك اني احاول ارد في اقرب فرصة بعد عودة الفاصل الاعلاني
المشكلة هي بقى اني كمرشحة معندي شاي خطط بتاتا
كله بالبركة
انا ليا مقولة مشهورة جدا
اني لا اخطط و لكني لا افقد الامل
المصيبة دلوقتي اني فقدت الامل فمتنتظريش مني حاجة كمسؤولة
عاجبك ؟ حترشح
مش عاجبك حترشح برضو و اديني وعيتك عشان محدش يقولي انتخبناكي و ضحكتي علينا
ايه رايك يا نيسو



Nsreen Bsunee says:

مصطفى

افدتنا ايها العالم الجليل

جزاك الله خيرا

ورزقك الدخان ومشتقاته يا مولانا

ووقاك شر السوبر وانعم عليك بالمارلبورو ابيضا كان او احمر

ونلتقى مع عالمنا الجليل فى الحلقه القادمه باذن الله وموضوع الحلقه

“البراندى فى الثقافه الشعبيه المصريه”

انتظرونا



Nsreen Bsunee says:

صفصف يا حبيبتى انا فرحانه لما لقيتك عند مصرى اطمنت انك الحمدلله مانقطعتيش عن التعليقات

ويارب الفاصل الاعلانى ميطولش احنا مش فى رمضان

اترشحى انتى يا اختى ومالكيش دعوه
هو اساسا فى نائب عنده خطه
فى نائب عنده امل

ده هو ده المطلوب فى النائب المصرى الصميم



S H A H says:

موافقون



haneen says:

دمك شربات يا نسر وشربات بجر الشين زى الاسكندرانيه ما بيقولوها والله بجد مش عارفه امسك نفسى من الضحك تصدقى انتى حتغيرى الشكل العام للبرلمان المصرى هتخليه مسخره لا ويبقى لا والنبى يا عبده خالص …. انا حاولت انزلك الاغنيه بتاعت ورده اللى انتى بتحبيها فى المدونه عندى على الاسنايبس بس ما نفعتش علشان طويله قوى 9 دقايق بس لو مش عندك وعايزاها انا ممكن ابعتهالك على الماسينجر علشان كل اما تسمعيها تفتكرينى …هههههه

اوريفواررر



S H A H says:

الاخت الزميلة العزيزة,,,إسكندرية أذكريني
تحية طيبة وبعد,,,
إيماءا بما نشر في مدونتي من تعليق من طرف سيادتكم و ردا عليكم بمبدأ المساواة و الفضل, فقدر قررنا نحن مدونة شهراميات بتعويضكم عما صدر منا من تعليق صغير لا يرتقي الى الكلمتين حتى, بهذه العريضة, التي توضح مدى اهتمامنا الملحوظ بشخصكم الكريم, و نتقدم بجزيل الشكر بما ورد منكم ردا على المدونة نبيلة التي اتهمتني بالغش و التدليس, جعلكم الله شوكة في ضهر شركتي الوطنية و زين مصاصي الدماء و شفط النقود
وتفضلو بقبول فائق الاحترام
مقدمه
شاه

————————
عوضتك اهه عن موافقون ملكيش حجة
وبعدين لشة هتخلي سفرية ايران ل 2009, ليه كدة يا بنتي؟!؟
صيف 2008 و سيبك من مصر
هتنبسطي بجد

كفاية كدةبقى

سلام مؤقت



Fantasia says:

يخرب عقلك, دمك عسل
هههههههههههههههههههه
كنتي هتموتيني م الضحك يا شيخة
البشرية كانت هتخسر فانتازيا المفترية

لأ بجد اجابات شافية وافية
مفيش أحلى من كدة كلام
أهم حاجة الواحد يدلع نفسه يا أختي
وبعدين هما بتوع بسلامتها المعارضة كانوا خدوا إيه غير الفقر والهم؟
حد تجيله فرصة يبقى جناب العيدو ف الميجليس وما مايستغلهاش؟ دا حتى يبقى حرام
إذا كان البعدا اللي بالي بالك, بياخدوا معاهم ال88 كرسي وهما مروحين
هي جت علينا إحنا يعني؟
طب البت شاهيناز دي واعية والنعمة
وقعت واقفة بنت الإيه
قعدت تسبل للراجل ف الجلسات لحد ما وقعته على بوزه
وأهي زمانها عايشة ف عز
كانت هتاخد إيه من السياسة؟ بلا وكسة
هما بتوع السياسة دول عمرهم هيفلحوا؟
المجلس دا أحسن مكان يصتادوا فيه العرسان لعلمك
كله رجالة قيمة وسيما وفلوس إيه ومراكز إيه
لعلمك بقى الانتخابات اللي جاية هيتقدملها كل بنات مصر
علشان يبطلوا المغرضين يقولوا الستات مش مهتمين بالسياسة

مش هوصيكي على موضوع جاد يا أوختشي
الراجل يعني عامل أغنية وطنية ومصورها فيديو كليب كمان
وبعدين اغنيته دي هتنفعنا ف الدعاية الانتخابية برضه

ربنا ينولهالك يا قمر
بس متنسيش أختك أمانة عليكي

تحياتي يا نسرين



مصري بالغربة says:

سؤال معلهش يعني

يعني ايه كيك

انت بتقولي عن جاد شويري حلو كيك

يعني ايه الكلمة ديه من فضلك



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: