Nisreen85′s Blog











{January 15, 2008}   ردا على تدوينه"المرأه=الرجل=استهبال"0

التدوينه دى هى ردى عند مدونه بقت سلطه على بوست بعنوان “المرأه =الرجل=استهبال”التدوينه الاصليه موجوده على اللينك ده
http://salataa.blogspot.com/2008/01/blog-post_10.html

January 15, 2008 10:26 AM
Nsreen Bsunee said…
انسه مروه
تحياتى
مبدئيا احييكى على المدونه ومكنتش اتمنى ان اول تعليق ليا يكون على الموضوع ده بس النصيب بقى
الحقيقه انا ماتعودش اقرا الكومنتس قبل ما اعلق بس شفت اول كام كومنت كده وبجد اتصدمت صدمه كبيره بجد انا كنت متوقعه ان على الاقل اللى مش حيعترض على المضمون حيعترض على العنوان المستفز اللى حضرتك كتباه
عزيزتى مروه انا مختلفه معاكى تفتكرى من الذوق انى اقوللك اللى انتى كتباه ده استهبال او تخلف يبقى انا باشتمك وباحجر على رأيك الشخصى وباتهمك بالهبل او العبط او التخلف يبقى مبدئيا العنوان غلط ثانيا فيه مساواة وهى مش مجرد كلام ولا استهبال ولا رجعيه ده مطلب حقيقي ستات كتير بتعانى بسبب عدم وجوده
وللتوضيح المساواة مش بين المراه والرجل كمراه ورجل لان الراجل مش كائن اسطورى احنا كاناث بنصبو للمساواة بيه لا المساواه هى حق ومقصد من مقاصد الاسلام يعنى لو راجل متضهد فى شغله من حقه يطالب بمساواته بباقى العاملين لكن بما اننا هنا فى مصر تحديدا وحاتكلم عن مصر لانها اللى تخصنى بنعانى من مجتمع ذكورى بيدى الذكر-لمجرد جنسه وليس لتميز فى علم او دين او خلافه-حقوق ويسلب ذات الحقوق من المرأه -لمجرد جنسها وليس لنقص فيها-ولاننا حاليا بنعانى اكتر من المد الوهابى القادم من الخليج فا لازم نطالب بمساواة المراه بالرجل عشان منوصلش لمرحله اننا نجبر على النقاب او اننا نحرم من قياده السيارات-لمجرد اننا اناث-عزيزتى لقد اشرتى الى تدوينه نواره هل قراتى بيان محمد حسين فضل الله جيدا
انا لم اتوقع ابدا ان تختلف امرأه مع بيان كهذا

فمن العنف الجسدي الذي تتعرّض فيه” المرأة للضرب، وهذا ما يمثّل الرجل فيه أحطّ حالات الإنسانيّة؛ لأنّه يدلّ على فقدان الرجل للمنطق الذي يُمكن أن يفرضه على الآخر من موقع الالتزام والاقتناع؛ كما أنّه لا يدلّ على قوّة الرجل، بل على ضعفه؛ لأنّه «إنّما يحتاج إلى الظُلم الضعيف».

هذا مقطع من البيان عزيزتى اقذر اهانه يمكن ان يتعرض لها انسان هى الضرب كيف كامرأه اتقبل هذا دون رد فعل كيف لا ادافع عن نفسي حضرتك ذكرتى ان الست يجب ان تكون وتكون وتكون واستفضتى فى الشرح بطريقه مستفزه كان البنات او السيدات جايين من ورا الجاموسه ميعرفوش دينهم ولا اخلاق ولا بيفهمو اساسا ومحتاجين اعاده تدوير زى مخلفات القمامه
يا مروه الست حتى لو جاموسه وحماره ومبتفهمش لو لاقت ايد حنينه حتتغير
ازاى اطبخ لراجل بيمد ايده عليا لما اغلط ازاى انام فى حضنه فى فراش واحد ازاى احترمه ازااااااى انتى بتتكلمى بمنطق غريب جدا ومذكرتيش ابدا ان الزوج ممكن يكون حشاش وبيضرب مراته وياخد دهابها ساعتها يبقى يستاهل ضرب الجزمه ولا لا
ممكن الزوج يكون خاين وبيضرب مراته لما تكتشف انه كان نايم مع واحده تانيه يبقى ساعتها ميستاهلش ضرب الجزمه
ممكن يكون ويكون

حضرتك بتقولى ممكن يكون فيه حاجه اسمها رحمه بس مينفعش يكون فى حاجه اسمها مساواه
احى رحمه مين بمين رحمه الراجل بالست مش فاهمه يعنى ولا رحمه المجتمع بالست يعنى المفروض انى استجدى حقوقى من الراجل والمجتمع ويدهالى بدافع الرحمه والعطف
ده باعتبار انى كائن اقل منه طيب ازاى هو ربنا فضل الانسان على باقى الخلق بالعقل ولا فضل الراجل بالعقل والست ضمن باقى الخلق الدون فى المستوى

انتى بتسالى -طيب فكرتى انتى حضرتك يااللى زعلانه اديتى واجباتك ولا لأ-انتى ايش عارفك انا اديت واجباتى ولا لأ ايش عارفك الست اللى بتطالب بحقوقها دى مش ممكن تكون احسن منك وممكن تكون راضيه ربها وجوزها وبتطلب حقها الشرعى فى انها تتعامل كانسان
كانسان زيها زى الراجل كانسان مش مجرد صدر او شفايف او رجلين كانسان يحكم عليه على اساس عقله فقط
تعرفى كام بنت خريجه من جامعات محترمه بتتبهدل فى رحله البحث عن شغل دول مش من حقهم ينادو بمساواتهم بامثالهم من الذكور
ومتقوليش انهم يحافظو على نفسهم ومينزلوش يشتغلو لاااااا دى تنزل تشتغل وتشتغل عشان سن الجواز فى مصر وصل للتلاتين والخمسه وتلاتين والبنت دى اتعلمت 14 سنه من حياتها عشان تنفع مجتمعها ونفسها من حقها تشتغل ولكل واحده سبب خاص بيها اللى عاوزه تجهز نفسها اللى عاوزه تساعد اهلها اللى بتعالج امها ولا ابوها اللى عاوزه تجيب عربيه اللى عاوزه تصيف فى شرم الشيخ هى حره من حقها بقى ان المجتمع يحميها ويعدل فى معاملته ليها

اتكلمتى عن حسن الطاعه ولا مجادله فى ايات واحاديث كلنا عارفينها لكن الست برضه ليها حقوق ورغبات لازم تحترم حتى فى فراش الزوجيه ربنا عمره ما حيكون قاسى علينا ربنا الحق العدل الرحمه والرجل اللى يعاشر زوجته بغير رغبتها يبقى حيوان وحسابه اكيد كبير عند ربنا زى ما الست ليها اجرها لما تسعد جوزها هو كمان ليه اجره لما يسعد زوجته ويهتم بمتعتها الشخصيه الى فى الاخر هى متعه ليه برضه
مينفعش واحنا فى الزمن ده نبقى بنحاول نعللى سقف الحريه وتيجى اصوات تهده فوق دماغ اللى جابونا حرام عليكم الدين والاسلام مش كده

حسن المظهر والهيئه
يعنى هى فى ست فى الدنيا مبتحبش تكون جميله بس بقى في رجاله حقيره بتكفر الست وتكرها فى عيشتها وترمى عليها الهم كله ومبتتحملش اى مسؤوليه وتيجى بعد كده تقولك اتزوقيللى طيب ازاى تفتكرى الست اللى مموته نفسها عشان عيالها وبتخدم ابوها وامها وحماتها وحماها وجوزها بنى ادم مالوش اى لازمه وبتشتغل وحامل فى الاخر لو ماتزوقتش للبيه ربنا حيحاسبها
مافتكرش افتكر هو اللى حسابه حيكون عسير جدا ان شاء الله

يا مروه حضرتك بتقوللى ان الزوجه لازم مترهقش زوجها بالمطالب وكذا وكذا
طيب ترهق مين هى مش مسؤوله منه برضه ولا انتى عاوزاها تقعد من الشغل وكمان متطلبش من جوزها حاجه
ما هى الست اللى بتشتغل دى وبتطالب بالمساواه اللى مش عجباكى بتعمل كده عشان مترهقش الزوج وعشان يكون معاها تتزوقله زى ما سيادتك بتقوللى

واذا زاد الشجار متردش عليه اتهزقى واتضربى بالجزمه ومتجادليش حطى الجزمه فى بقك
مش هو ده اللى انتى بتقوليه
مش من حقنا حتى الجدال عشان راحه البيه

والشعر اللى حضرتك جايباه بيوضح الصوره الجميله
“خذى العفو 00لا تكثرى الشكوى 00 لا تنطقى”

لا وكمان بعد ده كله يضرب ويعاشر الست بدون رغبتها ومتشتغلش ومتنطقش ومتشتكيش ومتطلبش وبعد ما يموت متتجوزش
يا سلاااااااااااام
احى بجد

مش عيب يا انسه مروه ان الست تطالب بتحقيق ذاتها مش مستاهل الموضوع ان مرارتك تتفقع ومن حق الزوج برضه لو شغل مراته مضايقه انه بكل ذوق يناقشها
الزوجين المتحابين المتفاهمين حيكونو متفقين ومعندهمش مشكله ومشاكلهم حتكون جميله زيهم فيها حب ورحمه و حينتهو للاتفاق فى الاخر

الزوجين المتحابين مش محتاجين لسته طويله عريضه من النصايح ومش لازم الست تكون مثاليه وفظيعه ومنكسره عشان زوجها يحبها ويحترمها لان اللى بيحب بيحب التانى بعيوبه وبيتعايش معاها زى ما الست بتتقبل عيوب الراجل الى بتحبه الراجل كمان لما بيحب بيتقبل عيوب الست عادى جدا

الزواج رباط مقدس بسيط مافيهوش تعقيدات مادام فيه حب بس عدم -المساواه-بين الراجل والست هو اللى بيخللى البنت تتجوز اى واحد وخلاص من غير اى حب او تفاهم عشان المجتمع بيقولها لازم تعمللى كده عشان متبقيش عانس وكخه عشان انتى مش من حقك تشتغللى مش من حقك تتعلمى ولو اتعلمتى فا انتى بتتعلمى عشان تعجبى العريس عشان كده البنات بتتجوز اى حاجه اى حد وبيكون جواز فاشل بينتهى بضرب الجزم

انسه مروه الست لما تلاقى ايد جوزها حنينه حتوطى تبوسها حيروح هو موطى بايس رجليها ده الطبيعى ده الحب من غير اناشيد وليسته طويله
لكن الراجل اللى بيحدف الجزمه فى وش مراته يبقى مش حتروح تلبسهاله لا دى تحدفه بيها وتسيبله البيت وتمشى وتطلب الطلاق

حتقوليلى الاطفال والاطفال ان شاء الله لما يطلعه يشوفو امهم بتضرب يبقى مسيرهم حيكبرو يضربوها ويضربو ابوهم ويضربو بعض يبقى الحل الانفصال مش الاستسلام واقول ضل راجل

لا ضل الحيطه احسن ميت مره من ضل الراجل الضعيف\المفترى

ربنا قال “الرجال”قوامون على النساء
مش الذكور قوامون على النساء يعنى مش كل ذكر رجل يا مروه

الرجل الحبيب الزوج الاخ العطوف المسؤول العادل المستقل العصامى الطموح زوجته حتشيله فوق دماغها وحتسيب الدنيا كلها عشانه لو تقدر

لكن ظروف البلد هى العامل الاول فى نزول الست للشغل فا متجيش حضرتك وانتى قاعده فى بيتكم تقولى ان الست اللى بتطالب بحقوقها دى هبله وبتستهبل انتى حره فى فكرك لكن مش معنى كده ان اللى بيخالفوكى فيه يبقو هبل

انا مؤمنه بمساواة المراه بالرجل وحضرتك وانتى بتعرضى وجهه نظرك اتهمتينى بالهبل والاستهبال وان شعار المساواه فاشل وانى اتشدق بشعارات تافهه وهبله
شكرا يا ستى ولن ارد لكى الاهانه واقولك ان كلامك كذا وكذا لانك حره فى رايك

لكن حضرتك وسيادتك بتقولى فى الاخر ان الست لو اتضربت فا هى بتضرب عشان ناشز يعنى مش عشان الزوج ابن كلب ميعرفش ربنا مثلا
اوكى
لو الضرب مبرح وفيه عاهات مستديمه يبقى عشان الست مستفزه ومش عشان الزوج محشش مثلا
ماااااااشى
وبعد كل ده
وبعد كل اللى هى بتعمله وكل التعليمات اللى حضرتك كتبتيها دى لو هو ماتغيرش
ماتسبهووووووووش
لا تقف جنبه
احييييييييييييييييييييي

ولو مااااات تعيش على ذكراه
يا لهوووووى

عزيزتى كنت اتمنى ان لا تتحدثى عن الاسلام لان الاسلام ليس بهذا الظلم ابدا الاسلام حلل الطلاق حلل للارمله الزواج حلل الخلع تفتكرى ليه

اصل سعادتك مش مديه اى اوبشنز للست غير انها تفضل مع الراجل حياة او موت والكلام ده مالوش علاقه لا بالاسلام ولا بالمسيحيه ولا باليهوديه

لكن فى طائفه بوذيه فى الهند من تعاليمها دفن الزوجه حيه مع زوجها اذا مات فى حين ان لو الزوجه ماتت الاول عادى جدا هو بيتجوز تانى

الاسس فى الاسلام عزيزتى هى المساواه العدل الرحمه

كلامك مالهوش علاقه لا بمساواه ولا بعدل ولا برحمه

واكرر صدمتى فى البوست وفى الردود

About these ads


MerMaid says:

عزيزتي نسرين
انا خايفة اكون من الردود اللي صدمتك
ده اولا
لكن انا مش ضد ابدا مبدا المساواة
و لا ان المرأة تتساوي بالرجل

بصي يا نسرين
انا متفقة معاكي والله في كل كلامك
و احييكي عليه
:)
تحياتي



haneen says:

ايووووووووووه عليكى يا اسكندرانيه يا شجاعه انتى هما الاسكندرنيات كده اجدع ناس كلامك رائع ومقنع وانا متفقه معاكى
خالص تحياتى



يَحيى المِصري says:

مساء الخير

يا بنتي أسيبك كام ساعة أرجع ألاقيكي ماسكة حد و نازلة فيه ضرب
صلي ع النبي يا نسرين

أنا متفق معاكي في كل اللي قولتيه تقريبا

بجد يعني مايتخافش عليكي
هم دول الإسكندرانية و لا بلاش



Desert cat says:

انا اول لما شوفت البوست حصلت لى حالة ذهول
وانصدمت لما شوفت الردود حقيقى
ومن ناس المفروض انهم مثقفين وفاهمين
واللى داخله تثقف وتتفق وتحييى
وقتها فضلت الصمت ومرضيتش ارد اصلا
لان من الواضح ان الاستاذه مروة عندها شحنة قوية جدا ضد النساء مع انها اصلا اسمها مروة وعلى ما اعتقد ان الاسم ده اكيد النوع انثى

طبعا متفقة معاى يا نسرين
لكى الاحترام والتقدير



Anonymous says:

عزيزتي نسرين

رغم اتفاقي مع كلام اي انثي تحمل اسم نسرين احتراما للاسم

الا ان ضميري هنا ينقح عليا
لكي تكون هناك مواساة في الحقوق
يجي ان تكون هناك مساواة في الواجبات
وهو الامر مستحيل التنفيذ حيث ان القدرات مختلفة

فلا اعتقد ان هناك ست قادرة ان تعمل 16 ساعة في فرن او ان تقف علي سقالة
او ان تقوم بعمليات سرقة بالاكراه

والاسلام لم يساوي بالطبع بين الرجال والناس لمعرفة الخالق باختلاف قدرة الجنسين

والا
كان الانبياء والرسل نصفهم جاء رجال والنصف الاخر نساء

كما ان الشهادة والميراث امر لم يساوي فيه الخالق وهو اللطيف الخبير بين الاثين

فكيف تطالبين بمساواة مزعومة؟

هل نغير قوانين الميراث من اجل اليسا ونوال السعدواي

ام نقبل شهادة روبي كما نقبل حلمي طولان

هل المساواة ان يحمل اليرجل ويضع ويلبس مايوه قطعتين ؟

نسرين والله انا لست بعدو للمراة
فهي امي واختي وحبيتي
لكن ان ضد ترديد شعارات غريبة بلهاء

مع احترامي وحبي

ساعد نسرين الايمن



ساعد نسرين الايمن says:

عزيزتي نسرين

رغم اتفاقي مع كلام اي انثي تحمل اسم نسرين احتراما للاسم

الا ان ضميري هنا ينقح عليا
لكي تكون هناك مواساة في الحقوق
يجي ان تكون هناك مساواة في الواجبات
وهو الامر مستحيل التنفيذ حيث ان القدرات مختلفة

فلا اعتقد ان هناك ست قادرة ان تعمل 16 ساعة في فرن او ان تقف علي سقالة
او ان تقوم بعمليات سرقة بالاكراه

والاسلام لم يساوي بالطبع بين الرجال والناس لمعرفة الخالق باختلاف قدرة الجنسين

والا
كان الانبياء والرسل نصفهم جاء رجال والنصف الاخر نساء

كما ان الشهادة والميراث امر لم يساوي فيه الخالق وهو اللطيف الخبير بين الاثين

فكيف تطالبين بمساواة مزعومة؟

هل نغير قوانين الميراث من اجل اليسا ونوال السعدواي

ام نقبل شهادة روبي كما نقبل حلمي طولان

هل المساواة ان يحمل اليرجل ويضع ويلبس مايوه قطعتين ؟

نسرين والله انا لست بعدو للمراة
فهي امي واختي وحبيتي
لكن ان ضد ترديد شعارات غريبة بلهاء

مع احترامي وحبي

ساعد نسرين الايمن



appy says:

حبيبتى انت الكلام وجعك ما فهمتك اللى فيها لازم كده يعنى عادى خدى كل حد على قد عقله واحنا الحمد لله بقينا بنفهم الكلام رايح منين وجاى منين بس برافو عليكى انك كتبتيه هنا



Ragi says:

انا زعلان منك ومخاصمك وليا عندك حق عرب
صحيح انتى اسكندرانية وكل حاجة لكن موش لازم تقولى الكلمة ايها دى
عندك كل الكلمات والتعبيرات التى يسرتها لكى اللغة ، ايضا انتى خريجة جامعة ويمكنك استخدام تعبيرات كثيرة للتعبير عن الاستهجان والاستنكار



مروة الزارع says:

صاحبة البوست مع حضرتك يا أفندم

أولا : أنا سعيدة جدا بنقاشى مع حضرتك

……………

ثانيا

فعلا حضرتك هو قمة الاستهبال اللى احنا بنشوفة دلوقتى بيحصل

المجتمع لم يعد مجتمع ذكورى حضرتك

اصبح مجتمع انثوى والناس نسيت ان الست ست والرجل رجل خلاص

وعمالين كل يوم نسمع مهازل جديدة

انا معاكى ان فية رجالة ضريبة بانجو وحشيش وعاوزين الحرق ومش بنكر دة لو كنتى قريتى كل ردودى

انا فى البوست بتاعى بتكلم عن نوعية ستات كتيرة شوفتها بعينى ومش اقلية واصبحوا اغلبية

حضرتك انا مغلطتش لما قلت ان الست تبدأ بنفسها

يمكن لو بدأت جوزها يتغير

اللى انا اعرفة ان اللى بيمشى مع الله مهما كانت ديانتة مش بيخسر

مفيهاش حاجة لو كل واحد بدأ بنفسة وعمل دة بإخلاص

ومغلطتش لما قولت ان الست لا تساوى رجل وانما مكملين لبعض فقط وانا بحترم الست طبعا ومتنسيش انى مش راجل حضرتك يعنى

ومكفرتش لما قلت ان الست مكانها البيت لو مش محتاجة

واحتياج شرم والغردقة ولا العربية مش اهم من البيت والاسرة

فإذن مكانها البيت والولاد

على فكرة انا بشتغل وناجحة فى شغلى ومستمرة

دة عشان انا واحدة فاضية

ولما اتجوز بإذن الله طبعا هقعد فى البيت اربى ولادى ولو كنت بقيت وزيرة حتى حضرتك

الأسرة اهم من اى شئ ودة الطبيعى ووظيفة المرأة الأساسية

وهاتى لى ست واحدة بس ناجحة فى الاتنين اللى هما الشغل والاسرة

هتلاقى دايما تقصير فى اى جانب

وفية حاجات من جوة الاسرة محدش هيعلمها الا الله وحدة بسبب انشغال الام على حساب بيتها

وفعلا ان اشرت فى التعليقات ان لو استحالت العلاقة بعد ما تكون عملت كل شئ يبقى الطلاق افضل حل

بس تكون فعلا هيا استنفذت كل الوسائل الممكنة

لانة طبعا هو ابغض الحلال

وهدم اسرة وتشريد اولاد مش بالساهل

انا كلامى حضرتك من واقع الدين والاسلام ومثبت بأحاديث وقرأن

واعتقد كل الاديان السماوية قالت كدة
حضرتك انا مقلتش اى مصايب فى البوست بتاعى

لية الحقائق اصبحت مصايب الايام دى

…………………

الست المصريه ست جميله متعلمه ومكافحه وهى عامود البيت

الكلام دة كان قبل التسمم الفكرى اللى حصل فى كل شئ لحد ما غيروا معتقادتنا

كل شئ غيروة وبيلاقوا اللى يسمعهم ويدافع عنهم

خلونا نلف الطرح سبانش ونسينا الزى الإسلامى اللى ربنا أمر بية

خلونا قال اية نعمل مايوة محجبات

منتهى الإستهبال فعلا

خلونا عاوزين نتساوى بالرجل فى كل شئ حتى فى الحاجات اللى ربنا قالها مينفعش

زى الميراث

والشهادة

تفتكرى الست بتاعة زمان الأصيلة كام واحدة موجودة منهم دلوقتى

المعظم ماشى ورا كلام التلفزيون والشيوخ الموضة حسب العصر الجديد

دلوقتى حضرتك الست بتتطلق وتخرب بيتها لمجرد ان جوزها عاوزها تقعد فى البيت رغم انها مش محتاجة

انا مش بتهم كل الستات

مصرنا دايما فيها الخير

ولكن النسبة اللى بقول عليها دى موجودة ومنها كتير جدا جدا

روحى ادرسى كدة اغلب حالات الطلاق شوفيها بتحصل ازاى

زمان الست اللى بتتكلمى عليها دى غير دلوقتى خالص

دلوقتى الام بتقول لبنتها لو قالك بم سيبيلة البيت وامشى وانا اجوزك سيد سيدة

زمان حضرتك كان فية احترام متبادل

كانت الست بتحترم جوزها وغير كدة خالص

وعلى أيام الرسول علية الصلاة والسلام

الست غير كدة خااااااااالص

ومطيعة لزوجها فى كل شئ

حتى لو أكلها عيش حاف

وعندى مئات الروايات للصحابة

هبعتها لحضرتك لو أتشرفت بإيميلك

………………

وعلى فكرة الست لو كانت عبدة لزوجها دة فى حد ذاتة شئ جميل

شئ تأجر علية

والعبدة مش معناها الإستعباد بالمفهوم اللى حضرتك فهماة من ذل

اللى اقصدة انها واجب عليها تعمل كل اللى ذكرتة واللى حضرتك بتستنكرية بسخرية وبتتهمينى انى بخليها اداة

دة واجبها فى الاساس

………………

عارفة ان الست اللى هتضرب جوزها لازم يكون هو اصلا مطلع عينها

عارفة كدة

أسألى بقى حضرتك نفسك هو طلع عينها لية

عاوزة حضرتك تقولى يعنى ان الرجل دة بطبيعتة شاذ قاسي معندوش دم وسادى

لأ طبعا مفيش حد كدة من نفسة

ستات كتير اوى وموجودين بينا هما اللى بيشعللوا وبيولعوا

ومتحاوليش تنكرى وانتى عارفة ان كلامى دة بيحصل

………………….

ايوة حضرتك انا بشتغل وفى شركة محترمة وواخدة كافة حقوقى

وشوفت بنات السنترال وبنات البوتيك وحتى بنات الكفيهات

وكنت فى يوم واحدة منهم

لأنى نشأت يتيمة

وبنيت نفسى بنفسى وأشتغلت كل شئ بجدددددد لحد ما وصلت للمكتب اللى قاعدة علية دلوقتى

حضرتك حاولى تفهمى كلامى

الست تشتغل

جميل جدا

البنت تشتغل

جميل جدا

لكن امتى؟

لو واحدة محتاجة زيى مثلا

انا فعلا لو قعدت من شغلى مش هلاقى اللى يصرف عليا

ولو انا فى يوم لاقيت اللى يتجوزنى ويكفلنى مش هشتغل واتفرغ لبيتى وولادى

لكن حضرتك اللى عندها كل شئ وعاوزة تشتغل عشان حوار الذات دة تبقى اية

واحدة مش محتاجة شغل وجوزها مكفيها تنزل تبهدل نفسها لية وتسيب عيالها

وزى ما قولت وهقول تانى الاحتياج دة نسبى

يعنى تشتغل عشان تجيب كماليات ملهاش لزمة ولا عيالها اولى

روحى أسألى وشوفى كام حالة طلاق بسبب موضع الشغل دة

……………

حضرتك انا محددتش لحد اولاوياتة انا بقول الصح واللى عاز يعمل بية يعمل واللى شايفة غلط هو حر طبعا فى رأية

………….

على فكرة ست البيت اللى عيالها اخلاقهم زفت بتكون أكيد ام مش متعلمة

لكن حضرتك ام متعلمة ومتفرغة لأولادها صعب جدا يطلعوا زفت

+

طبعا تربية دينية سليمة

ودى الأهم

………………..

على فكرة انا مش مستفزة ومش بحقر من حد

بس بجد هسألك سؤال

تفتكرى انة مش من قمة الهبل

لما نصيرة المرأة نوال السعداوى تدعوا لكاتبة الأبناء بأسم المرأة

دة بقى حاجة من الهبل اللى بقول علية وأقصدة

للإطلاع

http://www.egypty.com/top4/nawal_elsa3dawi_names.asp

عاوزيين يتساوا وخلاص فى حاجة ربنا حددها

وياما فية هبل شوفتة كتير

……………

انا عمرى ما سخفت من حد ولا قللت منة

وكلامى واضح

……………

على فكرة انا بنت وست ومش راجل وعمرى ما هاجى على نفسى ظلم

انا بقول وقائع وحقائق شفتها وعشتها
…………..

برضة هيكون ليا بوست تانى موجة للرجل

انا حبيت أبدأ بالمرأة الأول

……………..

تحياتى ليكى

والخلاف فى الرأى لايفسد للود قضية



مروة الزارع says:

appy

معنى كلامك اية مش فاهمة

:(



Nsreen Bsunee says:

ميرميد
منورانى
لا ماتصدمتش منك متقلقيش
انتى اعترضتى واتكلمتى على نقطه المساواه فى الاجر
ده انتى لو مكنتيش اعترضتى كنت قطمتلك رقبتك انتى بالذات لانك عاوزه تشتغلى وتسافرى وتحققى كيانك

تحياتى



Nsreen Bsunee says:

حنين
اسمك بجد حلو اوى

ياحبيبتى والله مش مساله شجاعه بس مرسي على ذوقك وكلامك الحلو

نورتينى



Nsreen Bsunee says:

يحيي
مساء النور

عليه الصلاة والسلام

شفت بقى تموت انت فى الضرب والخناق
:)



Nsreen Bsunee says:

desert cat
عزيزتى
انا كمان حصللى ذهول مع انى اعرف ناس كتير ضد مساواة الست بالراجل لكن برضه مكنوش بيحقرو من الست لدرجه انها تكون خدامه او تور فى ساقيه الراجل
وفعلا كان فى ناس مكنتش متوقعه رد فعلهم ده
بس تقريبا لان مروه كانت ناقله كلام كتير اوى وبكميه كبيره فا البوست كان طويل واغلب الناس مقروهوش فا بالتالى مقدروش يستوعبو الفكره اللى مروه بنقولها

ياريت تزورى المدونه تانى وتشرفينى



Nsreen Bsunee says:

الاستاذ ساعد نسرين الايمن

اولا فى ستات بيشتغلو اكتر من رجاله كتير وبيتحملو اكتر من رجاله كتير واللى بتتحملو الست فى الولاده ميتحملوش اى راجل لو حنتكلم ع التحمل
وتمييزك فيه عنصريه رهيبه انت بتميز على اساس القوه وقوه التحمل يعنى لو راجل جسمانيا زوجته اقوى منه او عنده اعاقه معينه تمنع انه يشتغل زيها يبقى اقل منها لو مثلا عنده ضعف جنسي يبقى مراته تحدفه فى الشارع يبقى بقى على اساس كلامك لو واحد فى الشغل معاك عضلاته اكتر منك يبقى المفروض يترقى بقى ويقبض اكتر منك حتى لو كنت افضل منه فى العقل

مبدأ غريب ياريت تفكر فيه شويه ومتستكبرش على الاعتراف بغلطه

برضه بتقولو الاسلام والله العظيم الاسلام مش كده عمر الاسلام قال ان الراجل افضل من الست عشان قوة عضلاته عمر الاسلام قال ان الزوجه خدامه عند الراجل بس عمر الاسلام نفى او حرم حق المراه فى التعلم او العمل
بتجيبو الكلام ده منين معرفش

والقران قال ان الراجال قوامون على النساء بما انفقو يعنى الراجل لما يكون مكفى مراته ماديا من حقه يطلب منها انها تقعد من الشغل ووقتها بيتفاهمو واكيد بيوصلو لحل

الست المتعلمه المحترمه اللى بتشتغل وعندها شخصيه كل الناس بتحترمها واولهم زوجها واولادها لكن الست اللى بتحقر من نفسها بتكون حقيره فى نظر كل الناس واولهم جوزها

وحضرتك بتقول كمان ان كون الرسل والانبياء من الرجال يبقى الرجال افضل من النساء
يبقى بقى على اساس كلامك رجال السعوديه انبل وافضل منك لانهم من الارض اللى انبتت نبى الله محمد
طيب ومحمد عليه الصلاه والسلام مين وقف جنبه مين اول حد كان جنبه مش السيده خديجه برضه مش خديجه دى ست رضى الله عنها مش كانت سيده اعمال وصاحبه راس مال مش كانت خير نساء قومها من قبل زواجها من النبى

واضح ان حضرتك مقريتش البوست بتاع مروه ولا قريت البوست بتاعى كويس لانى ماتكلمتش فى قوانين الميراث او غيرها ولا جادلت فى كلام الله فايريت لما تقرا البوست كويس عشان متقولش كلام من دماغك واضح انك قريت اول سطرين ودخلت علقت

وكمان واضح ان فكرتك عن المساواه فكره غريبه لانى مقولتش ان المساواه عرى او ابتزال او افكار شاذه والشعارات اللى مش عاجباك ملهاش علاقه بروبى
مش فاهمه ايه علاقه روبى بضرب الراجل لمراته او بالمراه العامله او بدكتوره الجامعه او غيرها او غيرها
والسيده نوال السعداوى فى ستات كتيييير بينادو بحقوق المراه ومعترضين على افكارها

وبرضه نوال السعداوى ملهاش علاقه باللى انا كاتباه ومجبتش سيرتها انا باقول وجهه نظرى الشخصيه ولا اتكلمت عن ختان الاناث ولا قلت الحجاب مش فرض ولا قلت اى فكره من افكار السيده نوال

فا من الواضح ان سيادتك ولا قريت البوست كويس وكل معلوماتك عن المساواه هى روبى ونوال السعداوى فا ياريت تقرا البوست كويس وتنزل تشوف البنات الشقيانه واللى بتشتغل وطالع عينها والجمعيات الحقوقيه المحترمه ومتستقيش كل معرفتك من التلفزيون والفيديو كليب

ويا افندم انا ماسمحلكش تقول شعارات بلهاء انت دخلت علقت على كلامى يبقى تحترمه ومتقولش انه كلام اهبل حتى لو كنت مختلف معاه

تحياتى



Nsreen Bsunee says:

استاذ راجى
حضرتك اخ كبير بالنسبه ليا وعلى دماغى من فوق وميرضنيش زعلك منى

لكن الحقيقه انا اللى زعلانه دلوقتى لان حضرتك لفيت العالم وليك اصدقاء فى كل مكان واكيد فى اسكندريه صدقنى انا اول ما قريت تعليقك اتصدمت ورجعت قريت البوست عشان اشوف انا عملت ايه والحقيقه انا لو شايفه فى كلامى حاجه كنت اعترفت بغلطى واعتذرت لكن الكلمه فوق العاديه بالنسبالى وحضرتك عارف انها عاديه جدا فى اسكندريه ومظنتش انى قلت اى حاجه تدل على انى مش متعلمه او تعليمى متدنى يا استاذ راجى

وانا اسفه لحضرتك مش اعترافا بغلط لكن احتراما لحضرتك

واتمنى تقول رايك فى الموضوع

تحياتى



Nsreen Bsunee says:

ابى حبيتى انا فاهمه لكن بجد الموضوع ضايقنى بجد
منورانى دايما



Nsreen Bsunee says:

انسه مروه
انا رديت عليكى بما فيه الكفايه لكن حابه اعلق على نقطه انتى قلتيها
انا باقول لحضرتك ان الست المصريه عاقله ومتعلمه وجميله فا حضرتك قلتى ان ده كان زمان وان دلوقتى الستات بيعملو ويعملو ومفتريين وكذا وكذا
عزيزتى والرجاله دلوقتى زى زمان
اكيد لا
وانتى عارفه كده كويس دلوقتى اغلب الرجاله بتوع جيلنا على الاقل غير ابويه وابوكى وعمك وعمى لا رجاله دلوقتى وشباب دلوقتى مفيش تحمل مسؤوليه مفيش حب ولا رحمه ولا احترام فى التعامل عشان كده الست مش حاسه بالامان ومتقوليش غير كده لانك زيك زيي بتشتاغلى وبتتعاملى مع الناس وبتشوفى بعينك الهوائيه والاستهتار واللامبالاة
مروه الاحترام بيننا اكيد متبادل لكن انا مختلفه معاكى وفكرك صادمنى لانك متحامله ع الست اوى وفى موضوعك مكنش فى موضوعيه وحملتى الست مسؤوليه كل المصايب اللى فى الدنيا وان هى السبب فى دمار الاسره وضياع الاولاد مع ان اغلب الحالات اللى بنشوفها بعنينا فى مصر بتكون فيه الست قاعده على ولادها ومضحيه بكل حقوقها والراجل خالع وشايل ايده من كل حاجه

وفى الاخر ارجع اقولك ان فيه ستات وحشين عادى جدا ورجاله وحشين عادى برضه هى دى الدنيا

بس صدقينى المساواه الحقيقيه بما لا يخالف الدين هى اللى حتصلح الحال يا مروه انتى لو بتاخدى حقك فى شغلك مش بتتعرضى لاهانه او ضغت او نظره تجرح لانك ست حترتاحى
لو المجتمع مش بيضغط عليكى عشان اتاخرتى فى سن الجواز شويه لمجرد انك ست حترتاحى
انا مش بادور على انى ابقى رئيسه جمهوريه-مع ان ده من حقى لو انا اصلح لانى اكون رئيسه جمهوريه-لكن انا بادور على حقى انى اعيش باحترام من غير ما حد يبصلى بصه تجرح او يقلل من شانى او يظلمنى فى شغلى وافتكر انى مش باطلب اكتر من حقى لما اطلب زوج يحترمنى ويقدرنى ويقبلنى زى ما انا ويحترم دماغى ويعاملنى بادميه حتى لو غلطت

زى ما مرارتك تتفقع لما تسمعى ان ست ضربت جوزها لازم تتفقع لما تسمعى ان راجل بيضرب مراته لان كرامتها زى كرامته ودى اهانه ودى اهانه

تحياتى



Bella says:

هذه اول مرة اتعرف على مدونتك
والحقيقة اشكر الظروف التي عرفتني عليها

لقد قرأت التدوينة التي نشرتي عنوانها هنا على الريدر ومرارتي لم تحتمل تكملتها لاني سأمت هذه النوعية من الموضوعات
وردك عليها هو ما جعلني اقرأ الردود التي صدمتني اكثر من صدمة التدوينة نفسها

طالما هناك فهم مغلوط للدين وتفسير انتقائي لما نريد سيظل هناك دائما ظلم واقع على المرأة
وابشع قهر تتعرض له المرأة هو قهر المرأة الاخرى لها

وماورد في التدوينة المذكورة يمثل هذا الاتجاه

واحب ان احييكي بشدة على ردك المستفيض واحييكي ايضا على قوة احتمالك وصبرك

الحقيقة اني لم اعد اتمتع بهذه القدرات لاني شبعت مناقشة موضوعات المساواة وعمل المرأة وباقي الموضوعات ذات الصلة التي لاتفصل بين الرجل والذكر وتعتبر مجرد الفرق العضوي بين الرجل والمرأة مسوغ لتفضيل الذكر على المرأة حتى لو لم يكن رجلاً وتقحمه على كشوف الرجال زورا وبهتانا

هذه تدوينة لي كتبتها منذ فترة ردا على بعض الموضوعات المشابهة التي ظهرت مرة واحدة

http://afkaar-bella.blogspot.com/2007/06/blog-post_9925.html

واذا ساعدتني مرارتي ولم تنفقع فريما ارد على هذه التدوينة بموضوع

وحتى هذا الحين اتركك لقراءة هذا الموضوع وربما أعود مرة اخرى للتعليق

تحياتي



alexandrany says:

نسرين
سينا

انا بجد شايف ان الموضوع مش مستاهل كل ده
شايف انك متحامله شويه ومتعصبه شويه
على فكرة انا شايف من وحهه نظري حاجه تانيه خالص
انا شايف انك انتي ومروة بتتكملوا في حته واحده
انتو الاتنين ماشيين في نفس الطريق بس يمكن كل واحده منكم ماشيه في حارة غير الحارة الليي التانيه ماشيه فيها
يمكن واحده منكم مسابقه التانيه بس يادوب بخطوات
انا مش قصدي مسابقاها في المعرفه واللا المعلومات ….لا مش قصدي
انا اقصد بس مسابقه في الوقت
انتي بتتكملي عن احترام الرجل للمرأة ومطالبه المرأة بحقوقها في حاجات
وان الست مش عبده عند الراجل
ميين بس اللي اقل ان الست عبده عند الراجل؟
انتي بتتكلمي عن حق المرأة في احترام زوجها ليها ولدماغها وعقلها وعملها
اما الحارة اللي جنبك اللي ماشيه فيها مروة فيمكن هي متاخرة عنك شويه
زي ما قولت مش متاخرة في حاجه غير الوقت
مروة بتقول ان الست زي ما هي عايزة من الراجل فبتقول انتي اديتي ايه للراجل الاول
مروة عايزة تسبق بالخير …عايزة الست هي اللي تكون باديه العطاء عشان تلاقي بعد كده
عشان كده بقولك مروة متاخرة عنك بيمكن طول عربيه كده او ملاحقاكي على شنطه عربيتك كده
بس من الاخر وفي النهايه انتو الاتنين عايزين توصولوا لنفس المحطة

انا مش عايز حد يزعل مني ولا عايز ادخل في اي مجادلات من اي نوع مهما كانت

انتي بتتكلمي عن حق الزوجه في العمل
انا هاقولك حاجه انا مش من انصار ان المرأة تشتغل وتخلي حاجه تقاسم وقتها غير بيتها وعيلتها
بس من ناحيه تانيه انا مش هاقدر اقول للي ربنا هيكتبلي نصيب معاها انها تقعد من شغلها او انها تسيب شغلها عشان تقعد في البيت
واحده قاعدت في العلم تريبا 15 سنه ويمكن اكتر يعني تقريبا زيها زيي مش هاقدر احجر علي حياتها واقولها لا انتي تقعدي في البيت
بس انا عايز اعرف ليه البنات واخدين الفكرة دي عن ترك العمل
مش كل الرجاله عايزة تقعد ستاتها في البيت بس عشان يتحكموا فيهم
لا والله
انا واحد من الناس انا عايز اقعد مراتي اللي هتكون يعني ان شاء الله في البيت عشان انا مش عايز لها الاهانه اللي في الشارع واللي في المواصلات واللي في الشغل نفسه
انا عايزها كده تقعد معززة مكرمه
تقعد وتتشرط وتحط رجل على رجل كمان وهي في بيتها
انا مش عايز لها الاهانه والشحططه اللي بنشوفها في البيت
ثم في حاجه كمان البنات نفسهم بيحبوا يقعدوا في البيت
مين يعني اللي بيحب يصحى الساعه تمانيه الصبح عشان ينزل الشغل ويصطبح بوش المدير اللي ممكن يكون زي المدير بتاعي عشان يطلع بوزه
ثم بقى في حاجه …..
الست في بيتها هي الكل في الكل
مين اللي يقدر ينكر كده
هي المدير بتاع المكان
واحنا اللي بنشتغل عندهم
على فكرة يا نسرين
دي حتى كده من قوامه الرجل اللي ربنا سبحانه وتعالي ذكرها في القرآن
القوامه ان الراجل هو المسئول عن جلب قوت اليوم لاهل بيته
ومش عشان يضربهم ويبهدلهم
اوكي دي حاجه
عايز استشهد بس بحكايه كده من ايام الفاروق عمر بن الخطاب رضي الله عنه

“كان في عهد أمير المؤمنين عمر بن الخطاب رجل تعب من ان زوجته ترفع صوتها دائما عليه فقرر ان يشتكيها لأمير المؤمنين عند ذهابه اليه وعند باب منزله سمع صوت زوجة امير المؤمنين عاليا فقال وهذا امير المؤمين ترفع زوجته صوتها فلم جئت لن يستطيع ان يفعل لي شئ فأنصرف ففتح أمير المؤمنين بابه فقد يا فلان أءتيتني فقال الرجل نعم فقال لم ذهبت فقال جئت اشكو ارتفاع صوت زوجتي فوجدت أمير المؤمنين نفسه زوجته صوتها مرتفع فذهبت فقال يا أخي
تنظف لنا بيتنا
تربي لنا اولادنا
تجهز لنا طعامنا
تبسطنا في فراشنا
تفعل ذلك كله ولم يأمرها الله بذلك أفلا نستحملهم ان رفعوا صوتهم”

انا عايز اقول يعني ان اهه زي ما احنا عايزين الستات تقعد في البيت بس في نفس الوقت مش عايزين لهم غير الكرامه والعزة
مش هانكر ان في رجال لا يستحقوا لقب رجال من الاساس
بس اكيد لكل قاعده شواذ
ومش معني ان الشواذ من القاعده كتروا وبقوا ظاهرين على القاعده مش معنى كده اننا نلغي القاعده
فعايز اقول ان مروة ماغلتطشي اوي زي ما نسرين شايفاها من وجههع نظرها
بس كل الحكايه ان نسرين عايزه احترام الرجل للمرأة كانسان ومعاملتها بحقوق توزاي حقوق الرجل
ومروة من الناحيه التانيه بتقول يا بنات لازم نحافظ برضه على حقوق الزوج الاول عشان نستني منه اللي احنا عايزينه
نسرين عايز اقولك حاجه
عايز اقولك ان ربنا ادي للمرأة حقوق ومزايا مااديهاشي للرجل
ده كفايه الحمل
الحمل اللي انتو فاكرينه تعب وفرهده وبتقولا مادام الرجاله مش حاسسين فليه ما ياخدوشي هما الحمل ويتعبوا مع الاولاد
حد يكة انه مع الطلق تغفر خطاياه
يا سبحانك يا رب
دي حد يقدر يستغني عنها
هل حب الابناء للامهات يوازي حب الاباء
هل الرسول صلي الله عليه وسلم اوصى بالاباء زي ما اوصي بالامهات

حاجه تانيه كمان
يقول المصطفى الذي لا ينطق عن الهوى صلى الله عليه و سلم : ( استوصوا بالنساء خيراً فإنَّ المرأة خلقت من ضلع و إن أعوج شيء في الضلع أعلاه فإن ذهبت تقيمه كسرته ، و إن تركته لم يزل أعوج فاستوصوا بالنساء خيراً ) من حديث أبي هريرة رضي الله عنه عند ابن ماجه وهو حديث صحيح ( صحيح الجامع 960 ).
وقال صلى الله عليه وسلم “رفقا بالقوارير فانهن عوان عندكم”

مش معنى هنا الضلع الاعوج ان امرأة عوجاء ..معاذ الله
ولكن المقصد من الضلع الاعوج انه الضلع اللي بيحوط بمنطقه القلب
الحته دي فعلا لازمها ضلع اعوج حنين عشان يحميها
الست كده
والراجل كده
الست من طبيعتها العطاء والحنان واللمه
والراجل كائن ضعيف في الاصل مش محتاج غير كده
مش محتاج غير الست اللي تكون بتحس بيه وبتضمه وقت مايكون محتاج للضم والاحساس ان في حد وراه

وفي وصيه تانيه من الرسول صلي الله عليه وسلم
+++
قال رسول الله صلي الله عليه وسلم( استوصو بالنساء خيرا فانهن عوان عندكم)وفي حديث اخر ( خيراكم خيراكم لاهله وانا خيركم لاهلي)
فالبيت السعيد هو الذي يقوم علي الحب ويعمر بالالفه والرحمه ويملئ جنباته بالتقوي فما اجمل ان يتبسم الزوج لزوجته والزوجه لزوجها . ولين الخطاب من الطرفين
وكلامها السحر الحلال لو انه …….. لم يجن قتل المسلم المحترزي
ان طال لم يملل وان هي اوجزت…….ود المحدث انها لم توجز

ياليت الرجل والمرأه كل منهم يسحب الكلام السئ وجرح المشاعر والاستفزاز وكل يتذكر للاخر جميل الخصال ويري كل منهم في الاخر الجانب المشرق .
+++
“ما بين العلامتين منقول”

المهم ومن الاخر
ان كلامنا واحد وانا لس مصر ان مافيش اختلاف بين مقال مروة ونسرين
بس نظرتنا بتختلف مش اكتر للكلام

عايز اختم بس في النهاية بأية

يقول المولى عز وجل

” وَمِنْ آيَاتِهِ أَنْ خَلَقَ لَكُمْ مِنْ أَنفُسِكُمْ أَزْوَاجاً لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةًَ “

صدق الله العظيم

هو ده اصل العلاقة بين الرجل والمرأة
المودة والرحمه

طولت انا مش كده
بس هو التعليق سحب معايا شويه
معلش بقى

مروة
نسرين

تحياتي



مهندس مصري says:

تصدقوا بالله الراجل إسكندراني ده راجل محترم و فاهم الموضوعين صح
أنا قلت كده برضه عند مروة

سعيد بمعرفتك مدونتك يا أستاذة نسرين
و يا ريت تردي الزيارة
:)
و بأحيي إسكندراني مرة تانية

أما بالنسبة لكلمة أحيييه
فهي تستخدم فى اسكندرية بمعنى يا لهوييي و عادية جداً هناك
بس برة اسكندرية هيا كلمة قبيحة
يعني الموضوع إختلاف لهجات بس لا أكثر

و مستني زيارتك
:)



Nsreen Bsunee says:

bella
نورتينى وانا رايحه اشوف مدونتك دلوقتى ان شاء الله
بصى للاسف يا بيلا احنا بقينا مجتمع غريب عجيب ورغم ان التدين او الالتزام انتشر كمظهر لكن احنا للاسوأ وكل شئ فينا بقى مزيف
ربنا يستر علينا

نورتينى وحاستناكى دايما



Nsreen Bsunee says:

مصطفى
رايك يحترم
تحب الخصلك مروه قالت ايه
“مروه بتقول ان المساواة مهزله واستهبال وبتستهزأ بالجمعيات الحقوقيه والافلام اللى بتناقش موضوع المساواة ومن وجهه نظرها ده كلام فاضى وفاشل ومفيش شئ اسمه مساواه اساسا والست لازم تكون جزء من الراجل فقط تنشد الحمايه منه ببساطه عشان هو راجل وهى ست
مروه بتقول ان الست المفروض متجادلش جوزها ابدا او تناقشه او تشتكى ولو ضربها فا عشان هى ناشز ولو الضرب ادى لعاهات او كسور فده عشان هى مستفزه وبتستفزه وبعد ما الست تنفز كل اللى مروه قالت عليه ومفيش اساسا ست تقدر تعمل كده بس ماشي حنفترض ان ست عملت كده وهو بقى فضل بيضربها مينفعش برضه تسيبه لاا تفضل معاه وتعالجه نفسيا ولو مات تكون مخلصه ومتتجوزش بعديه
مروه بتقول ان كلمه عاوزه احقق ذاتى بتفقعلها مرارتها وان الست المفروض مبتتعلمش عشان تشتغل ولو اشتغلت تشتغل عشان تساعد الراجل(برضه الراجل)و كل ده غير ان مروه فى مجمل حديثها هى اللى متحامله على الست وجايه عليها اوى وفى النهايه بتسال مين فى اللى زعلانين من بطش الراجل بتعمل اللى عليها اكيد مفيش حد يعنى هى حكمت على كل الستات اللى مظلومين من الرجاله انهم مش عاملين اللى عليهم وان الرجاله ليهم عذرهم فى المجمل مروه بتلتمس الاعذار للراجل بشكل مبالغ فيه بالنسبه ليا ومستفز كمان وبتحمل الست كل المسؤوليه بص كده للجمله دى كويس يا مصطفى انا حانقلها بالنص من كلام مروه

(واللى فاقع مرارتى الست اللى بتقول عاوزه اطلق منه ده ميتعاشرش ده عاوز يقعدنى من الشغل واسيب ذاتى وحياتى ومستقبلى لا المرأه اساسا ماتخلقتش عشان تشتغل الست اتخلقت عشان تقعد فى البيت وتربى اسره صالحه وهتقولو بقى واحنا بنتعلم ليه واحقق ذاتى والكلام الفارغ المستهلك ده اللى ياما شبعنا منه فى الافلام احنا بنتعلم عشان نفهم الدنيا ونفهم الدين مش بنتعلم عشان نشتغل ابداااااااااا”ده كلام مروه

افتكر مفيش اى وجه تشابه فى افكارنا خالص انا مختلفه مع كل حرف فى كلامها للاسف
وانا اختلافى مع حد مش بالضروره يكون مصاحب ليه عدم احترام كمان لا اوقات بيكون مجرد اختلاف مش اكتر

انا زعلانه منك يا مصطفى لانى كنت فاكراك عارفنى وعارف انا بافكر ازاى ومكنتش متصوره انك تعتبرنى متحامله ومتعصبه ومكبره الموضوع كنت منتظره منك شويه احترام لتفكيرى اللى انا كنت فاكراك بتحبه زى ما هو كده

المهم انت باقى كلامك انا متفقه معاك فيه بس انا مش ماشيه مع افكار مروه فى نفس الحاره ابدا يعنى تقدر تقول كده ان افكارها فى حى المنتزه وانا فى حى غرب او يمكن انا فى شارع البيطاش كمان

وانا ومروه مش حننتهى بافكارنا فى نفس المكان خاااااااااالص مروه ممكن تكون قنوعه اكتر منى بكتير هى كل طموحها بيت وراجل يحميها ويضلل عليها وده حقها

لكن انا بقا عاوزه احقق ذاتى ومروه معترضه على كده خالص انا شغلى وطموحى مالوش علاقه بالراجل اللى حيكون فى حياتى ومش لازم يكون محتاج لشغلى عشان اشتغل لا طبعا حتى لو هو مبسوط جدا ماديا انا حاشتغل وانا واثقه فى انى اقدر اعمل توازن وادى كل حد فى حياتى حقه الى حد ما لانى اكيد حاقصر اكيييييد لانى مش مثاليه ولا ادعى انى اقدر اكون مثاليه ابدا

الحاجه الوحيده اللى ممكن تخلينى اسيب شغلى واقعد فى البيت هى ان زوجى او حد من ولادى يكون عنده مشكله صحيه مثلا تستلزم وجودى وبرضه حيكون قعادى من الشغل وضع مؤقت لغايه ما الازمه تعدى

والحاجه اللى ممكن تخلينى اتخلى عن طموحى”وذاتى”وشغلى هى ان جوزى يكون راجل صاحب رساله بجد فى حياته ووجودي جنبه حيساعده فى انه يكمل رسالته دى وقتها حتبقى رسالتى انا كمان وحتبقى ذاتى

زعلانه منك بس مش حاعاتبك اكتر من كده

بقيت كلامك يستحق يكون بوست لوحده لانه بجد حلو



Nsreen Bsunee says:

باشمهندس مصرى

انا سعيده جدا بزيارتك وقريت ردك عند مروه وتستحق عليه كل احترام وتقدير

ايوه ما مصطفى الاسكندرانى مهندس زيك الدم بيحن بقى ولازم الكلام ييجى على هواك
:)

فعلا والله يا باشمهندس احي يعنى يالهوى بس احنا بنقولها كتير جدا وعااااادى جدا جدا فى اسكندريه يعنى بنقولها لما نشوف حاجه حلوه او حاجه وحشه عادى خالص

وانا فعلا مقصدش بيها شتيمه او اى حاجه وحشه ولوكانت ضايقت حد فا ميزعلش بس انا ممكن اوى اقولها تانى لان ده اسلوب كلامى فا اتعودو على كده
:)

انا رايحه المدونه بتاعتك اهو بس بلاش استاذه دى تانى والله عندى 22 سنه بس عيله يعنى محدش يقولى استاذه



Fantasia says:

عجبني ردك جدا يا نسرين
واشكرك لاشادتك بتعليقي على نفس الموضوع
اعذريني لو مكنتش قلت الكلام دا أول ما قريت تعليقك
لكن انا محبتش جمال ردك وقيمته تقل في حالة لو الموضوع اتقلب لتأييد وهتافات وانقسام بين فريقين
وهو دا للأسف اللي حصل بالرغم من احجامي عن ارسال المزيد من الردود
انا حسيت ان الحوار كان من جانب واحد
علشان كدة اكتفيت بتوضيح وجهة نظري في تعليق ثم تعقيب
بعد كدة اكتشقت ان كلام الدنيا لن يؤدي لشيء
فكان لازم ألتزم الصمت
لو كان انكار المساواة فيه شيء من التدين فأنا شايفة ان دي اساءة للدين ولله
للأسف الظلم والتفرقة على أساس الجنس اصبح لهم مؤيدين في هذا الزمن
وللأسف ان نفس الناس بتدعي ان ده فيه حقوق للمرأة! كأن الجمهور هم مجموعة من المعاتيه
كيف يكون في الظلم عدل؟ كيف يكون في التمييز عدالة؟ كيف يخلق الله نصف البشر لخدمة النصف الآخر؟
هذا هو منطق العبودية, وهو منطق استخدم من طبقوه لاغراض سياسية واقتصادية الدين في وقتها لفرض سطوتهم واستعباد خلق الله الأحرار
قاموا بخطفهم من بلادهم وقيدوهم بالسلاسل وألقوا بهم عبيدا في بلاد بعيدة عن أوطانهم
هناك قدموا لهم الدين على انه ينص على العبودية وان هذه هي ارادة الله, وإلا ما كان قد خلقهم ببشرة سوداء
كان الاسود يعيش في وسط مجتمع من ذوات البشرة البيضاء, وسط أشخاص لم يرهم من قبل, ولم يعلم بوجودهم في الحياة
اقنع نفسه ان حياته السابقة لم تكن إلا وهم وسراب
سلم بأن الله لابد ان يكون خلق هؤلاء القوم البيض ليكونوا أسياد
وان حريته في الماضي لم تكن بحكم الطبيعة أو بحكم الارادة الالهية
وانما بحكم وجوده مع امثاله من العبيد
خدم البيض بكل اقتناع وكل الطاعة
خدمهم لإرضاء الرب
خدمهم ليحقق ارادة الخالق
الذي خلق الابيض ليكون السيد
والاسود ليكون عبدا لهذا السيد
كان يظن راضائه بالاستعباد تدينا
كان يظن ايضا ان الجنة التي يدخلها الابيض لا مكان فيها للاسود
فجنة الاسود مختلفة ومتعه فيها اقل كما هو الحال في الدنيا
لاكنه كان يطمع في الجنة حيث انه كان يؤمن ان لا حقوق له في الدنيا
كان يطلع الى السماء ويرى السحب البيضاء
كان يعلم ان الله مكانه السماء
فظن ان الله لابد وانه يفضل اللون الأبيض
رسخ ايمانه بمفاهيم العبودية
وزاد من رسوخ هذا الايمان رجال الدين
الذين اقنعوه انهم هم أكثر الناس دراية وعلما بارادة الله
فحين يعصى عبدا أسود سيده الأبيض
كان يتم ترهيبه بغضب الله وان عصيانه لسيده هو عصيانا لخالقه
فلكي ان تتخيلي كيف كان الحال حين تمرد واحد من العبيد على هذا الوضع
كان يتهم بالضلال والعصيان واغضاب الله
كان اقرانه من العبيد يهاجمونه ويتهمونه بالخروج عن طاعة خالقه
كانوا يخافون ان يتبعونه فيخسرون الآخرة كما خسروا الدنيا
كانوا يحاربونه
كانوا يجلدونه
عبد يجلد عبدا آخر
يجلده وهو يظن ان هذه هي ارادة الله
يظن ان جلد العاصي يقربه من الله
فيزيد من قسوة الجلد ليرضي الله
هو يظن انه يصلحه ويقومه ويعيده للطريق الصحيح
هكذا هو مصير كل من يطالب بالمساواة
هكذا جزاءه من المظلومين ومن الذين يدافع عن حقوقهم
هكذا يصبح هو أصل الشرور والفساد
هكذا يكون هو المجرم والعدو والضال

يجب ان نتعلم الدرس
لا تعجبي مما قرأتي يا نسرين
لا تعجبي من الردود
لا تعجبي من رفض المنطق والحق والخير والعدل
فالمساواة شرور
والمرأة شرور
والمطالبة بحقوق المرأة شرور
هذا هو الزمن الذي نحياه

كل تحياتي واحترامي



Nsreen Bsunee says:

عزيزتى فانتازيا
قرايه كلامك متعه انا مش عارفه انتى عندك كام سنه ممكن تكونى اصغر منى بس بجد انتى تستاهلى كل احترام وتقدير

المساواه شرور
والمراه شرور
والمطالبه بحقوقها شرور
اذا اسمحيللى ان اكون اول الاشرار

انا سعيده بيكى اوى
:)



شـــــهــــروزة says:

اللى فات و ممسوح دة بتاعى كنت نسيت حاجات كدة وحاجات طلعت غلط فقلنا نصلحه

………..

بصى هو الأحية واجب لابد منه لما قريت البوست محل المشار اليه

الفكرة نفسها سطحية بدرجة مفزعة لما ناخد بظاهر النصوص فقط وندفن المغزى الحقيقى لها

انا واحدة من الناس المؤمنة ان المرأة أخدت أكبر خاااااازوق بنغمة حروق المرأة دى

بصى
ابقى بصى عالبتـــــــاع دة بتعليقاته وركزى اوى فى التعليقات
ونقطة مستحق الحق والغير مستحق خصوصا تعليق واحد اسمه ايجي أناتوميست مخمخنى أوى
حطيته فى البوست اللى بعده

حتعرفى انا اقصد اية

بس مازلت متمسكة بالأحيـــة أوى

تحياتى



alexandrany says:

نسرين

أولا انا ما يخلصنيش زعلك اوكي
“هذه مقدمة منطقية واستهلال لابد منه”

ثانيا بقى يا ستي عاتبي زي ما انتي عايزة ..انا عايز اشوف وجهه نظرك كامله في الموضوع ده ..بس انا المرد دي مش هتزعل :)

بصي يا نسرين
انا لما كتبتلك التعليق ده ما كانش غير تعبير عن أرائي الشخصيه فيه
يعني من وجهه نظري انا
لو تلاحظي انا ما اتكلمتش عن موضوع الضرب ده خالص
انا ان شاء الله لما ربنا يكرمني بالزوجه الصالحه مش هاختارها عشان اضرب فبها
اكيد الواحد بيتعب اووي في اختيار الزوجه اللي هتكون حبيبه له و أم لذريته ان شاء الله عشان يبقى متكيق لما يضربها
الواحد اكيد مش مختار حيوان عشان يعذبه ..لا طبعا
الواحد بيختار الانسانه اللي هتبني معاه..هتبني معاه اسرة وعيلة وكيان مستقل
الواحد بيختار عقل عشان يحاوره
بيختار روح عشان يعيش معاها
بيختار دماغ عشان تفكر معاه
ثم اكيد الواحد يعني ما وصلشي للدرجه دي اني اتعامل مع زوجتي بالضرب
“انا باتكلم عن نفسي “
اه ما انكرشي ان في ازاوج بيضربوا ستاتهم
بس ده اكيد كان الاحتيار من الاول غلط
الاختيار من الاتنين من الراجل والست
اه في بنات عايزة تتجوز وخلاص مهما كانت شخصية الزوج
و اه في رجاله عايزة تتجوز عشان تتحكم في بنات الناس وخلاص
بس مش كله يا نسرين انا لما اتكلمت اتكلمت من وجهه نظري انا وانا هاتعامل ازاي معاها
مع ان في حاجه ربنا سبحانه وتعاي هو اللي قال
الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ وَاللاَّتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلا تَبْغُوا عَلَيْهِنَّ سَبِيلاً إِنَّ اللَّهَ كَانَ عَلِيّاً كَبِيراً (34)
آل عمران

بس ده لمين للزوجة الناشز

بس هو ده اللي هيفرق في الاختيار
لما الواحد يختار صح من الاول هو ده اللي هيفرق عشان ما الاقيش نفسي مع زوجه ناشز

ربنا عز وجل قال في كتابه العزيز

الطَّلاقُ مَرَّتَانِ فَإمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ وَلا يَحِلُّ لَكُمْ أَنْ تَأْخُذُوا مِمَّا آتَيْتُمُوهُنَّ شَيْئاً إِلاَّ أَنْ يَخَافَا أَلاَّ يُقِيمَا حُدُودَ اللَّهِ فَإِنْ خِفْتُمْ أَلاَّ يُقِيمَا حُدُودَ اللَّهِ فَلا جُنَاحَ عَلَيْهِمَا فِيمَا افْتَدَتْ بِهِ تِلْكَ حُدُودُ اللَّهِ فَلا تَعْتَدُوهَا وَمَنْ يَتَعَدَّ حُدُودَ اللَّهِ فَأُوْلَئِكَ هُمْ الظَّالِمُونَ (229)
البقرة

وَإِذَا طَلَّقْتُمْ النِّسَاءَ فَبَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍ وَلا تُمْسِكُوهُنَّ ضِرَاراً لِتَعْتَدُوا وَمَنْ يَفْعَلْ ذَلِكَ فَقَدْ ظَلَمَ نَفْسَهُ وَلا تَتَّخِذُوا آيَاتِ اللَّهِ هُزُواً وَاذْكُرُوا نِعْمَةَ اللَّهِ عَلَيْكُمْ وَمَا أَنزَلَ عَلَيْكُمْ مِنْ الْكِتَابِ وَالْحِكْمَةِ يَعِظُكُمْ بِهِ وَاتَّقُوا اللَّهَ وَاعْلَمُوا أَنَّ اللَّهَ بِكُلِّ شَيْءٍ عَلِيمٌ (231)
البقرة

اظن يعني ان ربنا سبحانه وتعالى وضح المعامله بين الزوج والزوجه
امساك بمعروف او تسريح باحسان
ولا تمسكوهن ضرارا لتعتدوا

دي وجهه نظري في موضوع الضرب ده
في حاجه تانيه
في مقوله كده
“الله ناظري …الله رقيبي .. الله شهيد على”
فالواحد يعامل ربنا في زوجته ويتقي ربنا فيها وهو الشاهد اللي بينهم

في حاجه كمان لو تلاحظيها
ان مروة كان كلامها في الاساس موجه لفئة معينة من الستات بالخصوص
اللي هما بيعاملوا ازواجهم وحش جدا وبيوصلوا معاهم لحد ان هما اللي يضربوهم وقدام عيالهم كمان
واظن ان دي موجوده والكل عارف

نيجي للنقطه التانيه في الموضوع
نقطة الشغل
فاكرة يوم ما كنتي عايزة تسيبي الشغل وانا قولتلك بلاش يا نسرين
انا قولت في التعليق السابق ليا انا مش هاقدر اقول للي ربنا يكرمني بيها ان شاء الله اقعدي ففي البيت
هي اللي مفروض تحس دوه مش انا اللي اقول
وانا قولت كمان اني انا مش حد تاني هاتكلم عليه انا افضل انها تقعد في البيت
والدليل على كده انمك لما كنتي عايزة تسيبي شغلك اقنعتك عشان ما تسيبيهوش

نقطة اخيرة باقولها برده من راي شخصي
انتي عامله انتي وفانتازيا بتقولوا المساواة المساواة
اقولك على حاجه
في اختلاف بين كلمة مساواة وبيت كلمة تكامل
انا رايي ان اللي بين الرجل والمرأة تكامل مش مساواة
الست ما ينفعشي تبقي راجل والراجل ما ينغعش يبقى ست
الاتنين يكملوا بعض
وما اكونش باكدب لو قولت ان يمكن نصيب الستت اكبر بكتيير من نصيب الرجل

“الأم مدرسة إذا أعددتها ..أعددت شعبٌ طيب الأعراق”

انا خلصت
يا رب اكون وضحت وجهه نظري للموضوع
وعلى فكرة الوقت اللي كتبت فيه التعليق ده عشان ارد عليكي كنت مخصصه عشان اذاكر محاضرتين من امتحان بعد بكرة بس ماشي فداكي
عشان تروجي وتظجططي
:)
ما تزعليش اوكي

تحياتي



مصطفى اسماعيل says:

مش عارف هبقى قليل الادب لو قلت عندك

احه

وعلى رأى رامز

مأساة البشر الحقيقة
انهم ولاد كلب

بوست حلو

بس طويل

وانا ماردتش عند مروة علشان كاتبة ممنوع التدخين وانا للأسف مدخن
انا اسف لعيبى الفظيع يا مروة اللى حرمنى من انى انول شرف الوجود على مدونة
من اغلى المدونات
مدونة
من اشجع المدونات
مدونة

خنقتنى بصراحة

مش لاعب



Alexandrian far away says:

العزيزة نسرين
أولا أسمحي لي أرد زيارتك الكريمة ولو أنني تأخرت نوعا ماولو أنه كما يقول المثل الأنجليزي
Better late than never
بداية مجرد أن يدخل صديق جديد للمدونة ويقرأ أحدث تدوينة ويعلق عليها لهو أمر مبهج، أما أن يبحر عبر التدوينات ويترك أنطباعاته عنها فهو مما يدفىء القلب والروح
ثانيا أنا سعيد جدا بأن تعرفت على مدونتك الشجاعة خاصة التدوينة الأخيرة وأرجو أن يمنحني العمل فرصة للمزيد من الإستمتاع بتدويناتك

ندخل بقى على التعليق على التدوينة
وأنا تبعت الرابط وقرأت التدوينة الأصلية التي تعلقين عليها
وهي تحتوي على صفات مميزة لا تخطئها العين
1- النفس الطويل
2- القص واللصق
3- الغرور والتعالي
4- الدوجما
5- الثقة المطلقة
6- التعالي والتعالم
وهي الصفات المميزة للمدونات الظلامية أو الأخوانية أو الفاشية أيا كان الإسم الذي تفضلين تسميتها به
في رأيي فإن الكلام عن المساواة ما بين الرجل والمرأة هو الإستهبال بعينه
فالمرأة مساوية للرجل
تلك حقيقة بديهية مثل أن الأرض تدور حول الشمس وأن الإلكترونات تدور حول النواة، يمكن لمن يشاء أن ينكر مثل تلك البديهيات، لكنه بذلك يجعل من نفسه أحمق ، المرأة مساوية للرجل لأن كل البشر خلقوا متساويين بغض النظر عن الجنس أو العقيدة أو العرق أو الجنسية
وكل من يرفض هذه البديهية هو فاشيستي وعنصري ومعاد للحضارة
بديهية أخرى
وعلى من يشعرن بالدونية وأنهم من نوع منحط أقل من نوع الذكور أو على من يستهبلن ويردن التواكل عالة على رجل ينفق عليهن أن يصمتن ويتركن النساء الحقيقيات يقمن بدورهن في العالم كبشر
وعلى الرجال الذين يعانون من مشاكل تجعلهم لا يتخيلون علاقة ندية مع المرأة أن يبحثوا عن علاج
أيه السخافه دي؟
مللتونا

تحياتي لشجاعتك وقوتك في الرد
وأعيد الترحيب بك صديقة عزيزة



غمض عينيك says:

انا بردو اتصدمت جدا من البوست وخصوصا ان اللي كاتباه بنت
وكنت متوقع ان التعليقات هتكون قاسية
بس فوجئت ان الناس بتقول برافو وجزاك الله كل خير وياريت الناس كلها تبقى زيك

ايه ياجماعة هو في ايه؟؟ دا انا ولد وراجل وباستنكر التفكير بالاسلوب ده…انا كده بحتقر المرأه مش بعزز من قدرها

بصي انا اتصدمت جدا ومعرفتش ارد وقتها لان الموضوع كان عايز كلام كتير

ومرة تانيه احيكي على انك قلتي حاجات كتير انا كنت عايز اقولها

وان شاء الله لما الامور في حياتي تستقر شوية هتكلم عن الموضوع دا باستفاضة

تحياتي ليكي
محمد سمير



Nsreen Bsunee says:

عزيزتى شهروزه
بجد منوره

موضوعك حلو ومنطقى و ايجى انوميست رائع ومنطقى اشكرك انك ادتينى اللينك

تحياتى



Nsreen Bsunee says:

اسكندرانى

كلامك كويس بس وجه اعتراضى على كلامك كان عشان انت قلت ان افكارى زى انسه مروه الزراع ده اللى كان مضايقنى

تحياتى



Nsreen Bsunee says:

مصطفى

يا ابنى قول احيه احا اللى انت عاوزه اح اح زى ما تحب

انت شايفنى كاتبه مدونتى نظيفه جميله متطوره

عاد يا معلم خد راحتك خالص

تحياتى



Nsreen Bsunee says:

Alex far away

والله المدونه منوره منوره منوره
وحضرتك تتاخر زى ما انت عاوز المهم تيجى
مدونتك مينفعش حد يدخلها غير لما يجيبها راسا على عقب
انا استفدت كتيييييير من مدونتك ومنتظره انى اتعلم منك اكتر

ربنا يهون عليك وعلينا الغربه ويخليلك الجميله حبيبتك والف مبروك الزواج

تحيه و ود



Nsreen Bsunee says:

محمد
المدونه نورت بيك



HafSSa says:

بصي انا قريت التدوينة دي و استغربت جدا
من فحوى الرسالة المراد توصيلها للناس
بس لما قريت هنا التعليقات اكتشفت ان احنا عندنا مشكلة في مفهوم المساواة اكتر من مشكلة المساواة نفسها
بجد حاجة معقدة
اعتقد لوالمساواة يعني وجود نفس الحق في الاكل و المشرب و الملبس و التعليم و فرض العمل تبقى مصيبة
لان د يحقوق موهوبة من ربنا مش محتاجة اصلا نتكلم فيها
و بالنسبة لدور كل شخص ف يالمجتمع فبيتقسم حسب وظايفة
يعني مثلا انا لو عاطلة في البيت مش بشتغل يبقى مؤكد انا اللي حشتغل شغل البيت سواء كنت الزوجة او الاخت
و العكس المفروض انه يتم
لكن للاسف اعرف حالات كتيرة اوي الراجل عاطل في البيت و الست بتشتغل و مع ذلك بكل جراءة ترجع من الشغل مهدود حيلها و تبص تلاق يالرجل بكل غرور مش عامل اي حاجة ف يالبيت و مستني منها انها تخدمه و بكل اداء و مستوى عالي
طيب فين وقتها المساواة
و فيه تعليق صاحبه اتكلم عن وجود بعض الاعمال مينفعش تقوم بيها الستات لانها صعبة على طبيعتهم
طيب و فيه اعمال ميقدر شالرجالة يعملوها و لا يجيلهم عليها صبر
مش هي دي المشكلة و لا هي دي نوعية المساواة اللي بنتحدث عنها دلوقتي
بس احب اشيف بعض المعلومات اللي مالهاش علاقة بالمساواة لكن ليها علاقة بقدرات المراة و الرجل
معروف علميا ان درجات تحمل الالم عند المراة اقوى و اعلى بكتير من الرجل
و معروف ان الستات عندهم جلد او صبر في المداومة على فعل اعمال و الاصرار عليها برضو اطول بكتير من قدرة الرجل و ده بيخلي الست بتستحمل الالم و الاوجاع اكتر من الرجل
و دي بشهادة دكاترة و رجالة كمان
و في الاخر اتفق مع شهروزة و معاكي على احيه عالية جدا و بالصوت المكبر بالميكروفون
و كما هو دائما شعاري عند اشتداد المصائب
احيه يا ابو سوسو
احيه
احيه شوف بنتك
احيه

تحياتي



Nsreen Bsunee says:

صفصف
متفقين كالعاده
:)
والحقيقه الراجل ليس كائن اسطورى عشان نصبو لاننا نبقى زيه لكن زى ما قلت الظروف والجهل والتخلف اللى بقينا فيه هو اللى اضطرنا اننا نطالب بالمساواه دى
والمعلومات اللى انتى قلتيها على قدره تحمل الست معروفه بس محدش بيحب يعترف بكده

لانه وللاسف معظم الرجاله معندهمش غير قوتهم وعضلاتهم وقدرتهم الجنسيه اللى بيتباهو بيها عشان كده ان البحوث والخبره يقولو ان الست قوه ارادتها وتحملها اعلى منه دى تضربهم فى مقتل

ربنا يتوب علينا بقى من التخلف والعقليات الجواميسي

واشكرك على مشاركتى الاحيه

واسمحيللى اردد شعارك
احيه يا ابو سوسو احيه
احيه شوف بنتك احيه



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
Follow

Get every new post delivered to your Inbox.

%d bloggers like this: