Nisreen85’s Blog











{May 28, 2007}   زمن الاهلى

اليومين دول الاهلاويه على لسانهم كلمه زمن الاهلى زمن الاهلى و واجعينلنا دماغنا الاول لما كنت باسمع البق ده كان دمى بيفور و ضغطى بيعلا بس لما فكرت فى الكلمه لقيت عندهم حق احنا فى زمن مشروع توشكى الرائع اللى كان بوابتنا للمستقبل كما وعد مبارك تماما احنا فى زمن حبيب العدلى رجل الامن والامان الذى حقق الامن والامان للكرسى وابنه زمن شرم الشيخ اللى بقت الليفينج روم اللى بيعدى عليها مبارك واسرته وهما رايحيين الحمام بدل ما تكون مكان للمستثمرين المصريين المحترمين و رجال الاعمال اللى مالهمش علاقه بالوطنى والله حيخلوها جنه و حيضربوا بيها دبى بالجزمه بس كده حيتعدوا على خصوصيه الاسره المالكه زى الجسر اللى كانت السعوديه كانت عايزه تعمله عشان تنشط شمالها وتسهل على الحجاج المصريين السفر البرى بس تقول ايه بقى الريس عنده حق لما قال انها حتخترق شرم وتعكر صوف السياح -اللى هم للى مزارش شرم اليهود والاسره الحاكمه- ومش حتكلم اكتر من كده فى موضوع الجسر عشان ضغطى علا تانى0

احنا فى زمن العبارات الغرقانه والقطارات المحروقه والعائلات المدبوحه و ممثلا بجثثهم0 احنا فى زمن ارتفع فيه دور مصر القومى على المستوى العربى والاسلامى للسما السابعه -اقصد من الصعود للسما السابعه الوفاه-احنا فى زمن بقى فيه كل الشباب بيحبوا البلد اوى اوى وحاسين انهم اخدين حقوقهم تالت ومتلت من اول الاكل والشرب مرورا بالشقه والعربيه والتعليم اللى على اعلى مستوى واخيرا الزواج لكن تقول ايه بقى الشباب بتاعنا غاوى شقا سايبين “عز” البلد او سايبين البلد ل “عز”افهمها زى ما انت عايز و بيروحو يطلع عين ابوهم فى الخليج واوروبا شباب ميملاش عينه الا التراب0

احنا فى زمن السلام المبروك قصدى المبارك عشان يثبت انه رجل سلام جامد اوى واننا شعب مسالم اوى اخد البترول والغاز والحديد والصلب والاسمنت وراح اسرائيل بعد كده رجع تانى عشان اكتشف انو نسى كام حاجه راح حط عليهم منتجعات شرم والبحر الاحمر والاسمنت ورجع اسرائيل تانى قالهم خدوا والله يباركلكوا شفتو انا مسالم وابن حلال ازاى والشعب بتاعى وبتاع ابويه كله معايا وموافقنى 0

احنا فى زمن الهدوء الملك بيحب الهدوء يعم ارجاء المملكه عشان كده اى حبه عيال صيع يتجمعوا فى اى حته يعملو دوشه ويزعجوا المواطنين الامنين بيبعتلهم كل قوات الامن المركزى كلهم كلهم الملك مش بيبخل فى موضوع الامن المركزى ده ابدا حتى لو كان العيال المتظاهرين دول تلاتين اربعين واحد مش مشكله يبعتلهم 40 الف عسكرى امن يسحلوهم وياخدوا شويه يخذوقوهم فى المعتقلات ويعم الهدوء على ارجاء المملكه وجمال يتجوز خديجه فى اخر الفيلم ويخلفولنا ملك صغير0

احنا فى زمن التحرش بالصحفيات والرشوى العلنى اللى عينى عينك و سجن الصحفييين واعتقال الشبان بتوع الجامعه اخان بقى ما اخوانش مش بتفرق كله معرض لاى حاجه البلد فيها مساواة فى موضوع الاعتقالات ده نحن فى زمن الاطباء الفاسدون والقضاه المقهورون والدماء الوسخه والضمائر الاوسخ والسرطانات والاوبئه اللى موجوده بالمساواة برضه فى اللحمه والفراخ والخضار عشان محدش يزعل والمياه الملوثه0

احنا فى زمن وصلنا فيه لدرجه ان بريجيت باردو تبعت فيه جواب لمبارك توصيه على الكلاب والحيوانات الضاله اللى فى مصر وتتعجب من القسوه اللى بيتعرضلها الكلاب فى مصر اه ه ه حتى الكلاب يا رب حتى الكلاب شايفه المر من الزمن ده0

احنا فى زمن الفنان فاروق حسنى اللى و الشهاده لله يحسب له هو ومهرجان القراءه للجميع المستوى الثقافى اللى وصلناله والحمد لله ان التاريخ مش بينسى و التاريخ حيحط اسم فاروق حسنى و مهرجان البتاعه للجميع بحروف من نور جنب الزمن ده0

احنا فى زمن روبى 0 يبقى ايه المشكله بقى فى انه زمن الاهلى هوه ده الصح ده زمن الاهلى والحمد لله انى اتولد بفانله بيضه بخطين حمر زملكاويه ابا عن جد يعنى والحمد لله انه مش زمن الزمالك زمن الزمالك جى ان شاء الله وحيتصلح فيه حال الجميع حتى الكلاب عشان احنا برضه منقدرش على زعل بريجيت0


فؤاده says:

نسرين

كلامك جامد موت
احييكي والله
انتي لميتي كل مظاهر الفساد في البلد

وبما اني زملكاوي طبعا
مبسوط موووت ان انتي حطيتي الشئ اللي اسمه الاهلي في وسط الحاجات ده

والى اللقاء في العهد الابيض ان شاء الله



Nsreen Bsunee says:

نائل
متتصورش انا فرحانه برايك قد ايه وكونك زملكاوى يزيدنى فخرا بزملكويتى المتاصله التى لا يزعزعها شئ -ايه رايك فى يزعزعها ديه-والعهد الابيض جاى باذن الله منتظره زيارتك تانى يا نائل



مصرى says:

نسرين

بصي أنا ماليش في الكورة خالص آخر علاقتي بيها من حواي 6 سنين بس مابحبش الأهلي
😀
بس إيه يا بنتي ده لأ موضوع حلو جدا جدا مجمعة المصايب كلها
إنه حتما لزمن رديء



Nsreen Bsunee says:

يحيى
المهم انك مش بتحب الاهلى كده احنا متفقين وحتى لو بتحب الاهلى حازعل شويه بس مش حنختلف برضه واهم حاجه اننا متفقين على انه زمن زباله كلمه ردئ ديه شويه



Amr Ahmed says:

الله الله

من اول زيارة الاقيكي بتخبطي في الاهلي

ليييييييييييه كده

لالالالالالالالالالالالالالا

كووووووووووول ده
(وخدي بالك كل بالواو كمان(
علشان كسبتوا ماتش

بس انا هاسالك سؤال هو ليه احنا اتعودنا ان مؤسسة ناجحة

تبقي ليها علاقة بالفساد

الاهلي منظمة ناجحة بكل المقاييس
واظن ان اقل الناس حيادية يقول كده

ومحدش بقي يقولي الاهلي حكومة ومش حكومة

الاهلي نادي محترم واي حد بيحترمه

ومع احترامي لراي جنابك
مش انا اللي بقول
الواقع اللي بيقول انه الاهلي فوق الجميع

ادارة بطولات اخلاق

وه الاهلي اللي كان غرق العبارةولا طلع روبي عريانة

ناقص تقوليلي الاهلي هو اللي جاب حسني رئيس

الموضوع حلو

بس ملهوش ادني علاقة بالاهلي

تحياتي



Nsreen Bsunee says:

عمرو
نورتنى
بغض النظر ان انت اهلاوى وانا زملكاويه محدش بيختلف على ان الاهلى مؤسسه ناجحه بكل المقاييس بس مش ده اللى انا باتكلم فيه وانا كمان مش باحمل الاهلى مسئوليه حاجه
لالالا الموضوع مش كده خالص اللى انا اقصده من انى ادخل الاهلى فى الموضوع -موضوع الزمن الفاسد اللى احنا فيه- ان لما يكون الاهلى المؤسسه الرياضيه الوحيده الناجحه او ان تكون مؤسسه واحده ناجحه وسط عدد من المؤسسات ده دليل على اختفاء المنافسه عارف يعنى ايه اختفاء وانقراض المنافسه فى البلد يا عمرو ده فساد واضح وريحته طالعه اوى واكيد ده مش عيب فى الاهلى ده عيب فى الزمن0 ده الى انا اقصده
تحياتى



أبن النــــــــيل says:

أنا معاكى من الالف للياء .. من الواد ابو صفارة ولابس نظارة مش بتشوف غير اللون الاحمر… واللى زعلان من الكلام ده راجع قرارات التحكيم واتحاد الكورة… من أول مشكلة اللاعب الفز(سماكة) لحد شمشمون الجبار( أيتو) معلش اقصد (أينو) يعنى جات على نقطة مش مشكلة اهلى تنفع الاهلى برضك فى الترتيب.. ولو مش مصدق شوف كده هتلاقى فى علاقة وثيقة بين النادى الاهلى والحزب الوطنى الحاكم .. كل مبارة الريس وأبنه يتصل بيهم زى ميكونوا مش بيعملوا حاجة غير الفرجة على الاهلى
وبكده يكون الحزب الوطنى هو الاهلى
والحمد لله انى زمااااااااااااااالك



maged stephen says:

لما باتعرف على أى حد وبأعرف أنه زملكاوى أو أهلاوى بأقدر أعرف شخصيته بالكامل مش بس بالنسبة للكورة
عموما أنا زملكاوى



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

et cetera
%d bloggers like this: